Galatekai 5 - Ɗû na sɗik na wiini Alaw

Ki hini siki aŋ wiyi war bege kai

¹ Kristu a pulumusi edi, ɓa kapai mu zumu aŋ ɗai na gai pli edi jre jre, nɵa ki ɗiyi gdaŋ, ki hini siki azumai pin zug na wiini tuwur kir kai.

² Ta Pawlus mu miɗiki ɓa, na ɓa ki ɵi gurgle li ɗa, Kristu a nifiki kir kai.

³ Mu dara mu miɗiki azi ktai pra, ɗif paŋ n'a ɵa gurgle li ɗa, a dewele buri a va gadai ɗa paŋ amai.

⁴ Tiki ki ɗa gaini Kristu kir kai, tiki na ki piyi zi n'edi aŋ jre-ɗikat war gadai ɗa, ki ɗa war yum kir kai.

⁵ Amma tiyi ɗa mi ɗa biyi zi n'edi aŋ jre-ɗikat na pin yimi, n'aga a za ɗa gaini seze.

⁶ Buri ɓa war Yesu Kristu ɗa, wala na pɗem ɗa a ɵini gurgle kaalai, ɵini gurgle kai ɗa kaalai, amma a yimi n'a za sda paŋ war diri.

⁷ Tiki ki fiki aŋ luwi gai futini, a cikiki ɗa asiya ɗa? N'a ɗiliki aŋ ɵini pin jre ɗa asiya ɗa?

⁸ Zini-midi hanɗa a na sin ni n'a yikikisi ɗa par kai.

⁹ Is n'agwi ɗa a faka avdi n'e hiɗɗiŋ paŋ amai.

¹⁰ Ta, mu pɵa na ɗa midiki war Epiɗ-ɗai, buri mu sɗa ɓa aga ki yimi hiini zamai kai, amma ni n'a kasi tûrli arbaki ɗa, koo ɓa a siya ɗi, sariya aga te ko miɗini.

¹¹ Ta ɗa, tawalakaya, a na fu ɓa mu ɓaka seŋ midini ɵini-gurgle ɗaai ɗa, e ziŋa gir zamai buri ma ɗa? Na ɓa ɵa ɗa, dagra a wala zi dibi azi burini ɗif kir kai.

¹² A juva ɓa nagai n'e kisi tûrli arbaki ɗa, e mili mohomɗi edi gai mili le.

Ki piyi war neŋ-si kai, amma war seze

¹³ Tawalakai, tiki ki yikisi sin pili-n'edi, amma pili-n'edi hanɗa aga a bunda buriki aŋ wala n'aga ki zi pin jaaki war neŋ-si na wiiki kai, aga ki zi siki aŋ bagakaiɗi marki arbaɗi marki war diri.

¹⁴ Buri ɓa gadai ɗa paŋ a va amai war seŋ na ktai na ɓa: aga ku dara maiku maini suku dama nɵa ɗa.

¹⁵ Amma na ɓa, ki limi marki gaini sesiyeŋ, ki krpi marki lai ɗa, ki zi hangal, kapai ki tûûri marki arbaɗi marki kai.

¹⁶ Mu miɗiki ɓa: ki piyi war Seze, nɵa aga ki vi dirini neŋ-si ɗa amai kai.

¹⁷ Buri ɓa dirini neŋ-si ɗa a kata gaini Seze kai, na wiini Seze ɗa a kata gaini neŋ-si kaalai, a pa gaini marni ca ca, haa tiki ki zi wala na ki diriŋ kai.

¹⁸ Amma na ɓa Seze a na ɵa wuzaki ɗa, tiki ki ɗa azumai pin gadai kir kai.

¹⁹ Sdani neŋ-si ɗa a na edi gaglai: a maɵara, hihir, payai na meefeŋ,

²⁰ hûrgû n'azumai wuzani alawai zi rgi, zilbi na gaini evek, bilini gaw, sispai, sile, hiy, kûlûni-si, ɓraw, arai zi tiki edi,

²¹ suuna, gaini fetai na ci min viya, simi mini viya lai, na ɗai e viilimi warni a suwa pɗemni, gaini wazagaizamai zamai na mai hanɗa ɵa lai. Mu dara mu miɗiki maini na mu miɗiŋki ka duk ya ɵa: nagai n'e zi wazagai na mai hanɗa ɵa ɗa, paini Alaw aga te sa siɗi aŋ bulum kai.

²² Amma ali na wiini Seze a hanɗa: diri, firiyi, ɵeɗ, ziyini-seŋ-gaini- hangal, pɗem, hangal, yimi,

²³ hangal, ɗilini-si, gadai ktai n'a bula edi sini wazagai hanɗa aŋ kai.

²⁴ Amma nagai n'e ɗi wiini Kristu Yesu ɗa, nagai e tuuki neŋ-si gaini suuna na wiini neŋ-si paŋ amai sin dagra.

²⁵ Na ɓa mu ɗumu karmu war Seze ɗa, mu piyumu war Seze lai.

²⁶ Mu niyumu war kûlûni-si kadai meere kai, mu piyumu miɗi marmu arbaɗi marmu kai, mu zumu suuna siɗi marmu arbaɗi marmu kaalai.