Efesekai 6 - Ɗû na sɗik na wiini Alaw

Aliyagoi gaiɗi tamai

¹ Tiki aliyagoi ki gidi piɗi tamaiki war Epiɗ-ɗai, buri ɓa hanɗa woɗi futini.

² Sini hormo wiini apuku gaiɗi amuku. - Hanɗa a gadai n'avut na gaini ɵinini ha pini ɗa-

³ ɵinini-ha hanɗa ɓa: kapai ku nava pɗem, ku nava suŋfa na mogo midini afti.

⁴ Tiki tamai na maɵagai, ki ɓilkiɗi agulɗi aliki kai, amma aga ki wûliɗi amai war hitrai gaini gadai na wiini Epiɗ-ɗai.

Bege gaini epin-gezani

⁵ Tiki ɗai zi sda, ki gidi piɗi abakaiki na war neŋ-si war hormo gaini jiriyi, war agul zi hûsi maini pin Kristu nɵa.

⁶ Hanɗa aga ki ziŋ pin arɗi kai, maini na ɓa ki ziŋ na ɗa pin juv n'arɗi ɗai nza kai, amma maiɗi ɗai zi sɗa na wiini Kristu, n'e zi pin dirini Alaw gaini agulɗi paŋ.

⁷ Ki zi sɗa gaiɗi agulki paŋ, maiɗi ɗai zi sɗa na wiiɗi ɗai nɵa kai, amma na wiini Epiɗ-ɗai.

⁸ Buri tiki ki siɗi lai ɓa, asiya asiya ɗi paŋ koo ɓa a bege zaw a kempe ɗi sɗa na pɗem n'a zaŋ paŋ ɗa, Epiɗ-ɗai aga a virgiŋni.

⁹ Tiki abakaiɗi ɗai zi sda, ki zi siɗi ɗaiki zi sɗa nɵa lai. Ki miɗiɗi seŋ na gadaŋ kai, buri ki siɗi ya ɓa, Epin-gezaɗi nagai lai, na wiiki lai a na amai war fuŋ-n'Alaw, ni a ɓurwa arɗi ɗai kai.

Wazagai zi gaw na wiini Alaw

¹⁰ Buri n'a hina paŋ ɗa, ki bindi gdaŋai war Epiɗ-ɗai, war spakni n'abai ɗa lai.

¹¹ Ki wi wazagai zi gaw na wiini Alaw paŋ siki, kapai ki siɗi aŋ ɗiyi wuzani yel na wiini mat pa.

¹² Buri mu hutumumu na ɗa sin fel gaini neŋ-si kai, amma siɗi paakai n'arbani hlai n'amai, gaiɗi zi spak gaiɗi n'abakai n'e ŋi na war gegeŋ hanɗa, sini seze na maafanai n'arbani hlai n'amai.

¹³ Nɵa ɗa, ki mili wazagai zi gaw na wiini Alaw paŋ siki, kapai ki siɗi aŋ ɗiyi min hatam min mefeŋ na meefeŋ, kapai won hlai na ki vidi li paŋ ɗa, ki tili siki gdaŋ aŋ warki ɗai.

¹⁴ Nkam, ɗiyi pɗem, ki niggi wuzaki gaini jre, ki wi safaya zi gaw na wiini jre-ɗikat paɵaki,

¹⁵ kurfuk na wiini ɓikini labar na pɗem na wiini ɵeɗ ɗa, ki wiŋ eziki maini harabak nɵa,

¹⁶ War hlai paŋ ki mili gamar na wiini yimi tiki, gaini hanɗa ki siɗi aŋ ciki ɓaraw zi masnaw na wiini na meefeŋ edi.

¹⁷ Ki piti cuki zi gaw na wiini kûri midiki, ki tiki kaɵkar na wiini seze lai, hanɗa a seŋ n'Alaw.

¹⁸ Ki siiwi kureɗ war seze, siiwaki paŋ gaini tuwiki na sin Alaw paŋ nɵa lai. Buri hanɗa, ki simni karki, ki siiwi kûreɗ-kûreɗ, buriɗi na sɗik paŋ;

¹⁹ buriya ta lai, kapai won hlai na mu mala ma li amai aŋ muɗa edi miɗini wala zi ŋoyai n'aŋ war na pɗem gaini kurfuk ɗa, seŋ a sasi war ma.

²⁰ Ta mu ɵeŋ burini labar na pɗem, amma burini hanɗa m'aŋ war jaɓ, ki siiwi kapai mu muɗa edi miɗini ɗa gaini kurfuk, maini n'a juva ɓa mu muɗa ɗa nɵa.

Ɵiɓini wuti n'asakal

²¹ Kapai tiki lai, ki siɗi mu na maɵa ɗa, mu za na ɗa a maɗa lai ɗa, Tikikus n'a tawal zi diri war Epiɗ-ɗai, a ɵeŋ z'amana lai, aga a miɗiki midini hanɗa paŋ.

²² Mu ɵinaŋɗi siki na ɗa ɓa kapai ki siɗi na siyi ɗa, kapai a ski arai zi pi lai.

²³ Alaw Api gaini Epiɗ-ɗaimu Yesu Krsitu e siɗi ɵeɗ gaini diri gaini yum lai wiiɗi tawalakai.

²⁴ Nagai paŋ n'e diri Epiɗ-ɗaimu Yesu Kristu war diri n'a ɓilka edi kai ɗa, yum na wiini Alaw a sumna gaiɗi.