Ester 6 - Ɗû na sɗik na wiini Alaw

A dewele buri Haman a sini kol wiini Mardokai

¹ War duvuk hanɗa, pai, weseŋ a ga arni kai, a zilɓa ɓa e kinisi maktuɓ na seŋ n'a za warɗi pai paŋ aŋ gaini ɗû warni ɗa, e ŋiŋ edi wuzani lai.

² E nivi seŋ na Mardokai a miɗiŋni wiini pai Serkises hlai na Bigtan gaini Teres ɗai kɓarai na wiini pai n'e giɗimi mini magala e piyi futi aŋ fiɗiŋ edi ɗa.

³ Pai a zilba: Tiyana ɗa, Mardokai a nava zi vrak, zaw zi kol pini wala hanɗa a ma kiɗi ɗa? Ɗai na wiini pai e wiyini seŋ ɓa: E zini wala ktai maa kai.

⁴ Pai a zilba ɓa: A na anene ɗa asiya ɗa? Kapai a halasi na ɗa a Haman buri a zilba pai ɓa a sini futi a rga Mardokai amai sini luwuŋ n'a zizinaŋsi burini ɗa.

⁵ Ɗai na wiini pai e wiyini seŋ ɓa: A na anene ɗa a Haman. Pai a muɗa: A niyasi amlai.

⁶ Haman a niya amlai, pai a zilbaŋ ɓa: Ɗif na pai a dara a kolaŋ amai ɗa e zi sini ɗa a maɗa? Haman a muɗa gaini warni dama ɓa: Ɗif zamai na pai a kiɗa a kolaŋ amai na ɗa asiya kiɗa, mu za ka na mu ta ɵa kai ɗi.

⁷ Haman a wiyini seŋ wiini pai, ɗif na pai a firiya a kolaŋ ɗa:

⁸ E sini sapa zi pai, na pai a waŋ sini duk ya, e tikiŋ miɗini plisni ktai ta, e pitini bogorai zi pai ktai miɗini tiɓ lai,

⁹ Pai a sa sapa na gaini plis tini ktai arbaɗi ŋarakaini n'abakai ca, kapai a wiini sapa zi pai sini ɗif na pai a dara a sini kol ɗa, a tikaŋ amai midini plis ɗa, a hala gaini war hlai na ɗai e tipi woni ta ta na war fuŋ n'abai hanɗa, gaini ɗuwal pini maini nɵa: Hanɗa a ɗif na pai a firiya a sini kol ɗa, hanɗa a ɗif na pai a firiya a sini kol ɗa.

¹⁰ Nɵa Pai a miɗini wiini Haman: Ku tika hlai edi kir kai, mula sapa ɗa, yima plis ɗa lai, ku za sini Mardokai ɗif na Yudiya n'a na anene mini magala ɗa maini na ku muɗaŋ ɗe nɵa, seŋ na ku muɗa ɗa, ku hina ktai maa edi pini kai.

¹¹ Haman a mula sapa ɗa, a yima plis ɗa lai, a wiini sapa sini Mardokai, a ɵa wuzani a gunaŋ war hlai na ɗai e tipi woni ta ta na war fuŋ n'abai ɗa, a ɗuula maini nɵa: Hanɗa a ɗif na pai a firiya a sini kol ɗa, hanɗa a ɗif na pai a firiya a sini kol ɗa.

¹² Asakal par Mardokai a wayasi mini magalani pai, amma Haman ɗa a purma ahani sek gaini dûgû gaini siyer.

¹³ Haman a miɗiɗi gaini wala n'a za sini paŋ wiiɗi Zeres na munini gaiɗi marmakaini lai. Nagai e wiyini seŋ maini nɵa: Na ɓa Mardokai na ku kɵa wuzani na ɗa a ɗif na Yudiya ɗa aga ku nava rɗi n'amai midini kir kai, ni aga a rɗa amai muduku wuzani sek sek.

¹⁴ Kalaŋɗi ɗa a vada kai ɓa, ɗai na kɓarai na wiini pai e cûsi pini Haman ɓa a halaɗi witaw buri e hili ahaɗi Ester ɗa.