Ezdras 1 - Ɗû na sɗik na wiini Alaw

Sirus a sa futi ɓa tempel a rga amai

¹ War buza n'avut na wiini Sirus, pai na Persus, kapai seŋ n na wiini EPIƊ-ƊAI n'a niyasi war mini Yeremiyas par a va amai ɗa, EPIƊ-ƊAI a mala hiinini Sirus, pai na Persus aŋ sa miɗi edi midini aftini war ɗuwal gaini ɗû maini nɵa:

² Sirus, pai na Persus a na muɗa maini nɵa: Pai na midiɗi yai ɗa paŋ, EPIƊ-ƊAI, Alaw n'amai a saŋa war ta, ni dama a muɗaŋa buri mu rgini Dalam aha war Yeruzalem na war Yuda.

³ Arbaki ɗa ɗif n'a sɗa ɓa a na war vok na wiini ɗa a siya ɗa? Alaw na wiini a za gaini. A hala amai a Yeruzalem war Yuda, aŋ rga dalam na wiini EPIƊ-ƊAI, Alaw na wiiɗi Izrayel, Buri ɓa a Alaw n'a na aha war Yeruzalem.

⁴ Woɗi paŋ a na piɗi ɗaini Alaw e hini, ɗai n'e ɗa won hlai hanɗa aga e sini wiini asiya ɗi paŋ: arzaŋ gaini or gaini wazagai zamai zamai gaini farai n'ezini puɗu puɗu gaini like na pin dirini ɗif burini dalam na wiini Alaw n'a na war Yeruzalem.

⁵ Nɵa tamaini dalam na war Yuda, gaiɗi na war Benyamin gaiɗi paakai zi ɓaka gaiɗi Levitekai lai, gaiɗi nagai paŋ n'Alaw a ɵiya hiiniɗi amai, e hili e rgi dalamni EPIƊ-ƊAI n'a na war Yeruzalem ɗa amai.

⁶ Marɗi na ɵimaɗi ezini piɗi viya gara, gaini wazagai n'a zizina gaini arzaŋ, gaini or, wazagai zamai zamai, gaini farai n'ezini puɗu puɗu gaini zamai n'e siŋ pin diriɗi a suwa hanɗa pra, wazagai na wûrini abai gaini like na pin diriɗi.

⁷ Pai Sirus a waya wazagai zi sda na war dalamni EPIƊ-ƊAI, na Nebukadnezar a mulaŋsi a Yeruzalem par, a mulaŋ amlai war dalamni alawaini war balamni.

⁸ Sirus pai na Persus a mulasi wazagai hanɗa edi gaini Mitredat ɗif zi giɗimi farai, ni a siŋni wiini Sesbatsar pai na Yuda;

⁹ Piɵini a na maini nɵa: burzuna zi or: 30, burzuna zi arzaŋ: 1.000, muguɗ 29.

¹⁰ Kawai zi ci zi or 30, na zi arzaŋ n'arba ta 410, wazagai zi sda zamai 1.000.

¹¹ Piɵini wazagai ɗa paŋ a na: 5.400, Sesbatsar a mulasi wazagai hanɗa paŋ a kaŋ war Yeruzalem, gaiɗi bagakai n'e ɗa wiyi aha warɗi Yeruzalem ɗa lai.