Ester 4 - Ɗû na sɗik na wiini Alaw

Mardokai a paya zinai tiɗi Ester par

¹ Won hlai na Mardokai a ɵina seŋ hanɗa, a ɓasa sapa na sini edi, a wa sapa zi tuwi sini, a poko alogodo miɗini, a tika pini aŋ tuwa tuwi zi gir war fuŋ n'abai gaini wulani amai.

² A hala haa mini magala na wiini pai ta, a niya aha kai, buri ɓa e niyi ahani pai gaini sapa zi tuwi siɗi kai.

³ Afti na wiini Lawan paŋ n'a nava gadai zi ɗiyi na wiini pai li ɗa, Yudiyakai na woni e ɗa war tuwi, war tikini sai, war ɵini marava lai, arbaɗi, viya e wi sapa zi tuwi siɗi, e fini arni alogodo lai.

⁴ Ɓulamai na piɗi Ester gaiɗi ɗaiɗi na kɓarai lai e kiɗisi labar hanɗa, hiiniɗi Ester a tuura viya gara, te ɵinini sapa wiini Mardokai kapai a waŋ sini, a mula sapa zi tuwi na sini edi, amma a dara kai.

⁵ Ester te yikasi Hatak, ktai arbaɗi ɗai na kɓarai na wiini pai n'a siŋɗi buri ɵeŋ, te ɵinaŋ sini Mardokai buri a siɗisi labar miɗini wala n'a za ɗa, a za ɵa buri maɗa?

⁶ Hatak a hala aŋ nava gaini Mardokai war hlai zi faada na wiini fuŋ n'abai n'a na wuzani mini magala na wiini pai ɗa.

⁷ Nɵa Mardokai a virnini wala n'a za ɗa paŋ, a miɗini gaini dala na Haman a firiya a vurgaŋ aŋ tar midiɗi Yudiyakai war godai na wiini pai won hlai n'e fiɗiɗi li edi ɗa.

⁸ A sitini letre na te muɗa miɗini fiɗiɗi n'edi, n'e ŋiti edi aha war kapital Sûz, kapai a kitiɗi wiiɗi Ester, te tala seŋ n'aŋ warɗi ɗa, na dama te hala aha sini pai te siiwaŋ buriɗi Yudiyakai na ɗaiɗi.

⁹ Hatak a kiɗisi labar na sini Mardokai par wiiɗi Ester.

¹⁰ Nɵa Ester te ɵina Hatak sini Mardokai pra, te miɗini maini nɵa:

¹¹ Ɗai zi sda na wiini pai gaiɗi ɗai na midini aftiɗi lawaŋai paŋ e siɗi edi gaglai ɓa koo asiya ɗi paŋ, ɓa wus zaw, muni ɗi a kiɗa a hala sini pai kadai nɵa kai, sai a na ɓa pai a yikaŋ li, zaw na ɓa a hiina li burini a yimitini amaraŋaini zi or ɗa li edi, na ɓa nɵa kai ɗa ɗif hanɗa e fiɗiŋ edi. Ta tiyana mu za na mefeŋ hu mu nava yiki tini pai par kai.

¹² Seŋ na Ester te muɗaŋ ɗa a co sini Mardokai.

¹³ Mardokai a wiyiɗi seŋ wiiɗi Ester maini nɵa: Ku hiina na ɓa tuku ku na warɗi pay, aga ku kurɗa kiiku ktai arbaɗi Yudiyakai par ɗi ɗa, a na ɵa kai;

¹⁴ Na ɓa hlai na mu sumusi won na ku dara ku muɗa kai ɗai ɗa, Yudiyakai aga e nivi zinai gaini pli n'edi war hlai zamai par, tuku gaiɗi dalam na wiini apuku ɗa aga ki bi. Mu suɗumu kai, ablaŋtaŋkai ku niya aha warɗi pai na ɗa kapai ku zina piyi war seŋ na maini hanɗa nɵa ɗi ɗa.

¹⁵ Ester te wiyini seŋ wiini Mardokai maini nɵa:

¹⁶ Hala diŋgiɗi Yudiyakai na war Sûz ɗa paŋ, ki tiki sai buriya, ki simi wala kai, ki ci kaalai haa mefeŋ hu girvudi gaini duvuk paŋ, ta gaiɗi ɓulamai na wiya ɗa aga mi tiki sai buri hanɗa lai. Asakal mefeŋ hanɗa par aga mu hala sini pai, koo na ɓa gadai zi ɗiyi a ɗiyaŋ ɵa kai tekeɗeɗi, na ɓa azi mri maa mu mra gai mri ɵa.

¹⁷ Mardokai a faka a hala, a za maini na Ester te miɗiŋni nɵa.