Galatekai 4 - Ɗû na sɗik na wiini Alaw

Ku bege kir kai, amma k'ahi

¹ Mu dara mu muɗa na ɗa ɓa, won hlai na ɗif zi mili bulum a na agwi hai ɗa, ɓraw arbani gaini bege ɗa aŋ kai, paŋ ktai a epin-gezani wazagai ɗa paŋ lai.

² A na azumai piɗi ɗai, n'e tiki hangalɗi sini gaiɗi n'e giɗimi wazagaini lai, haa sin mefeŋ n'epini a ɗiyaŋ ta.

³ Tumu nɵa lai, won hlai na mu ɗumu ka agogoi hai ɗa, mu ɗumu ka aŋ bagakai na wiini wazagai na wiiɗi yai.

⁴ Amma won hlai na hlai a va li ɗa, Alaw a ɵinasi Ahini, te waŋ te muni, a wa a pin gadai lai.

⁵ Kapai a wuriɗisi edi nagai n'e ɗa azumai pin gadai ɗa, kapai mu bundumu aŋ ali zi wii.

⁶ Buri ɓa tiki ki ɗi ali, nɵa Alaw a ɵinasi Sezeni Ahini war agulmu, n'a ɗuula ɓa: “Abba, Api”.

⁷ Nɵa, tuku ku bege kir kai, amma k'ahi. Na ɓa k'ahi ɗa, ku ɗif zi mili bulum sini Alaw par ɗa lai.

Kwimi na wiini Pawlus burini yimi na wiiɗi Galatekai

⁸ Aɗipar ɗa ki siɗi Alaw kai, ki ɗi fu aŋ bagakai piɗi alawai na tiɓ e ɗi alawai na jre kai.

⁹ Tiyana na tiki ki siɗi Alaw ya, zaw, n'Alaw a siɗiki ya, ki diri ki wiyi pin wazagai na nafani kai, na spakni kaalai, kapai ki bindi aŋ bagakaini pra ɗa maɵa maɵa ɗa?

¹⁰ Tiki ki ɗiyi gdaŋ miɗini mefeŋ zamai zamai gaini tile, gaini hlai na ta ta ta, gaini buza lai.

¹¹ Mu huna ɓa sɗa na mu zaŋ buriki ɗa a ba li edi kadai meere ɗi.

¹² Zi siki maiya ta ɵa, buri ɓa ta lai mu na maiki tiki nɵa; mu siiwiki na ɗa a siiwi, tawalakaya, tiki ki zi wala ktai na meefeŋ sa kai zaŋ.

¹³ Tiki ki siɗi ya mu ɓaka labar na pɗem siki azi n'avut ɗa burini huruf n'a na war sa.

¹⁴ Sa ɗa a bunda buriki aŋ wala zi titimi, gaini hanɗa paŋ ɗa, tiki ki miisiŋa kaalai, ki yimiŋa siki maa maini ɗif zi ɵeŋ na war fuŋ n'Alaw par nɵa, maini Kristu Yesu nɵa.

¹⁵ Nɵa firiyi na ki ɗi ka woni ɗa a za maɵa ɗa? Buri mu sɗa aŋ za zaida lai ɓa a na fu a wala n'a sɗa aŋ za ɗa a na ta ki hûrɗisi arki edi ya aŋ siŋŋa lai.

¹⁶ Tiyana mu bunda aŋ gawki buri mu miɗiki jre ɗa ɗi?

¹⁷ Diri n'e ɗa diriki ɗa a diri na gai futini kai, e firiyi e ɓirwiiki edi siyi par, kapai ki diriɗi ɗa e ɗi nagai.

¹⁸ Na ɓa ta mu wala na pɗem na ki diriŋ gara ɗa, ki diriŋa hlai na mu na arbaki ɗa ktai kai,

¹⁹ tiki aliya, na mu na ɵina ŋiba na wiini pûkû buriki ɗaai, haa Kristu a rga amai warki.

²⁰ Tiyana mu firiya mal ɓa mu sumna arbaki dam, kapai mu sɗa wule na mu gidiki gaini ɗa, buri ɓa na mu miɗiŋki mu sɗaŋ kir kai.

Seŋ zi siŋka maini midiɗi Hagar gaiɗi Sara

²¹ Miɗiŋa haw, tiki na ki diri ki wiyi azumai pin gadai ɗa, kiɗa ɵini wala na gadai a muɗaŋ ɗa kai ɗi?

²² Buri aŋ gai ɗû ɓa: Abraham a wa ali sulu, ktai gaiɗi bagai lai, ktai gaiɗi munini na kempe ɗa lai.

²³ Amma ahiɗi bagai ɗa a wa war neŋ-si, amma ahi na wiiɗi muni na kempe a wa pin ɵinini ha.

²⁴ Hanɗa a seŋ zi siŋka maini, buri ɓa falakai hanɗa e ɗi bonu sulu, bonu na ktai ɗa a bonu n'a za midiɗi huwuŋ Sinaï, hanɗa te Hagar na te wa ahi zi bege ɗa.

²⁵ Buri Hagar ɗa, te huwuŋ Sinaï na te na war Arabiya, te kata gaiɗi Yeruzalem na tiyana ɗa, buri t'aŋ war bege gaiɗi aliɗi.

²⁶ Amma Yeruzalem n'amai par ɗa, t'aŋ warni bege kai. Amumu ɗa te na.

²⁷ Buri ɓa aŋ gaini ɗû maini nɵa: firiya, tuku muni na muɗaŋ, na ku wa ahi duk kai, ɗuula ɗuwal zi firiyi, tuku na ku sɗa ŋiba na wiini pûkû suku kai, buri ɓa aliɗi muni n'e hiniti edi dam ɗa e ɗa viya, e sûwiɗi na wiiɗi muni na t'aŋ gaini wus ɗa.

²⁸ Amma tiki ɗa, tawalakaya, ki ɗi alini ɵinini ha maini Isaak nɵa.

²⁹ Amma maini na ɗipar nɵa, ni n'a wa pin neŋ si ɗa, a zini gir wiini ni n'a wa war seze ɗa, tiyana ɗa a za na ɗa ɵa lai.

³⁰ Ɗû ɗa a muɗa maɵa ɗa? Ku birgiti bagai gaini ahiɗi ɗa edi, buri ahiɗi bagai aga a mula bulum gaini ahiɗi muni na kempe ɗa kai.

³¹ Nɵa ɗa, tawalakaya, tumu ɗa mu ɗumu aliɗi bagai kir kai, amma aliɗi muni na kempe ɗa.