Esaya 2 - Ɗû na sɗik na wiini Alaw

¹ Seŋ na muɗa sin Isai, n'ahini Amots, buriɗi Yuda gaiɗi Yeruzalem, war siŋki.

Pinzibaɗi ɗai paŋ aga e diŋgisi aha war Yeruzalem

² Wuzamu sek, mefeŋ ktai ɗa, huwuŋ na tempel na wiini EPIƊ-ƊAI aŋ midiɗi ɗa aga te za aŋ huwuŋ n'amai midini huwaŋai paŋ, aga te suwa boŋorai amai paŋ lai. Pinzibaɗi ɗai paŋ aga e tipisi midiɗi sek.

³ Ɗai viya aga e hili woni, aga e miɗi: Hilisi, niyumu amai midiɗi huwuŋ na wiini EPIƊ-ƊAI, Amai warni tempel na wiini Alaw na wiini Yakob. Ni aga a hitirumu futini, aga mu piyumu war futini n'agogoi Buri hitrai, aga a halasi a Siyon par, seŋ na wiini EPIƊ-ƊAI ɗa a Yeruzalem par lai.

⁴ Aga a ziti sariya, arbaɗi pinzibaɗi ɗai, Aga a tika arbaɗi ɗai viya azumai lai. Gaini kaɵkar na wiiɗi, aga e giɵi hidik, gaini kawakai na wiiɗi aga e zizini maharam. Pinziba n'aga a rɗa kaɵkar midini pinziba zamai aŋ kir kai. Ɗif aga hitra sini mini hatam kir kaalai.

⁵ Hilisi, pinzibani Yakob. Piyumu war gaglai na wiini EPIƊ-ƊAI.

Mefeŋ na wiini EPIƊ-ƊAI, a mefeŋ zi sariya

⁶ EPIƊ-ƊAI, Ku hiniɗi pinzini Yakob, na ɗaiku edi mak, Buri ɓa e tirɗi edi pin sda na wiiɗi ɗai zi siɗi wuti na piɗi futi na dawai-par, gaini sda na wiiɗi ɗai n'e tili sin wazagai zi rgi n'arbani hlai n'amai, maiɗi Filistrekai nɵa. Buri e ɵini miɗi marɗi gaini pinziba n'edi par gara.

⁷ Aftini a va gaini arzaŋ, gaini or lai. Derni ɗa a pɵa kai. A va gaini plasai, saretaini zi gaw a pɵa kaalai.

⁸ Aftini a va gaini alawai na jrekai kai; e hûrgû azumai wuzani wazagai n'e ziŋ gaini tiɗi, wuzani wazagai n'ali tiɗi a zaŋ ɗa.

⁹ Ɗai murɗakai, e tiki siyer ɗaw, e wiyi siɗi azumai marwai, ku hiniɗi meefeŋɗi kai.

¹⁰ Ŋuyi siki arbani huwaŋai, niyi azumai pini afti, wuzani suwar na wiini EPIƊ-ƊAI gaini ŋiliɗi abai na wiini.

¹¹ Kûlûni-si na wiiɗi ɗai ɗa aga a hosa azumai, Abai na wiiɗi ɗai ɗa aga te homka azumai, War mefeŋ ni ɗa, aga a nafa kol a EPIƊ-ƊAI ktai pal.

¹² Buri hanɗa a mefeŋ na wiini EPIƊ-ƊAI zi spak paŋ Buri aga a faka amai sini wazagai zi kol paŋ, n'a siɗa sini ba a suwa paŋ, n'a zila sini amai lai, buri a hosaŋ azumai.

¹³ Aga a faka amai sini luwuŋ Sedre na Liban, n'amai mogo kai, gaini luwuŋ Sene na Basaŋ paŋ lai.

¹⁴ Aga a faka amai sini huwaŋai na mogo kai, gaini boŋorai n'amai mogo kai lai.

¹⁵ Aga a faka amai sini poriyo na mogo kai, gaini ɵaga n'e ɵiŋ amai sin hlai lai.

¹⁶ Aga a faka amai sini hulamai n'abakai na Tarsis, gaini hulamai n'abakai na juvai paŋ.

¹⁷ Kûlûni-si na wiiɗi ɗai ɗa aga a hosa zumai, Abai na wiiɗi ɗai ɗa aga te homka azumai, War mefeŋ ni ɗa, aga a nafa kol ɗa a EPIƊ-ƊAI ktai pal.

¹⁸ Alawai na jrekai kai paŋ aga a vada edi.

¹⁹ Ŋuyi siki war waŋ na sini huwaŋai, azumai war hulumni afti, burini hunai na wuzani EPIƊ-ƊAI, gaini ŋiliɗi abai na wiini, Won hlai n'aga a fakasi amai aŋ mula hunai pini afti ɗa.

²⁰ War mefeŋ ni ɗa, ɗai aga e pûkû alawaiɗi na jrekai kai zi arzaŋ gaini zi or ɗa edi wiini kusum gaini kirfe-kirfe alawai n'e rigiŋ buri e hûrgû azumai wuzani.

²¹ Ɗai aga e niyi war waŋ na sini huwaŋai gaini baŋa na ɓasa sini huwaŋai lai, burini hunai na wuzani EPIƊ-ƊAI, gaiɗi ŋili na wiiɗi abai na wiini Won hlai n'aga a fakasi amai aŋ mula hunai pini afti ɗa.

²² Hiniɗi ɗai murɗakai mak: suŋfaɗi a smer kadai meere, E nivi wala ktai kai sam.