Ester 9 - Ɗû na sɗik na wiini Alaw

Yudiyakai e fiɗiɗi gawɗi edi

¹ Mefeŋ n'ag'aŋ doogo pi hu na wiini tile n'ag'aŋ doogo pi sulu a dara a muɗa tile na wiini Adar na gadai na wiini pai a va amai warni, na gawɗi Yudiyakai e hiini ɓa aga e rɗi amai midiɗi lai, war mefeŋ ni ɗa a za ɵa kir kai, e rɗi amai ɗa e ɗi Yudiyakai.

² Yudiyakai e tipi siɗi aha war fuŋ n'abakai ta ta na midini afti na wiini pai Serkises ɗa aŋ hitimiɗi nagai n'e piyi futi buri e ziɗi meefeŋ ɗa, ɗif n'a kiɗa a ɗiya miɗi aŋ kai, buri ɗai paŋ e bindi muhunakai wuzaɗi.

³ Ɗai n'abakai na midini afti na wiiɗi lawaŋai paŋ, satrapai, lawaŋai gaiɗi ɗai zi sda n'abakai na wiini pai paŋ e zini piɗi Yudiyakai buri e hûni Mardokai ta.

⁴ A za nɵa, buri Mardokai a bunda aŋ ɗif n'abai ahani pai, yikini a tika pini a wa edi midini afti na wiiɗi lawaŋai paŋ, Mardokai ni ɗa, spakni a riya amai wuzani sek sek.

⁵ Yudiyakai e zi siɗi gawɗi maini n'e diri nɵa, e fiɗiɗi gawɗi edi gaini kaɵkar, e vidiɗi edi kafa, ɗif a hina kai.

⁶ Aha warɗi kapital Sûz taa ha ɗa, Yudiyakai e fiɗi ɗai miya ɵim.

⁷ E fiɗiɗi alini Haman na gawɗi Yudiyakai, n'ahini Hamedata ɗa edi, yikiɗi maini nɵa: Parsandata, Dalfon, Aspata,

⁸ Porata, Adaliya, Aridata,

⁹ Parmasta, Arizai, Aridai gaini Vaizata.

¹⁰ E fiɗiɗi edi, amma e mili wazagaiɗi kai.

¹¹ War yuvai ni haa, pai a nava pɵiɗi nagai n'e mri aha war kapital Sûz ɗa kafa.

¹² Nɵa pai a miɗiɗi wiiɗi Ester na muni n'amlai mini pai, ɓa aha war kapital Sûz taaha ɗa Yudiyakai e fiɗi ɗai miya ɵim, e fiɗiɗi alini Haman ɗa ca lai. Aŋ ta na edi midini afti na wiiɗi lawaŋai ɗa aga a suwa pra. Tiyana ku zilba zamai ɗa a maɗa? Aga a sa suku, ku firiya zamai ɗa a maɗa? Aga a za lai.

¹³ Ester te wiyini seŋ: Na ɓa pai a hiinaŋa li ɗa, a pɗem ɓa dawai pra, pai a sa futi wiiɗi Yudiyakai na war Sûz, kapai e wiyi pini gadai n'e zi pini girna ɗa, alini Haman ɗa ɗe, e rgiɗi amai sini luwuŋ ɓak ɓak lai.

¹⁴ Pai a muɗa: A za maini hanɗa ɵa, e miɗi gadai edi war Sûz, alini Haman na ɗa e rgiɗi amai sini luwuŋ ɓak ɓak lai.

¹⁵ Yudiyakai na war Sûz e diŋgi war mefeŋ n'ag'aŋ doogo pi puɗu na wiini tile Adar pra, aha war Sûz e fiɗi ɗai miya hu, amma e mili wazagaiɗi kai.

¹⁶ Amma Yudiyakai n'edi midini afti na wiiɗi lawaŋai na pini pai ɗa, e diŋgi siɗi, e simni gaini zizini, e fiɗi ɗai dubu doogo doogo muguzak pi ɵim piɗi gawɗi, asakal par gawɗi e wiyi piɗi aŋ huwyiɗi kir kai, amma Yudiyakai e mili wazagaiɗi ɗa kaalai.

¹⁷ Hanɗa a za war mefeŋ n'ag'aŋ doogo pi hu na wiini tile Adar, mefeŋ n'ag'aŋ doogo pi puɗu siɗi a mula, e binditi yuvai hanɗa aŋ yuvai zi fet, zi firiyi lai.

¹⁸ Amma Yudiyakai na war Sûz e diŋgi siɗi amai war mefeŋ na doogo pi hu gaini doogo pi puɗu ɗa siɗi a mula war mefeŋ n'ag'aŋ doogo pi ɵim, e binditi yuvai hanɗa aŋ yuvai zi fet zi firiyi lai.

¹⁹ Hanɗa a wala n'a kiɗi Yudiyakai n'aha war kapital Sûz kai ɗa, aŋ zi mefeŋ n'ag'aŋ doogo pi puɗu na wiini tile Adar aŋ mefeŋ zi firiyi, n'e fiɗi wazagai e di simi warni, e zi fet warni lai, E ɵini katu wiiɗi marɗi lai.

Pi zi tiki na wiiɗi fet Purim

²⁰ Mardokai a ɗo wazagai n'a za ɗa paŋ, a ɗo letre wiiɗi Yudiyakai na midini afti na wiini pai Serkises paŋ, nagai na gaigai gaiɗi na gobi lai.

²¹ Kapai buza paŋ ɗa mefeŋ na doogo pi puɗu gaini na doogo pi ɵim na wiini tile Adar ɗa, a ɗiya aŋ mefeŋ zi fet,

²² a mefeŋ na Yudiyakai e rɗi amai midiɗi gawɗi woni, a tile na hlai a bunda warni, kwimi a bunda aŋ firiyi, tuwi a bunda aŋ fet lai, a mefeŋ n'aga e di simi warni, e firiyi warni lai, e ɵini katu wiiɗi marɗi, e si like wiiɗi na murgakai lai.

²³ Yudiyakai e yimi seŋ na Mardokai a ɗûɗisi pini ɗa, na nagai e ɗi fu aŋ ziŋ lai n'a bunda maini de na wiiɗi nɵa ɓa:

²⁴ Haman n'ahini Hamedata na war pinzibani Agag, n'a firiya a ziɗi gir wiiɗi Yudiyakai paŋ, a rga warni buri a vidiɗi edi, a za wala zi vili n'e yikiŋ ɓa: Pur, kapai a sɗa mefeŋ n'a ɗiya buri a vidiɗi edi warni ɗa.

²⁵ Amma hlai na seŋ hanɗa a co wuzani pai, a ɗo edi ɓa, hiini na meefeŋ na Haman a rgaŋ warni siɗi Yudiyakai a waya miɗini, e rgiŋ amai sini luwuŋ, ni gaiɗi alini paŋ.

²⁶ Buri nɵa, mefeŋ hanɗa e sini yiki ɓa fet na wiini Purim, a halasi sini wala n'e yikiŋ ɓa Pur ɗa par. Pini wala n'a ɗo war letre gaini n'e tiliŋ gaini n'a za siɗi lai ɗa,

²⁷ Yudiyakai e bindiŋ aŋ mefeŋ na midiɗi a kɵa gaini, e yimiŋ avut aŋ wiiɗi, asakal par a hina wiiɗi pinzibaɗi gaiɗi nagai paŋ n'aga e bindi siɗi aŋ Yudiyakai lai, buza paŋ ɗa, mefeŋ na sulu hanɗa fet a za warni pini gadai na Mardokai a saŋ, war yuvai ni lai.

²⁸ Mefeŋ hanɗa, Pinzibaɗi Yudiyakai n'asakal sek paŋ, war pakatai pakatai paŋ, midini afti na wiini Lawan Lawan paŋ, war fuŋ n'abakai n'abakai paŋ lai aga e ziti fet na wiini Purim hanɗa, fet na warni mefeŋ ni ɗa aga a ɗiya arbani hlai ta kai, pinzibaɗi Yudiyakai e ziŋ wuzaɗi sek sek.

²⁹ Ester muni n'amlai mini pai, n'ahini Abihayil, gaini Mardokai ɗif na Yudiya lai e ɗûti letre na te gaŋ sulu kapai te sa spak wiiɗi letre n'avut ɗa miɗini seŋ na wiini Purim ɗa.

³⁰ Letre a ɵina edi siɗi Yudiyakai na midini afti na wiiɗi lawaŋai na miya gaini caaɓa pi muguzak na pini pai Serkises ɗa paŋ, letre hanɗa a muɗa miɗini ɵeɗ gaini ɗiyi na war jre,

³¹ A ɗiya midini mefeŋ na wiini fet na wiini Purim maini na Mardokai ɗif na Yudiya gaiɗi Ester muni n'amlai mini pai e ɗiyiŋ nɵa; fet hanɗa a na buriɗi nagai gaini pinzibaɗi n'asakal sek ɗa lai, war letre hanɗa, gadai a ɗiya burini tikini-sai gaini yama zi tuwi.

³² Seŋ na wiiɗi Ester na midini Purim ɗa a bunda aŋ gadai, a ɗo azumai warni maktuɓ ktai ɗo lai.