Ester 8 - Ɗû na sɗik na wiini Alaw

May te jogo tiɗi Yudiyakai

¹ War yuvai ni haa, pai Serkises a siɗi wazagaini Haman na firiya a ziɗi gir wiiɗi Yudiyakai wiiɗi Ester, muni n'amlai mini pai ɗa kafa; pra, pai a yikasi Mardokai aha sini buri Ester te miɗini ya ɓa a zigelɗi

² A tikasi adoŋo, n'a nasi ka tini Haman ɗa, a sitini wiini Mardokai, Ester te tika Mardokai amai midini wazagaini Haman ɗa paŋ lai.

Pai a sa futi wiiɗi Yudiyakai buri e hini siɗi kai

³ Ester te ɗiya ɵa ta kai, te miɗini seŋ zamai wiini pai pra, te bla siɗi azumai ezini, te tuwa, te siiwaŋ buri a caka gir na Haman n'ahini Agag a firiya a kaŋsi midiɗi Yudiyakai ɗa cak.

⁴ Pai a witiɗiɗi amaraŋaini zi or wiiɗi Ester, nɵa Ester te fakasi amai te ɗiya wuzani pai zaw.

⁵ Te muɗa: na ɓa pai a hiinaŋa li, na ɓa a tala arni pɗem, na ɓa a firiya agulni lai, na ɓa ta mu juva arni lai ɗa, letre a ɗo, a ɵina edi siɗi lawaŋai na midini aftiku paŋ kapai seŋ na Haman n'ahini Hammedata na war pinzibani Agag a ɗoŋ edi buri fiɗi na wiiɗi Yudiyakai ɗa a fuɗa edi.

⁶ Tamaiya e siɗi gir, kapai ta mu tiliɗi gaini ara maɵa maɵa ɗa, zaw e vidiɗi zagalakaiya edi wuzani ara nɵa maɵa maɵa ɗa?

⁷ Pai Serkises a wiyiɗi seŋ wiiɗi Ester muni n'amlai mini pai, gaini Mardokai na Yudiya lai ɓa: Tili wazagaini Haman kafa mu siŋɗi wiiɗi Ester ca, ni ɗe e rgiŋ amai sini luwuŋ ɓak buri a paya futi aŋ fiɗiɗi Yudiyakai edi.

⁸ Tiyana ɗa, tiki ki ɗû siɗi Yudiyakai maini na ki diri nɵa, ki ɗû war yikini pai ki tiki adoŋo na wiini pai pini aŋ tampon ta lai, buri wala paŋ n'a ɗo li war yikini pai, na adoŋo na wiini a tika li pini aŋ tampon lai ɗa, a kiɗa a bunda kir kai.

⁹ War mefeŋ ni e yikiɗisi sekreterai na wiini pai, a za na war mefeŋ na caaɓa pi hu na wiini tile n'ag'aŋ hu, a dara a muɗa tile na wiini Sivaŋ, e ɗû seŋ paŋ kal kal maini na Mardokai a na muɗaŋ war mini par nɵa, e ɵiniŋɗi wiiɗi Yudiyakai, wiiɗi Satrapai, wiiɗi Lawanai gaiɗi n'abakai na midini afti na miya gaini caaɓa pi muguzak ɗa paŋ, siɗi Indiya par haa siɗi Etiyopiya ta, e ɗû war ɗû na wiini aftini Lawan paŋ, war meme na wiini ziba ziba paŋ lai, siɗi Yudiyakai war ɗû na wiiɗi gaini meme na wiiɗi lai.

¹⁰ E ɗû letre war yikini pai Serkises, e tiki adoŋoni pini aŋ tampoŋ ta lai, e ɵiniŋ edi tiɗi ɗai n'e dibiri plasai na gaini viri edi ɗaw burini sda na wiini pai.

¹¹ Seŋ na war letre a na maini nɵa: Pai a na sa futi wiiɗi Yudiyakai n'e ɗa war fuŋ n'abakai paŋ buri e diŋgi siɗi amai, e simni gaini zizini kapai e vidiɗi, e fiɗiɗi, e hini ɗif ktai maa piɗi askarai, zaw ɗai na pini Lawan ktai n'aga e ziɗi gir ɗa, koo ɓa e ɗi aliyagoi zaw, koo ɓa e ɗi falakai kai e hiniɗi kai, e virmi wazagaiɗi lai,

¹² E vidiɗi edi war yuvai ktai midini afti na wiiɗi lawaŋai na pini pai Serkises paŋ kafa, a mefeŋ n'ag'aŋ doogo pi hu na wiini tile n'ag'aŋ doogo pi sulu, a tile na wiini Adar.

¹³ Ɗû hanɗa aga a muɗa edi midini afti na wiiɗi lawaŋai paŋ maini gadai nɵa, ɗai paŋ e ɵiniŋ lai, kapai war mefeŋ ni ɗa Yudiyakai e simni gaini zizini, e hitimiɗi nagai n'e diri e ziɗi meefeŋ ɗa lai.

¹⁴ Pini miɗi na wiini pai, ɗai zi dibiri plasai, e fiki e hili edi gaini pirmi gaini letre ɗa, ɗû ɗa a muɗa edi war kapital Sûz lai.

¹⁵ Mardokai a niyasi ahani pai par gaini sapa zi pai n'a sɗa mekele cih cih gaini na muɗukwi lai sini ca, bogorai zi or n'amai midini tiɓ, gaini dawra zi leŋ gaini na muɗukwi lai, aha war fuŋ n'abai na Sûz ɗa, ɗai e ɗûûli lai, e firiyi lai.

¹⁶ Buriɗi Yudiyakai ɗa, a mefeŋ zi gaglai, zi firiyi a mefeŋ zi firiyi n'abai, na wiini rɗi n'amai lai.

¹⁷ Hlai paŋ na gadai na wiini pai a co li woni paŋ, a firiyi n'abai buriɗi Yudiyakai, e fiɗi wazagai e di simi, e zi fet lai. Ziba zamai viya na midini afti e bindi siɗi aŋ Yudiyakai buri hunai na wuzaɗi ɗa.