Ester 7 - Ɗû na sɗik na wiini Alaw

Kɵi n'azumai na wiini Haman gaini mrini

¹ Pai gaini Haman e hili ahaɗi Ester miɗi fet ɗa.

² Miɗi fet na te gaŋ sulu ɗa, asakalni simi par won hlai n'e ɗa ci vin, pai a zilbiti Ester pra: Wala na ku zilba ɗa a maɗa, Ester muni n'amlai mini pai? Aga a sa suku, ku firiya tiɓ ɗa a maɗa? Koo ɓa a galɗi paiŋa tekeɗeɗi aga mu sutuku.

³ Ester muni n'amlai mini pai te waya seŋ: Na ɓa pai a hiinaŋa li, na ɓa a firiya a saŋa wala na mu zilbaŋ gaini na mu firiyaŋ ɗa lai ɗa, zilbi na wiya ɓa a kurɗaŋa edi kruɗ, mu firiya ɓa a kurɗaŋa ta kruɗ, a kurɗa pinzibaŋa kruɗ lai, hanɗa a tuwiŋa na mu kaŋsi wuzani pai ɗa.

⁴ Buri ɓa ta gaini pinzibaŋa ɗa e wûriyi edi yaw, aŋ vidiyi edi, aŋ fiɗiyi edi e hini ktai piyi kai, aftini, na ɓa e wiriyifu na edi aŋ bagakai ɗa, mu muɗa miɗi seŋ kai, buri ɓa gir hanɗa a na ɗif a huwya pai pini ɗa kai.

⁵ Pai a zilbiti Ester muni n'amlai mini pai maini nɵa: Ɗif n'a hiina seŋ na maini hanɗa nɵa ɗa asiya ɗa, aŋ wata ɗa?

⁶ Ester te waya seŋ: Ɗif n'a dara a ziyi gir, n'a na aŋ gawyi lai ɗa a Haman, ɗif na seŋni meefeŋ hanɗa. Haman a turla marwai wuzani pai gaiɗi Ester muni n'amlai mini pai.

⁷ Pai a bunda gaini hiy haa a faka war hlai zi ci par a niya anene war hlai zi cafai na wiini. Haman a hina ka dam aŋ zilbiti Ester muni n'amlai mini pai buri te kurɗaŋ tini pai par kruɗ, buri a sɗa ya ɓa pai aga a zini wala na meefeŋ.

⁸ Won hlai na pai wayasi amlai war hlai zi ci, a navasi Haman azumai war wala zi feŋ n'Ester te na fu miɗini ɗa waŋ, a ɗuula a muɗa: Ku tuku pra, ku firiya ku fana gaiɗi muniya aŋ gdaŋ ahaya, wuzani ara zaw, pai a sa futi ɓa e rgini sapa arni Haman, e rgiŋni arni lai.

⁹ Harbona ktai arbaɗi ɗai na kɓarai a muɗa ɵimani pai ɓa: Luwuŋ na maini hanɗa nɵa ɗa aŋsi ahani zaw, n'a zizinaŋ buri a rga Mardokai na seŋni a sa firiyi wiini pai ɗa amai sini, mogoni n'amai sek ɗa kil ɵim. Pai a muɗa: Rgi ni dama amai sini.

¹⁰ E rgi Haman amai sini luwuŋ n'a zizinaŋ burini Mardokai ɗa ɓak, asakal hanɗa, hiy na wiini pai a tika azumai ta.