Filemon 1 - Ɗû na sɗik na wiini Alaw

Ɵiɓini wuti

¹ Pawlu, ɗif zi daŋgai na wiini Kristu Yesu, gaini tawal Timotewus, sin Filemon, mayni zi sda, zi diri gara,

² siɗi Apfia na tawalyi, sin Arkipus na maini na war askar, sin tipi n'a na war dalamku lai,

³ Alaw Apumu gaini Epiɗ-ɗai Yesu Kristu a siki yum gaini ɵeɗ.

Diri gaini yimi na wiini Filemon

⁴ Mu za tese sin Alaw na wiya kûreɗ-kûreɗ, mu na yika yikiku war ma, war siiwiŋa lai,

⁵ buri mu ɵina labar miɗini diri na wiiku gaini yimi na wiiku na sin Epiɗ-ɗai Yesu, gaini na siɗi na zi yimi lai.

⁶ A juva ɓa, bonuku na war yimi na gaya a za wala na pɗem, aŋ sɗa wazagai na pɗamai paŋ n'a na warmu gaini Kristu.

⁷ firiyiŋa a va amai abai gara, mu nava arai zi pi viya gara lai burini diri na wiiku, buri ɓa gaiku tuku, agulɗi ɗai zi yimi a tika azumai.

Pawlus a siiwa Filemon buri a yima Onesimus sini

⁸ Buri ɓa war Kristu, mu kiɗa aŋ muɗa suku maini na mu dara ɵa, midini wazagai na ku kiɗa aŋ zaŋ.

⁹ Amma mu siiwuku na ɗa gaini siiwi war yikini diri, ta Pawlus na wel, na tiyana mu na aŋ ɗif zi daŋgai na wiini Kristu Yesu pra.

¹⁰ Mu siiwuku na ɗa burini ahiya, na mu waŋ war daŋgai, Onesimus.

¹¹ Aɗipar ɗa a na ka a nufuku kai, amma tiyana ɗa a pɗem buriku tuku, buriya ta lai.

¹² Mu na ɵinuŋkuɗi, ni ɗa a agula amlai.

¹³ Kadai tiɓ, mu firiya ɓa aŋ ɵima dam, kapai a zina pa war balamku, kapai a sɗa aŋ zina pa war won hlai na m'aŋ war jaɓ burini labar na pɗem,

¹⁴ amma mu firiya mu za wala gaini diriku kai kai, kapai sdaku na pɗem ɗa a bunda maini wala zi dewele nɵa kai, amma a za pin diriku.

¹⁵ Ablaŋtaŋkai ɗa Onesimus a ɓurwasi edi gaiku na ɗa buri hlai n'agwi, kapai asakal par ɗa a wayaɗi suku.

¹⁶ A wayaɗi na ɗa, maini bege nɵa kir kai, amma a suwa bege, maini tawal zi diri gara nɵa: A tawal zi diri gara buriya ta, buriku tuku ɗa aga a za a suwa pra, war neŋ-si lai, war Epiɗ-ɗai lai, sulu paŋ.

¹⁷ Nɵa ɗa, na ɓa mu maiku fakat ɗa, ku yimaŋ mai na ɓa ku yimaŋa na ɗa mu ta ɵa.

¹⁸ Na ɓa a zuku wala na meefeŋ zaw walaku ktai aŋ tini ɗi ɗa, ku pɵaŋ mada.

¹⁹ Ta Pawlus mu ɗoɗi na ɗa gaini ta mal ɓa: Ta dama, aga mu vurguŋku, -mu dara mu muɗa na ɗa ɓa tuku dama ku wiya.

²⁰ Nkam, tawala, za wala hanɗa buriya ta war Epiɗ-ɗai, ku tikitiŋa agula azumai war Kristu.

Gadai gaini wuti n'asakal

²¹ Mu ɗoɗi suku na ɗa buri mu sɗa ɓa aga ku za pin hanɗa, mu sɗa ɓa aga ku za a suwa wazagai na mu muɗa gaini na ɗa.

²² Ku zizinaŋa ka hlai zi simni ta lai, buri mu sɗa ɓa pin siiwiki ɗa aga mu coɗi siki lai.

²³ Epafras, maya zi daŋgai war Kristu Yesu, a na ɵuɓukuɗi wuti.

²⁴ Markus lai gaini Aristarkus, Demas gaini Lukas, mara zi sɗa e ɗa ɵiɓuku wuti.

²⁵ Yum na wiini Epiɗ-ɗai Yesu Kristu a za gaini hiiniku.