Ester 2 - Ɗû na sɗik na wiini AlawPai a tikiti Ester aŋ munini, a tikiti war balamɗi Vasti 1 Asakal hanɗa, won hlai na hiy na wiini pai Serkises a tika azumai li, miɗini a kɵa gaiɗi Vasti, gaini wala na te ziŋni, gaini seŋ n'a ɗiya buriɗi lai. 2 Ɗai n'e zi sda ahani pai e miɗi: Piyumusi ɓulamai n'e titimi maɵagai kai, n'e jûvi gara lai wiini pai. 3 A pɗem ɓa pai a mula ɗai miɗini provensekaini paŋ ca ca, kapai e tipiɗisi ɓulamai paŋ n'e titimi maɵagai kai, n'e jûvi gara lai aha war Kapital Suz, war dalam na falakai e simni woni, e siɗi war tini Hege ɗif na kɓur na wiini pai n'a giɗimiɗi falakai ɗa, e siɗi emel n'a zizina amur-si lai. 4 Ɓulmi na te yima li arni pai ɗa, te tika balamɗi Vasti. Seŋ hanɗa a yima agulni pai gara, a zaŋ maini na ɗaini e miɗiŋni ɵa. 5 Ɗif ktai na Yudiya a na fu aha war kapital suz yikini ɓa Mardokai ahini Yayir n'ahini Simey, n'ahini Kis a na war pinzibani Benyamin, 6 a ktai arbaɗi nagai na Nebugatnezar pai na Babilon a miliɗisi war Yeruzalem par mini gaw gaini Yoyakin pai na Yuda. 7 Ni a ɗif n'a wiliti Hadasa na yikiɗi zamai ɓa Ester amai ɗa, na t'ahini zigelni, epiɗi gaiɗi emiɗi e mri paŋ ca, Ester amur-siɗi a wa hinam, te juva gara lai. Asakalni mriɗi tamaiɗi, Mardokai a yimiti maiɗi ahini ɵa. 8 Won hlai na miɗi na wiini pai a wa edi li, e tipiɗisi ɓulamai aha war kapital Sûz sini Hege li lai, e viriti Ester, e kiti aha war dalamni pai, te sa aŋ gɗam war tini Hege ɗif zi giɗimi falakai. 9 Ester te tala arni Hege pɗemi gara, a firiyiti ta, a piyiɗisi emel zi girdi-si witaw tar, a zizina simiɗi, a siɗi ɓulamai n'e jivi gara n'ahani pai muguzak piɗi lai, asakal par a jûgûti gaiɗi ɓulamai na piɗi lai war hlai zamai n'a suwa marni paŋ na amlai warni dalam na falakai e simni woni. 10 Ester te siŋka pinzibaɗi kaalai, zigelɗi ktai kaalai buri Mardokai a ɗiliti buri te za hanɗa kai. 11 Mefeŋ paŋ Mardokai a gunasi mini hlai zi simni na wiiɗi falakai gunna gunna buri a tiliti Ester te na maɵa ɗa, e ziti na maɵa ɗa? 12 Ɓulamai n'e viriɗi li e zizini siɗi haa buza dam, e girdi emel mir siɗi tile ɵaara, tile ɵaara n'a hina e girdi emel gaini wazagai zi ɗûgûdi zi lûgûzi zamai zamai n'a zizina amur-siɗi falakai siɗi lai. Asakal par ɓulamai n'e vidi sda hanɗa li, e hili e nivi gaini pai, amma e hili ktaiya ktaiya. 13 Ɓulmi te hala amlai sini pai sek maini nɵa, wala paŋ na te dara te tikaŋ tiɗi aŋ hala gaini ahani pai ɗa a sa siɗi 14 Koskai te hala sini pai, gorof par te wayasi war hlai zamai zi gɗam na wiiɗi falakai n'a sa war tini Sasgaz ɗif na kɓur na wiini pai n'a giɗimiɗi falakaini n'edi par ca ca. Ɓulmi hanɗa te waya sini pai kir kai, sai na ɓa pai a firiyiti li, a yikitisi li gaini yikiɗi lai. 15 Hlai na feŋ na wiiɗi Ester n'ahini Abihayil na tawalni epini Mardokai a cosi li, na te zilba wala zamai kai sai wazagai na Hege ɗif na kɓur na wiini pai n'a giɗimiɗi falakai a siŋkinɗi tar. Ester te yima arɗi nagai n'e tiliti paŋ. 16 War buza n'ag'aŋ sulu muguzak na Serkises aŋ warɗi pai, war tile n'ag'aŋ n'e yikiŋ ɓa Tibet, e kitisi Ester ahani pai Serkises, e ɵitini amlai. 17 Pai a diriti Ester a sûwiɗi falakai na zamai ɗa paŋ, te tala arni pɗemi te sûwiɗi ɓulamai na zamai ɗa paŋ, a fiɗiɗi kadamul zi pai midiɗi, a ziti aŋ munini n'amlai mini war balamɗi Vasti. 18 Asakal hanɗa, pai a ziti fet n'amai, fet hanɗa a ziti buriɗi Ester, a yikiɗisi ŋarakaini gaiɗi ɗaini zi sda paŋ miɗi, a fuɗa tar na war yuvai ktai edi su, miɗini provens paŋ, a ɓurwa wazagai wiiɗi ɗai war gdaŋ na wiiɗi pai. 19 Won hlai n'e firiyi e mili ɓulamai zamai azi n'ag'aŋ sulu ɗa, Mardokai a na fu a za sda ahani pai, war mefeŋ ni ɗa, a na fu anene mini magala dam. 20 Ester ɗa te siŋka pinzibaɗi kaalai, zigelɗi ktai kaalai maini na Mardokai a gititi nɵa. Ester te za pini miɗi na wiini Mardokai kal kal maini na te nasi ka gaini nɵa. Mardokai a kurɗa pai mini mri par 21 Mefeŋ ktai, hlai na Mardokai a na anene mini magalani pai dam, Bigtan gaini Teres ɗai na kɓarai na wiini pai n'e giɗimi mini magala, war hiy e rgi miɗi buri e fiɗi pai Serkises edi. 22 Amma Mardokai a ɵina seŋ hanɗa, a miɗiŋɗi wiiɗi Ester munini pai n'amlai mini, na te hala te miɗini seŋ hanɗa wiini pai ɓa a miɗiŋɗi a Mardokai. 23 Ɗai e fifiki ezini seŋ hanɗa, e niviŋ ɓa a jre, ɗai na sulu hanɗa e rgiɗi amai sini luwuŋ, seŋ hanɗa e ɗûŋ warni maktuɓ na wiini labar na midiɗi pay wuzani arni pai. |
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
Bible Society of Cameroon