Efesekai 4 - Ɗû na sɗik na wiini Alaw

Rga sin Kristu amai war tipi ktai, war diri

¹ Nɵa mu siiwiki, ta ɗif zi daŋgai war Epiɗ-ɗai, aŋ piyi payai n'a kata pin yiki na ki niviŋ,

² war hûsi, war hangal war ziyini seŋ na gaini hangal, ki libi marki arbaɗi marki war diri,

³ ki fiɗi was aŋ giɗimi simni na ktai war seze, war simni na ɵeɗ n'arbaɗi marki.

⁴ Si a ktai, Seze a ktai lai, maini n'Alaw a yikikisi sini biyi-na-pin-ɵeɗ na ktai na ki yikisi burini nɵa;

⁵ Epiɗ-ɗai a ktai, yimi ɗa a ktai, baptisme ɗa a ktai,

⁶ Alaw ɗa a ktai, n'a Epiɗ-ɗai paŋ, a na amai midiɗi ɗai paŋ, a na warɗi ɗai paŋ lai.

⁷ Amma sin asiya asiya paŋ arbamu, yum a sa, piɗi daram zi like na Kristu a ŋa warɗi ɗa.

⁸ Maini na ɗû a muɗa ɗa nɵa: Won hlai n'a niya amai midini hlai n'amai mogo, a yimasi bagakai mini gaw par, a sa like wiiɗi ɗai lai.

⁹ Miɗi na ɓa a hala amai ɗa, a dara a muɗa maɵa ɗa? A dara a muɗa na ɗa ɓa, haa azumai war hlai n'azumai, a dara a muɗa midini afti lai kai ɗi?

¹⁰ Nn'a niyasi azumai, a ni n'a hala haa amai midini hlai n'amai par ɗa lai kapai a va hlai paŋ.

¹¹ Hanɗa a ni n'a suɗumo na zamai aŋ apostelai, na zamai aŋ ɗai na min Alaw, na zamai aŋ ɗai n'e ɓiki labar na pɗem, na zamai aŋ zi giɗimi, zi hitri lai;

¹² kapai e hitriɗi na sɗik midini sda zi ɵeŋ, buri rɗi n'amai na wiini sini Kristu,

¹³ haa tumu paŋ mu gumu sin tipi na ktai na war yimi, gaini siɗi na wiini Ahini Alaw lai, tumu aga mu bundumu aŋ ɗai na gaini wili amai ca, gaini kiti amai war wûlini Kristu;

¹⁴ nɵa aga mu hinumu aŋ aliyagoi na mayaw a kiciwiiɗi, na hitrai a miliɗi na zaw na zaw, na ɗai e dûûliɗi, e miliɗi edi gaini yel zamai zamai ɗa kai.

¹⁵ Amma na ɓa mu muɗumo jre war diri, aga mu wulumu amai war wazagai paŋ, war ni n'a a humok, a dara muɗa: Kristu.

¹⁶ Gaini ni, ali-tini-si paŋ aŋ gaini niggi sini marni, gaini tipi sini marni lai. Alini-tini-si ɗa aŋ gaini gaɵ arbani ta ta, kapai a tapa si ɗa amai. Won hlai n'alini-tini-si paŋ a za sda ɗa, si na gaini abaini ɗa a wula amai, a rga amai kiini war diri lai.

Paiyai na hehe war Kristu

¹⁷ Hanɗa a wala na mu dara mu muɗaŋ, mu muɗaŋ pra war Epiɗ-ɗai, aga ki piyi maiɗi ɗai na kadai n'e piyi pin hiini na digai ɗa ɵa kai, war hiiniɗi na kadai nɵa kai.

¹⁸ Hiiniɗi ɗa aŋ gaini ŋulvi, nagai e ɗi morkokoi buri payai na war Alaw, burini siɗi kai n'aŋ warɗi, buri ɓa agulɗi aŋ gaini diŋri;

¹⁹ hiini na pɗem midiɗi kir kai ɗa e si siɗi edi war zini maɵara, haa nagai ezi wazagai na haharai paŋ gorom gorom.

²⁰ Amma tiki ɗa, ki nivi hitri miɗini Kristu ɗa ɵa kai,

²¹ Na ɓa ki ɵini ɗa a mini ni mal mal ɗa, na ɓa e hitiriki miɗini ni mal mal, ɓa jre ɗa a na war Yesu ɵa ɗa,

²² tiki aga ki hini ɗif na wel n'aŋ warki ɗa edi, n'a kata gaini payaiki na ɗipar, n'a ɓulka edi pin diri zi rhai ɗa.

²³ Tiki aga ki bindi hahakai war hiiniki gaini Seze-sɗik,

²⁴ Aga ki wi ɗif na hehe siki, n'a rga pin dirini Alaw, war jre, gaini sɗik maini n'a za war jre ɗa nɵa.

²⁵ Nɵa, ki hini eles edi, asiya asiya paŋ a miɗini wiini maini ɗa a jre, buri tumu mu ɗumu ali-tini-siɗi marmu.

²⁶ Na ɓa ki zi li hiy ɗa, ki zi tuwur kai, a juva ɓa futi te nawa sek ɗa hiyki a vada vat.

²⁷ Ki hinini hlai na wiini mat kai.

²⁸ Ɗif zi mihill ɗa aga a hala wala kir kai, aga a fuɗa was aŋ za sda gaini tini dama, kapai a nava wala aŋ zina pini ni na hajani a na ɗa lai.

²⁹ Ki hini seŋ na meefeŋ a niyasi edi war miki par kai, amma na ɓa a sɗa aŋ za ɗa, a niyasi edi war miki par a seŋ n'kiɗa a rga wala amai, n'a za pɗem wiiɗi nagai n'e ɵiniŋ ɗa lai.

³⁰ Ki zi wala na Seze-sɗik na wiini Alaw a kwima burini kai, seze n'Alaw a tikaŋ siki aŋ tampoŋ.

³¹ Ki hini wala zi limi war, gaini suwar garni hiy, gaini ɗuwal gaini tirki lai a ɵina arbaki kai, gaini meefeŋ paŋ lai.

³² Ki zi pɗem siɗi marki arbaɗi marki, ki hiini haw midiɗi marki, ki si ni arbaɗi marki dama, maini n'Alaw war Kristu a siki ni wiiki tiki ɗa nɵa.