Filipekai 3 - Ɗû na sɗik na wiini Alaw

Jre-ɗikat na jre

¹ Burini wazagai n'a hina ɗa, tawalakaya, ki firiyi war Epiɗ-ɗai, ɗû na mu ɗoɗi siki a seŋni dama dama ɗa, a fuɗaŋa sa kai, buri ɓa buriki tiki ɗe a wala n'a siki gdaŋ.

² Ki zi hangal gaini hirgakai ɗa, ki zi hangal gaiɗi ɗai zi sɗa na maafanai, ki zi hangal gaiɗi nagai n'e ɗiyi hiiniɗi miɗini ɵini gurgle ɗa.

³ Buri ɓa ɗai n'e ɵi gurgle jre jre ɗa mi ɗi, tiyi na mi ɗa siiwi Alaw war Seze na wiini, na mi kûli siyi war Yesu Kristu, na mi pɵi miɗini neŋ-si kaalai.

⁴ Kadai tiɓ ɗa, mu kiɗa mu pɵa miɗini neŋ-si, wala na mu za hanɗa burini ɗa a na: Na ɓa zamai e hiini ɓa e kiɗi e pɵi miɗini neŋ-si ɗa, ta mu sɗa aŋ za hanɗa a suwa pra.

⁵ E ɵi gurgle war mefeŋ n'ag'aŋ mitwis, war pinzibaɗi Izrayel, war piɗi humuni na wiini Benyamin, mu Hebre, tamaiya e ɗi Hebrekai, pin gadai! ɗa mu Farise,

⁶ pin hiriyik ɗa mu ɗif na mu ziɗi gir wiiɗi tipi, burini jre-ɗikat na pin gadai ɗa, mu ɗif na seŋ ktai mada kai.

⁷ Amma wazagai na na ka buriya aŋ der ɗa, mu talaŋ maini wala zi bi nɵa burini Kristu.

⁸ Nkam, mu tala wazagai paŋ maini wala zi bi nɵa, buriɗi abaiɗi siɗini Yesu Kristu, Epiɗ-ɗaiŋa, buri ni, mu za ha ɓa wazagai paŋ a ba wiini, mu tala wazagai paŋ maini zilgit kadai, kapai mu nava Kristu,

⁹ kapai e niviŋasi warni gaini jre-ɗikat na wiya ta dama n'a na sini gadai par kai, amma gaini jre-ɗikat na wiini yimi na war Kristu, n'a na sini Alaw par, na ɗif a navaŋ burini yimi ɗa lai.

¹⁰ Kapai mu sɗa Kristu gaini spakni ɵiyini n'amai, gaini tipi na war gir na wiini, aŋ bunda maini ɵa war mrini.

¹¹ Kapai na ɓa a sɗa aŋ za ɗa, mu sɗa aŋ ɵiya amai arbaɗi zi mri par.

Luwi na sin wala n'aŋ gai kiti wuzaku ta

¹² Ta mal maa mu nava hanɗa paŋ kai, mu ga sini vi n'amai war pɗem ɗa kai hai lai, amma mu na lawa pini, mu na fuɗa was aŋ yimaŋ, mu firiya mu yimaŋ maini na Kristu Yesu a yimaŋasi ta ɗa nɵa lai.

¹³ Tawalakai, buriya ta ɗa, mu na hiina ɓa mu navaŋ ta ya, mu na hiina nɵa kai, wala ktai n'aŋ wuzani ara ɗa ɓa: mu wula mada gaini wazagai n'a vuga ya ɗa, mu maɗa sin na wuza sek ɗa,

¹⁴ Mu lawa na ɗa sin wala n'a! gai kiti wuzani ara ta ɗa, kapai mu nava vrak na wiini yiki n'amai par, na wiini Alaw war Yesu Kristu.

¹⁵ Nɵa ɗa, na ɓa mu ɗumu ɗai na gaini vi amai ta, aga mu ɗiyumu sini hiini hanɗa, na ɓa war wazagai zamai zamai ɗa, hiiniki a na kiini ɗa, Alaw aga a siŋkiki burini hanɗa.

¹⁶ A suwa paŋ ɓa, hlai na mu cumusi won na ta ɗa, aga mu hulumu warɗi futi na ɗa ɵa bas.

¹⁷ Tawalakai, ki tiki aza, ki mili arki siɗi nagai na payaiɗi a na maini na ki tiliŋ siyi tiyi par nɵa ɗa.

¹⁸ Buri viya e ɗa piyi maiɗi gawni dagrani Kristu nɵa, mu miɗiki hanɗa azi viya, amma mu muɗa hanɗa tiyana na ɗa gaini tuwi,

¹⁹ dibi na wiiɗi ɗa a bi n'edi, Alaw na wiiɗi ɗa a warɗi, kol na wiiɗi ɗa aŋ war wala n'a tikiɗi siyer na wiiɗi, e hiini ɗa sai midini wazagai na warɗi yai.

²⁰ Amma tumu ɗa, afti na wiimu a na war fuŋ-n'Alaw, mu ɗa biyumu ɓa woni par, Ɗif-zi-kûri na wiimu, Epiɗ-ɗai Yesu Kristu aga a halasi.

²¹ Aga a bunda sumu na meefeŋ hanɗa aŋ kata kal-kal gaini si na juf na wiini Ni, pin gdaŋ n'a sa sini aŋ mula wazagai paŋ azumai pini spakni.