Biblia Todo Logo
Bìoball air-loidhne

- Sanasan -

Filipekai 1 - Ɗû na sɗik na wiini Alaw


Ɵiɓini wuti

1 Pawlus gaini Timotewus, ɗai zi sɗa na wiini Kristu Yesu, siɗi nagai n'e ɗa sɗik war Kristu Yesu war Filipi, siɗi abakaiɗi gaiɗi zi zinai na wiiɗi lai.

2 Alaw apumu gaini Epiɗ-ɗaimu Yesu Kristu e siki yim gaini ɵeɗ.


Siiwi na wiini Pawlus buriɗi ɗaini na war Filipi

3 Hlai paŋ na mada a kɵa li gaiki ɗa, mu sa tese sin Alaw na wiya,

4 War siiwiŋa na buriki paŋ, kureɗ, mu siiwa gaini firiyi;

5 buri diŋgi na ki diŋgi gaya war sdani labar na pɗem sin mefeŋ n'avut ɗa par haa tiyana.

6 Mu yima fakat ɓa ni n'a tika pini sɗa hanɗa warki, aga a hala gaini haa a ɵaŋ edi, haa sin mefeŋ na wiini Kristu Yesu.

7 Hiini na mu hiinaŋ mai hanɗa ɵa ɗa, a futini, buri tikipa ŋ ki ɗa amlai warɗi agula. Buri ɓa tiki ki ɗa gaya war like n'Alaw a saŋ sa ɗa: tiyana na mu na warni jaɓ, zaw won hlai na na mu na ka mu muɗa ezini labar na pɗem edi, zaw won hlai na mu na ka mu ɓakaŋ lai ɗa.

8 Alaw a zaidaŋa, a sɗa ɓa mu diriki gara warɗi agula, gaini diri na wiini Yesu Kristu dama.

9 Wala na mu zilbaŋ war siiwa na wiya ɗa, diri na wiiki a riya amai sek sek, war siɗi gaini siɗi na hulum.

10 Kapai gaini hanɗa ki siɗi aŋ zi ɓraw arbani wazagai, aŋ siɗi na pɗem, kapai ki simni hilu gaini seŋ midiki kai, aŋ biyi mefeŋ na wiini Kristu ɗa,

11 kapai gaini Yesu Kristu ɗa, ki zi sɗa na pɗamai viya na buriɗi abai gaini kol na sini Alaw.


Labar na pɗem a wa tini edi war hlai paŋ

12 Tawalakai, mu firiya ɓa ki siɗi hanɗa, wala n'a za sa ɗa, a zina pini labar na pɗem aŋ hala wuzani.

13 Buri ɓa ɗai n'e ɗa e zi sɗa ahani Lawan paŋ gaiɗi na war hlai zamai ɗa lai, e siɗi edi gaglai ɓa m'aŋ war daŋgai na ɗa burini Kristu.

14 Simniŋa na war jaɓ ɗa a sa gdaŋ viya wiiɗi tawalakai na war Epiɗ-ɗai, e ɓiki seŋ edi gaini gdaŋ, gaini hunai piɗi kai.

15 A jre, zamai ɗa e ɓiki labar na miɗini Kristu na ɗa war sile, e piyi ɗa a sispai, amma zamai e ziŋ ɗa war hiini na pɗem lai.

16 Nagai hanɗa e zi na ɗa war diri, buri e siɗi ɓa m'aŋ war jaɓ na ɗa, kapai mu siŋka ezini labar na pɗem edi.

17 Amma nagai na zamai e ɓiki labar miɗini Kristu na ɗa war hiini zi sile, hiiniɗi ɗa gai futini kai. E hiini ɓa e riyi amai na ɗa a gir na wiya war jaɓŋa ɗa.

18 Kal ɵa, koo ɓa e ɓikiŋ war jre, war jre kai ɗi ɗa, labar na miɗini Kristu a na ɓaka. Buri hanɗa mu firiya, Amma aga mu firiya pra pra,

19 buri mu sɗa ya hanɗa aga a bunda aŋ pɗem na wiya, aga mu kora burini siiwa na wiiki, gaini zinai na wiini seze na wiini Yesu Kristu.

20 Pin wala na mu na bayaŋ ɓa aga a za, mu na bayaŋ pin ɵeɗ lai, aga mu tika siyer burini wala ktai kai zaŋ, tiyana par haa dawai, mu yima fakat fakat ɓa Kristu aga a niviti abai war sa, koo ɓa m'aŋ kara, koo ɓa mu mra su ɗi!

21 Buri ɓa, buriya ta ɗa, suŋfaŋa a Kristu, mri ɗa a waa zi der.

22 Amma na ɓa a pɗem buri mu sumna kara war neŋ-si burini sɗa n'a sa ta ɗa, mu sɗa wala na mu varaŋ kir kai.

23 Hiiniŋa a ɓurwa ca, wara ktai ɓa mu hala wiya aŋ sumna gaini Kristu, a wala na pɗem a suwa pra,

24 Amma buriki tiki ɗa a pɗem ɓa mu sumna war neŋ-si.

25 Nɵa ɗa mu sɗa ɓa aga mu sumna gaiki, mu sɗaŋ ɵa gaglai. Aga mu sumna gaiki pra pra kapai mu zina piki, kapai firiyiki na war yimi a riya amai a suwa a suwa.

26 Kapai won hlai na mu wayaɗi li arbaki ɗa, firiyi na wiiki na burini Yesu Kristu ɗa a riya amai abai buriya ta.


Payai n'a kata gaini labar na pɗem

27 Amma a pɗem ɓa ki piyi payai na pɗem n'a kata pini labar na pɗem na wiini Yesu Kristu, kapai na ɓa koo mu halaɗi aŋ tiliki, koo mu halaɗi kai tekeɗeɗi ɗa, mu ɵina ɗa ɓa tiki ki ɗa gdaŋai war seze ktai, ki hitimi na ɗa miki ktai burini yimi na wiini labar na pɗem.

28 Ki hiniɗi gawki e miliki hunai piki war wala ktai kai zaŋ, buriɗi nagai ɗa, a wala n'a siŋka miɗini bi n'edi, amma buriki tiki ɗa a wala n'a siŋka miɗini kûri n'a na sini Alaw par,

29 buri ɓa, burini Kristu ɗa, tiki ki nivi yim, buri ki yimi war ni ktai kai, amma pra buri ki siɗi gir burini lai.

30 aŋ tipi gaya war hatam hanɗa, na ki tiliŋa warni, na tiyana ki ɵini labarni ɓa mu na hitimaŋ na ɗa ɵa.

La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964

Bible Society of Cameroon
Lean sinn:



Sanasan