Esaya 4 - Ɗû na sɗik na wiini Alaw

¹ War mefeŋ ni ɗa, falakai muguzak aga e yimi ɗif ktai, aga e miɗini ɓa: Tiyi aga mi piyi simiyi kiiyi Mi piyi sapa siyi kiiyi lai Tikiyi siyer na midiyi edi ɗaw mi firiyi ɓa ku yika aŋ mofayi suwi.

Ɗai n'e hini karɗi war Yeruzalem

² War mefeŋ ni ɗa, EPIƊ-ƊAI aga a diya wala ktai amai midini afti, na tala pɗem, na juv gara lai. Nagai n'aga e hini karɗi aha warɗi Izrayel ɗa, aga e firiyi, aga e nivi kol lai, burini wazagai n'aga a za midini aftiɗi ɗa.

³ Nɵa, nagai n'e hini ka aha war Siyon, gaiɗi nagai n'e hini ka aha war Yeruzalem, aga e yikiɗi ɓa ɗai na sɗik, Hanɗa e ɗi nagai na yikiɗi a ɗo war maktuɓ na wiini, aŋ simni karɗi aha war Yeruzalem.

⁴ Asakal na EPIƊ-ƊAI a ma hihir na wiiɗi falakai na Siyon edi li, n'a ma fel n'aha warɗi Yeruzalem edi li lai, gaini smer na wiini jre, gaini na wiini ɓilki n'edi lai,

⁵ Amai midiɗi huwuŋ Siyon paŋ, miɗini diŋgi n'abakai paŋ lai EPIƊ-ƊAI aga a yima ɗugul gaini agiyiŋ midiɗi girvudi, duvuk ɗa, a za gaglai z'afu lai. Wazagai na juvai paŋ ɗa, wala aga a pa miɗini duk duk

⁶ Aga a za gumu ktai aŋ za seze buri futi na te ya girvudi, aŋ ŋûyi warni wuzani berber n'abai gaini faŋ n'a ɵa abai ɗa lai.