Efesekai 2 - Ɗû na sɗik na wiini Alaw

War mri par sin suŋfa

¹ Tiki ɗa, ki ɗisi ka gaini mri, burini meefeŋki, burini tuwurki,

² tiki, a ɗipar ki si siki edi warni pin pai na wiiɗi yai hanɗa, pini abai n'arbani smer, seze n'a na za sda tiyana warɗi ali zi ɵini gat kai.

³ Tumu lai, mu ɗumusi ka war pɵaɗi ɗa, mu piyumu pin diri na wiini neŋ-sumu, mu zumu pin diri na wiini neŋ-si gaini na wiini hiinimu ɗa lai, mu ɗumu ka mu piyumu ɗa a hiy maiɗi nagai na zamai nɵa ɗa ɵa lai.

⁴ Amma yum na wiini Alaw ɗa abai, pin dirini n'abai n'a durumu gaini ɗa,

⁵ tumu na mu ɗumu ka gaini mri pin meefeŋ na wiimu ɗa, a bundumu karmu garni Kristu, - tiki ki nivi kûri pin yum.

⁶ A ɵiyumusi amai aŋ bonu gaini ni, a sumu hlai zi simni amai war hlai n'amai aŋ bonu gaini ni lai.

⁷ Kapai wuzamu sek ɗa a sɗa aŋ siŋkumu miɗini yum n'abai gara, war pɗemni n'a zaŋ sumu gaini Yesu Kristu.

⁸ Buri tiki ki kûri ɗa pin yum, burini yimi, hanɗa a za siki tiki par kai, a like na wiini Alaw.

⁹ Hanɗa a na burini sɗa kai, kapai ɗif a sɗa aŋ kola sini kai.

¹⁰ Buri ɓa tumu mu ɗumu sɗa na wiini Alaw, mu rgumu war Yesu Kristu, burini sɗa na pɗamai n'Alaw a zizinaŋsi wuzani hlai, kapai tumu mu sumu sumu warni.

Yudiyakai lai, pinziba na zamai ɗa lai e tipi ktai war Kristu

¹¹ Hini midiki a kɵa, tiki na ki ɗi ka a ɗipar pin neŋ-si ɗa, ki ɗi pinzibaɗi Yudiyakai kai, nagai n'e ɵi gurgle ɗa, e yikiki ɓa ki ɗi zi ɵi gurgle kai, paŋ ktai nagai e ɵiŋ ɗa war neŋ-si, e ɵiŋɗi ɗa e ɗi ɗai lai.

¹² Tiki, ki ɗi ka war mefeŋ ni ɗa, Kristu ɗa a wiiki kai, futi buriki buri ki simni aha warɗi Izrayel kai, ki ɗi morkokoini bonu na wiini ɵinini-ha, biyi-na-pin-ɵeɗ na wiiki aŋ kai, Alaw na wiiki aŋ kaalai warɗi yai hanɗa.

¹³ Amma tiyana war Yesu Kristu, tiki na ɗipar ki ɗisi ka gaigai, ki bindisi gobi gaini war fel na wiini Kristu.

¹⁴ Buri ɓa ni ɗa a ɵeɗ na wiimu, ni n'a tipiɗi na sulu amai war ktai, a haɗa ɵaga zi ɓraw gaini zi gaw ɗa azumai, war sini,

¹⁵ A bunda gadai gaini seŋ zi gadai na pini ɗa, gaini deni n'aŋ gai ɗiyi ta ta ɗa edi aŋ wala kadai, kapai warni ni gaiɗi na sulu ɗa, a rga ɗif na hehe ktai, a kasi ɵeɗ lai,

¹⁶ kapai a toya arbaɗi na sulu war si ktai gaini Alaw gaini dagra, a fuɗa gaw ɗa edi gaini lai.

¹⁷ A halasi a ɓaka miɗini ɵeɗ, maini labar na pɗem nɵa, siki tiki na ki ɗisi ka gaigai, gaiki tiki na ki ɗi ka gobi lai.

¹⁸ Buri nɵa, gaini ni, tumu paŋ mu kuɗumu aŋ nuvumu futi sin Api, war Seze ni ktai.

¹⁹ Buri nɵa, tiki ki ɗi morkokoi kir kai, ki ɗi ɗai n'e birgiɗi edi kir kaalai, morkokɵi kir kai, amma tiki ki ɗi ɗai na midini afti ktai, gaiɗi ɗai na wiini Alaw paŋ, ki ɗi ɗai n'ahani Alaw ktai lai.

²⁰ Tiki ki rgi amai midini ezini dalam zi tûûri, na e ɗi apostelai gaiɗi ɗai na min Alaw, Yesu Kristu gaini midini a ahi-fuŋ na war koŋni dalam ɗa lai.

²¹ Dalam n'a rga li gaini futini paŋ ɗa, a wula, kapai a za aŋ tempel na sɗik na war Epiɗ-ɗai.

²² War ni lai, tiki ki rgi amai aŋ bonu kapai ki zi aŋ hlai zi simni na wiini Alaw war Seze.