Ester 3 - Ɗû na sɗik na wiini Alaw

Seŋ n'a niya arbani Haman gaini Mardokai

¹ Asakalni wazagai hanɗa paŋ, pai Serkises a sini sda n'abai wiini Haman n'ahini Hamedata ɗif na war pinzibani Agag, a zaŋ aŋ ɗif n'abai, a tikaŋ midiɗi ŋarakai na wiini paŋ.

² Ɗai n'e ɗa zi sda ahani pai paŋ e hûrgû azumai wuzani, e ɵiɓi tiɗi wuzani lai maini na pai a muɗa miɗini nɵa, amma Mardokai a dara a hurga azumai wuzani kai, a ɵiɓa tini wuzani kaalai.

³ Ɗai zi sda na wiini pai n'e ɗa mini magala e miɗini wiini Mardokai: Ku ɵina pini gadai na pai a ɗiyaŋ kai buri maɗa?

⁴ Nagai e miɗini wiini Mardokai yuvai paŋ, amma ni a dara a ɵina seŋɗi kai. Nɵa e miɗini seŋ hanɗa wiini Haman ta, kapai e tili Mardokai ɗi haw aga a hina seŋ ni zaw a hala wuzani gaini ɗi ɗa, buri ni a miɗiɗi ɓa ni a ɗif na Yudiya.

⁵ Hlai na Haman a tala ɓa Mardokai a na hurga azumai wuzani kai, a na ɵiɓa tini wuzani kaalai, a za hiy ta.

⁶ Haman a firiya a zini meefeŋ wiini Mardokai kiini kai, buri a nava labar miɗini pinzibani Mardokai ɗa ya ɓa a ɗif na Yudiya, a firiya a vidiɗi edi midini afti na wiini pai Serkises ɗa par paŋ.

⁷ War buza n'ag'aŋ doogo pi sulu na Serkises aŋ warɗi pai ɗa, war tile n'avut na yikini ɓa Nisan, Haman a za wala zi vili miɗini mefeŋ gaini tile kapai a sɗa na sdani ɗa a kiɗa a za warni ɗa. Wala a yima tile n'ag'aŋ doogo pi sulu na yikini ɓa Adar.

Haman a zizina sini buri a vidiɗi Yudiyakai edi

⁸ Haman a miɗini wiini pai Serkises, jamus, pinziba ktai a na, aŋ gaini ɵiri edi arbani pinziba na zamai, midini aftiɗi lawaŋaiku paŋ, gadaini zi ɗiyi kiini lai, a kata gaini na wiiɗi ɗai na zamai ɗa kai, a ɵina pini gadai na wiini pai ɗa kaalai, na ɓa pai a hinaŋ li maini nɵa aga a zina pini kai.

⁹ Na ɓa seŋ hanɗa a tala arni pai pɗem ɗa a ɗo letre kapai e fiɗiɗi edi. Ta aga mu sa farai arzaŋ kilo dubu miya hu, kapai a mula amlai warni godai na wiini pai.

¹⁰ Nɵa pai a rɗa adoŋo na tini a sitini wiini Haman n'ahini Hamedata na war pinzibani Agag, n'a dara a ziɗi gir wiiɗi Yudiyakai.

¹¹ Pai a miɗini wiini Haman: dalaku a wiiku, ɗai e ɗi tuku na, za siɗi maini na ku dara nɵa.

¹² War mefeŋ n'ag'aŋ doogo pi hu na wiini tile n'avut, e yikiɗisi sekreterai na wiini pai kafa, e ɗû seŋ paŋ kal kal maini na Haman a na muɗaŋ war mini par nɵa, e ɵiniŋ wiiɗi Satrapai, wiiɗi lawaŋai, wiiɗi abakai na war pinziba paŋ lai, e ɗû war ɗû na wiini aftini Lawan paŋ, war meme na wiini aftini pai paŋ lai. Letre a ɗo war yikini pai Serkises gaini tampon na wiiɗi adoŋoni.

¹³ Asakal par e ɵini letre edi siɗi lawaŋai paŋ tiɗi ɗai n'e ki ɵeŋ witaw kapai e vidiɗi Yudiyakai edi, e fiɗiɗi, e hini ktai piɗi kai, na gawlakai gaiɗi na walakai, aliyagoi gaiɗi falakai war yuvai ktai; hanɗa a za war mefeŋ n'ag'aŋ doogo pi hu na wiini tile n'ag'aŋ doogo pi sulu na yikini ɓa Adar, kapai e virmi wazagaiɗi lai.

¹⁴ Ɗû n'aŋ warɗi letre ɗa aga a muɗa edi siɗi ɗai na pini Lawan paŋ maini gadai ɵa, aga a muɗa sini pinzibaɗi ɗai paŋ lai, kapai e simni gaini zizini burini mefeŋ n'a ɗiya.

¹⁵ Pini miɗi na wiini pai ɗa, ɗai n'e ki ɵeŋ witaw e niyisi anene gaini letre tar tar, e si labar hanɗa aha war kapital Sûz avut, ɗai paŋ hunai a yimiɗi, amma pai gaini Haman e simni ca e ci ɗa a sulɗi miɗi.