Filipekai 4 - Ɗû na sɗik na wiini Alaw

¹ Buri nɵa tawalakaya zi diri gara, tiki na mi diriki gara, tiki na ki ɗi firiyi na wiya, ki ɗi bogorai na wiya lai, ɗiyi gdaŋ war Epiɗ-ɗai, tiki zi diri gara.

Ki firiyi war Epiɗ-ɗai

² Evodia gaiɗi Sintik mu na siiwiki buri ki simni war ɵeɗ arbaɗi marki war Epiɗ-ɗai.

³ Nkam, tuku lai, maiya na jre, mu siiwuku buri ki zina piɗi, nagai e fiɗi was gaya ktai, burini ɓikini labar na pɗem, gaini Kleman lai, mara zi sɗa zamai na yikiɗi aŋ gaini ɗû war maktuɓ zi suŋfa.

⁴ Ki firiyi kureɗ war Epiɗ-ɗai, mu dara mu muɗa pra, ki firiyi.

⁵ A juva ɓa ɗai paŋ e siɗi pɗem na wiiki ɗa, Epiɗ-ɗai a ŋasi gobi.

⁶ Ki huwyi siki burini wala ktai kai zaŋ, amma war wala paŋ ɗa, ki haajaki wuzani Alaw war siiwa, war tuwiki na sini, war zini tese lai.

⁷ ɵeɗ na wiini Alaw n'a suwa hiini paŋ ɗa aga a giɗima agulki gaini hiiniki lai war Kristu Yesu.

⁸ Na a hina ɗa, tawalakaya, a juva ɓa, wazagai na jre paŋ, na ɗai e kûlûŋ paŋ, n'a na woɗi futini paŋ, n'a na hilu paŋ, na ɗai e diriŋ gara paŋ, na ɗai e miɗi pɗem miɗini paŋ, n'a na pɗem paŋ, na zi kol paŋ ɗa, ki hiini midini wazagai hanɗa.

⁹ Wazagai na ki hitiriŋ, na ki yimiŋ, na ki ɵiniŋ, na ki tiliŋ sa par ɗa, ki zi hanɗa. Alaw zi ɵeɗ aga a za gaiki.

Like na wiiki a ɓaka n'Alaw a firiyaŋ ta

¹⁰ Mu firiya abai gara war Epiɗ-ɗai, buri ɓa ki nivi futi aŋ siŋki hiiniki n'a muɗa edi, hiini hanɗa a na fu warki avut par, amma ki nivi futi aŋ zi hanɗa kai.

¹¹ Mu muɗa hanɗa buriɗi suwai na te suwaŋa ɗa kai, amma buri ɓa ta ɗa mu hitira ta aŋ firiya gaini wala n'aŋ ta ɗa.

¹² Mu sɗa simni na war haw lai, na war der ɗa lai, war wazagai paŋ, war hlai paŋ lai, mu hitra simni na war wiyamai, na gainni vi lai, mu sɗa simni na war suwai gaini der lai.

¹³ Mu kiɗa aŋ za wazagai paŋ gaini Ni n'a saŋa spak ɗa.

¹⁴ Amma tiki ɗa, tipi na ki tipi gaya war girŋa ɗa, ki zi pɗem.

¹⁵ Tiki Filipekai, tiki gaini midiki dama ki siɗiŋ ya, war pin zi tiki na wiini labar na pɗem par ɗa, won hlai na mu halasi a Makedoniya par, tipi ktai n'a tapa gaya aŋ saŋa wala zaw aŋ tufaŋa wala aŋ kai, sai ki ɗi tiki ktai.

¹⁶ Buri haa war Tesalonikia par tiki ki ɵiniŋaɗi zinai azi viya.

¹⁷ Mu paya na ɗa a katu na tiki par kai, amma mu paya na ɗa ɓa ki nivi riba viya pini.

¹⁸ Wazagaiŋa ɗa a na viya, m'aŋ gaini vi ta, Epafrodit a kaŋasi wazagai na ki ɵiniŋasi ɗa, maini yitir n'a luguza pɗem, a ɓaka n'Alaw a yimaŋ, a firiyaŋ lai nɵa.

¹⁹ Alaw na wiya aga a va haajaki paŋ amai, pin kiɗi na wiini warɗi abai, war Kristu Yesu.

²⁰ Kol sin Alaw n'apumu haa hlai n'a vada kai na vada kai. Amen.

Wuti n'asakal

²¹ Ki ɵiɓi wuti wiiɗi na sɗik na war Yesu Kristu ɗa paŋ, tawalakai n'e ɗa gaya ɗa e ɵiɓiki wuti

²² -Na sɗik paŋ e ɗa ɵiɓiki wuti. A suwa paŋ nagai n'e ɗa ahani Sezar ɗa.

²³ Yim na wiini Epiɗ-ɗai Yesu Kristu a za gaini sezeki.