Habakuk 3 - Ɗû na sɗik na wiini Alaw

Habakuk a kola Alaw buri sda n'abakai

¹ Siiwa na wiini ɗif na mini Alaw Habakuk gaini wule zi marava

² EPIƊ-ƊAI, mu ɵina wala na ku za zaida miɗini ya, EPIƊ-ƊAI, hunai te yimaŋa, va sdaku amai war buza paŋ, EPIƊ-ƊAI, war buza paŋ, siŋkaŋ edi. amma war hiyku, hina muduku a kɵa burini hinini-haw na wiiku.

³ Alaw a halasi war Teman par, na Sɗik a halasi midiɗi huwuŋ na Paraŋ par. Sela Paini te na midini hlai n'amai ɗa paŋ, abai na pɗem na wiini te va midini afti paŋ.

⁴ Sini a na maini gaglai nɵa, gaglai a niyasi edi tini par, a hlai na spakni a na woni.

⁵ Veglek zi diŋgi aŋ wuzani su, zi sûwi-si aŋ pini su lai.

⁶ A ɗiya zaw a kata afti gaini arni, a tala arni edi, pinzibaɗi ɗai paŋ e ziriyi, huwaŋai na gamai par a ɓasa edi, boŋorai na ɗipar a yima azumai; futi n'agogoi n'avut par a mala edi wuzani.

⁷ Mu tala gumuɗi Etiyopiya war haw, gumu na wiini afti na Madiyan a na war hunai.

⁸ EPIƊ-ƊAI aŋ gaini hiy sini ra na wiiɗi ɗi? Suwarku a faka amai sini ra na wiiɗi ɗi? Zaw, sini yem-ra n'abai ɗa ɗi? Ku niyasi miɗini plasaiku, miɗini saret zi rɗi n'amai buri hanɗa ɗi?

⁹ Ku na zizina taŋ na wiini ɓarawku, ɓarawku a wala na ku haŋ muku, ku ɓasa afti kapai ku bundaŋ aŋ ra Sela

¹⁰ Won hlai na huwaŋai a tuluku a ziriya, Yem zi ki a vuga gaini gdaŋni; huduk na wuŋŋa a kasi tuwini edi, a yima tini amai.

¹¹ Futi gaini tile a diya won hlaini, won hlai na ɓarawku a vuga, wilɗi na gdaŋ na wiini kawaiku a ŋala.

¹² War hiy na wiiku, ku paya midini afti paŋ, ku kirpa pinzibaɗi ɗai gaini suwar na wiiku.

¹³ Ku niyasi edi buri pli n'edi na wiiɗi ɗaiku, ku kurɗa ni na ku varaŋ edi, ku fuɗa paiɗi pinzibaɗi ɗai na maafanai ɗa edi, ku vidiɗi nagai n'e zini pini paŋ ɗa edi lai. Sela

¹⁴ Ku co midiɗi paakaiɗi gaini ɓaraw na wiiɗi dama, maini berber n'abai, e hilisi buri e ɵiriyi edi, gaini ɗuwal zi firiyi, e riɓi ɗif na murga n'a kɵa li war tiɗi ɗa.

¹⁵ Ku ɓisiti futi wiini plasaiku arni yem-ra n'abai, arni mayaw na gdaŋ.

¹⁶ Mu ɵina, mu turla war suŋfaŋa, won hlai na mu ɵina suura hanɗa, ma a ziriya, keɵkeŋa a hosa. Mu hina zaw gaini giɵiɗi aŋ baya mefeŋ zi gir kapai mi nivi gaiɗi nagai n'e hitimiyi.

¹⁷ Buri luwuŋ Fige aga a cifiya kir kai, luwuŋ zi vin a wa ali kir kai, ali luwuŋ olive a nava kir kai, vowai aga a sa seyem kai, adumai aga a vada edi warni farani par, ɵaakai aga a hina warni berɵem kir kai.

¹⁸ Amma ta aga mu firiya abai gara war EPIƊ-ƊAI. Aga mu firiya abai gara warni Alaw n'a koraŋa.

¹⁹ EPIƊ-ƊAI, a Epin-geza, a gdaŋ na wiya, a bunda aza kokolai maini ezini widre nɵa, a paya gaya amai midini boŋor. War maktuɓ na wiini abaiɗi ɗai zi zini yama gaini adill zi sogom.