Ezdras 6 - Ɗû na sɗik na wiini Alaw

Pai Dariyus a waya seŋ

¹ Nɵa, Pai Dariyus a sa miɗi buri e tili amlai war maktuɓ zi giɗimi seŋ n'a hina amlai ca war dilimi zi godai na te na war Babilon.

² Aha warɗi ɵagai na Ekbatane, war Provens na wiiɗi Medekai e nivi maktuɓ zi fiɗɗi n'a ɗaha warni maini nɵa: maktuɓ zi giɗimi seŋ.

³ Buza n'avut na wiini Pai Sirus, Pai Sirus a sa miɗi edi maini nɵa: Dalam na wiini Alaw n'aha war Yeruzalem, Dalam hanɗa aga a rga amai pra, maini hlai n'e zi ɓaka woni nɵa. Midini ezini n'avut n'a tora woni. Mogoni amai sek metir hu, brukni metir hu.

⁴ Aga ki mili ali-fuŋ n'abakai giri hu, giri na wiini luwuŋ na hehe ktai. Farai na baŋ ɗa a vurgaŋ ɗa a dalamni pai.

⁵ Pra, aga e wiyi wazagai na war dalamni Alaw par na zi or, gaini zi arzaŋ, na Nebukadnezar a mulaŋsi war tempel na Yeruzalem par, a kaŋsi aha Babilon, wala paŋ aga a waya war balamni, warni tempel na Yeruzalem. Aga ku mulaŋ amlai war dalamni Alaw.

⁶ Tiyana Tatenai, Lawan n'anene duɓani yem-ra na Öfrata par, Setar-Boznai gaiɗi marni, ɗai na Afarsak n'anene duɓani yem-ra na Öfrata par, yimi siki edi sin hlai hanɗa par.

⁷ Hini sdani dalamni Alaw hanɗa a za. Lawan na wiiɗi Yudiyakai gaiɗi n'abakai na wiiɗi Yudiyakai aga e rgi dalam hanɗa war balamni.

⁸ Miɗi na wiyi miɗini sda n'aga ki ziŋ gaiɗi n'abakai na wiiɗi Yudiyakai, war rgini dalam na wiini Alaw a na maini nɵa: Vrakɗi ɗai zi sda hanɗa aga a yimasi war wazagai zi der na wiini Pai na navasi war Lambu na midini afti n'anene duɓani yem-ra na Öfrata par, vrakɗi aga a sa edi kûreɗ-kûreɗ,

⁹ wala na pɗem n'a sɗa aŋ hina kai, burini ɓaka zi yi na wiini Alaw n'amai: ali garakai, adumai na maɵagai, ali adumai lai. Pin kiti na wiiɗi Paakai zi ɓaka na Yeruzalem, aga ki siɗi: algama, manta, vin gaini emel. Aga a sa siɗi mefeŋ mefeŋ paŋ, ɗiyi warni kai.

¹⁰ Kapai e sɗi aŋ ki ɓaka zi ɵeɗ wiini Alaw n'amai, kapai e siiwi burini suŋfa na wiini Pai gaini na wiiɗi alini.

¹¹ Seŋŋa na mu muɗaŋ ɗa na ɓa ɗif aha amai midini, aga e rɗisi luwuŋ ktai war dalamni par, e tûkûŋ amai sini, pra, e bindi dalamni aŋ hlai zi ziligit.

¹² A pɗem ɓa, Alaw n'a hina yikini aŋ sumna won hlai hanɗa, a ɵa Pai paŋ zaw pinziba paŋ, azumai; won hlai n'a dara war hi n'amai midini seŋŋa aŋ ɓilka dalamni Alaw na Yeruzalem hanɗa edi. Ta Dariyus, mu sa miɗi ya, aga aza kal-kal maini mu muɗaŋ ɗa ɵa.

¹³ Nɵa Tatenai, Lawan n'anene duɓani yem-ra Öfrata par, Setar-Boznai gaiɗi marni lai e zi kal kal maini miɗi na pai Dariyus a miɗiŋɗisi ɗa nɵa.

Milini min tempel na hehe

¹⁴ N'abakai na wiiɗi Yudiyakai e hili wuzaɗi gaini rgi, pin seŋ na wuze na wiini ɗif na min Alaw Haggai gaini Sakariyas ahini Iddo, e vidi sdani rgi, pin miɗi na wiini Alaw na wiiɗi Izrayel gaini miɗi na wiini Sirus, na wiini Dariyus gaini Artaserkises paakai na Persus.

¹⁵ E vidi dalam hanɗa war mefeŋ n'ag'aŋ hu na wiini tile Adar war buza n'ag'aŋ ɵaara na wiini Pai Dariyus.

¹⁶ Aliɗi Izrayel, paakai zi ɓaka, Levitekai gaiɗi zamai piɗi n'e wiyisi edi war bege midini afti zamai par, e ziti fet na wiini dalam na wiini Alaw.

¹⁷ E si like buriɗi fet na wiini rgini dalam na wiini Alaw hanɗa: garakai miya ɗaw, adumai na maɵagai miya sulu, ali adumai miya puɗu, mapatakai doogo pi sulu miɗini piɵiɗi pinzibaɗi aliɗi Izrayel, aŋ ɓaka burini tuwur na wiiɗi Izrayel paŋ.

¹⁸ E miliɗi paakai zi ɓaka war sda pin kiɗiɗi, Levitekai lai pin ɓrawɗi war sdani Alaw n'aga a za aha war Yeruzalem, pin gadai na war maktuɓ na wiini Musus.

Paska

¹⁹ Nagai n'e wiyisi edi par war bege eziti Paska war mefeŋ n'ag'aŋ doogo pi puɗu na wiini tile n'avut.

²⁰ Maini na paakai zi ɓaka, aŋ bonu gaiɗi Levitekai, e zi siɗi edi ya aŋ hilu, buri nɵa paŋ e ɗa hilu. E fiɗii alini adumai zi Paska buriɗi nagai paŋ n'e wiyisi edi war bege par paŋ, buriɗi tawalakaiɗi na paakai zi ɓaka, buriɗi siɗi dama lai.

²¹ Nɵa aliɗi Izrayel n'e wiyisi edi war bege par e simi Paska gaiɗi nagai paŋ n'e ɗa ɵimaɗi gobi, n'e yimi siɗi edi sin hihir na wiiɗi ɗai na kadai na midini afti ɗa, aŋ piyi EPIƊ-ƊAI, Alaw na wiiɗi Izrayel.

²² E ziti fet na wiini peŋ na is arni kai gaini firiyi, haa mefeŋ muguzak, buri EPIƊ-ƊAI a viɗi gaini firiyi won hlai na binditi agulni Pai n'Asiriya piɗi par, kapai a siɗi gdaŋ war sdani dalamni Alaw, Alaw na wiiɗi Izrayel.