Efesekai 5 - Ɗû na sɗik na wiini Alaw

¹ Buri nɵa, ki tili sin Alaw, maiɗi ali zi diri gara nɵa.

² Ki piyi war diri, maini na Kristu a durumu, haa a sa sini dama edi burimu aŋ ɓaka na gaini fel warni kai, aŋ wala zi ɓaka na gai futini lai sin Alaw ɗa nɵa.

³ Maini n'a juva siɗi na sɗik nɵa, a pɗem ɓa maɵara gaini pinzibani hihir paŋ gaini gorom paŋ lai, a ɵina arbaki kai.

⁴ Wazagai zi ɓilki hinini ɗif, miɗi na juva kai, zi vilmi, a juva arbaki kai, n'a juva ɗa a sɗa na pɗamai.

⁵ Buri ɓa, aga ki yimiŋ midiki pɗem ɓa nagai n'e zi maɵara, n'e zi wazagai na haharai, zaw zi gorom, a dara muɗa: hûrgû n'azumai wuzani alawai zi rgi ɗa, -aga e niviti pai na wiini Kristu gaini Alaw aŋ bulum kai zaŋ.

Aɗipar ki ɗi gegeŋ, amma tiyana ki ɗi gaglai

⁶ Ki hini ɗif a wiliki edi gaini seŋ zi miɗi n'a nafa kai ɗa kai, buri ɓa hiy na wiini Alaw a halasi midiɗi ali si yimi kai na ɗa pin hanɗa.

⁷ Buri nɵa, ki hini wala ktai a tipiki gaiɗi kai zaŋ.

⁸ Buri a ɗipar ki ɗi gegeŋ, amma tiyana ki ɗi gaglai war Epiɗ-ɗai. Piyi maiɗi alini gaglai nɵa.

⁹ Buri alini gaglai a na war sɗa na pɗamai paŋ, na jre-ɗikat paŋ, gaini na jre paŋ lai.

¹⁰ Aga ki zi ɗa a wazagai n'Alaw a firiyaŋ ɗa.

¹¹ Ki tipi war sɗa zi muɗaŋ na wiini gegeŋ ɗa kai, amma siŋkiŋ edi arɗi ɗai papɗak.

¹² Buri ɓa wazagai n'e ɗa ziŋ war ŋoyai ɗa, a tala siyer gara aŋ muɗaŋ edi ɗa.

¹³ Amma wazagai hanɗa paŋ hlai n'a siŋka li edi papɗak ɗa, a bunda a wala n'arni ɗif sini ca, burini gaglai.

¹⁴ Buri ɓa wala n'a siŋka edi arɗi ɗai papɗak paŋ a gaglai. Buri nɵa ɗû a muɗa: ɵiya amai tuku na ku na kala weseŋ, faka amai arbaɗi zi mri par, Kristu aga a ɵa wuzaku gaini gaglaini ɗa.

¹⁵ Buri nɵa aga ki tiki hangalki pɗem sin payaiki n'aga ki piyi ɗa: aga ki piyi maiɗi zi duulakai nɵa kai, amma maiɗi na yalakai nɵa,

¹⁶ Mefeŋ n'a hina wuzaki sek na ɗa, aga ki zi woni ɗa a wazagai na pɗamai, buri mefeŋ na mu ɗumu warni tiyana ɗa a mefeŋ na meefeŋ.

¹⁷ Buri nɵa aga ki zi siki maiɗi ɗai zi duulakai nɵa kai, amma aga ki piyi aŋ siɗi dirini Epiɗ-ɗai a na maɵa ɗa.

¹⁸ Ki ciini gaini vin ɗa kai, a kasi payai zi vilmi, amma hini sezeki a va gaini seze.

¹⁹ Ki miɗi arbaɗi marki gaini yama, gaini yama zi kûli, gaini yama zi seze lai, ki zini yama zi kol, zi kûli Epiɗ-ɗai gaiɗi agulki paŋ.

²⁰ War wazagai paŋ ki zi tee kûreɗ-kûreɗ sin ni n'a Alaw, a Api lai war yikini Epiɗ-ɗaimu Yesu Kristu.

Maɵagai gaiɗi falakai

²¹ Ki gidi piɗi marki war hormo na sin Kristu.

²² Falakai aga e zi siɗi maɵagaiɗi maini nɵa, maini pin Epiɗ-ɗai ɗa nɵa.

²³ Buri ɓa wus ɗa a humokɗi muni maini na Kristu a humokni tipi, n'a sini ɗa nɵa. Ni a ɗif zi kûri na wiini sini.

²⁴ War wazagai paŋ falakai aga e ɵini piɗi maɵagaiɗi, maini na tipi a ɵina pin Kristu ɗa nɵa.

²⁵ Tiki maɵagai, diriɗi falakaiki, maini na Kristu a dara tipi ɗa nɵa: a sa sini dama edi burini lai.

²⁶ Kapai a zaŋ edi sɗik, hilu lai, warni mi na gaini yem gaini seŋ lai.

²⁷ Kapai a ɗiya tipi hanɗa wuzani arni juv, gaini didiɓi kai, sini gai rumki kai, gaini wala ktai na meefeŋ sini kaalai, amma sɗik gaini tirki sini kai.

²⁸ Maɵagai aga e diriɗi falakaiɗi maini nɵa lai, maini siɗi dama nɵa. Ni n'a diriti munini, a dara ɗa a sini dama.

²⁹ Buri ɓa ɗif n'a bula gaw sini sini dama aŋ kai, amma a sini simi a zizinaŋ lai maini na Kristu a zaŋ gaini tipi ɗa nɵa.

³⁰ Buri tumu mu ɗumu ali-tini- sini.

³¹ Buri hanɗa wus aga a hina epini gaiɗi emini edi, a tapa gaiɗi munini, nagai na sulu hanɗa e bindi aŋ si ktai.

³² Wala zi hiila n'abai aŋ war seŋ hanɗa. Mu muɗaŋ na ɗa burini Kristu gaini tipi.

³³ Gai hanɗa paŋ ɗa, a pɗem ɓa asiya asiya arbaki aga a diriti munini maini sini dama nɵa, muni ɗe te sini hormo wiini mofaɗi lai.