Efesekai 1 - Ɗû na sɗik na wiini Alaw

Ɵiɓini wuti

¹ Pawlus apostel na wiini Yesu Kristu pin diri na wiini Alaw, siɗi nagai na Sɗik na war Efesus, n'e yimi war Kristu Yesu.

² Alaw Apumu gaini Epiɗ-ɗaimu Yesu Kristu e siki yum gaini ɵeɗ lai.

Ɓiki na gaini vi amai ta war Kristu

³ Kol sin Alaw n'Epini Epiɗ-ɗaimu Yesu Kristu, n'a ɓukumu gaini wazagai na pɗamai na war Seze na war hlai n'amai ɗa paŋ war Kristu.

⁴ War Ni, a vurumusi edi wuzani piɗi yai zi tiki par, kapai mu zumu aŋ ɗai na sɗik, na meefeŋ siɗi kaalai wuzani arni, war diri na wiini ɗa.

⁵ A vurumusi edi wuzani hlai par, gaini Kristu Yesu, aŋ bundumu aŋ ali zi wii na wiini pin diri na pɗem n'a rgaŋ warni.

⁶ kapai a sa kol sin yumni n'abai n'a zaŋ sumu, gaini ahini zi diri gara.

⁷ War ni, tumu mu nuvumu pli n'edi gaini felni, mu nuvumu ni burini meefeŋ na wiimu pin yumni n'abai gara.

⁸ N'a saŋ sumu abai, war yel gaini sɗik paŋ lai.

⁹ A suŋkumu wazagai n'aŋ gaini ŋûyi war diri ni ɗa, gaini plaŋ na pɗem n'a rgaŋ warni aŋ raŋ gaini.

¹⁰ Kapai a vaŋ amai won hlai na sartini a za li ɗa, aŋ tapa paŋ amai war Kristu, wazagai na war hlai n'amai, wazagai na midiɗi yai lai.

¹¹ War ni, tumu mu nuvumu bulum na wiimu lai, tumu na mu vurumusi edi wuzani hlai par, pin plaŋ na wiini ni n'a za wazagai paŋ pin dirini n'a rgaŋ warni.

¹² Aŋ sumu kol wiiɗi abaini, tumu na haa a ɗipar mu ɗuma biyumu pin ɵeɗ war Kristu.

¹³ War ni, tiki lai, asakal na ki ɵini seŋ na jre ya, labar na pɗem na wiini kûri na wiiki, war ni, tiki ki yimi, tiki ki nivi tampoŋ na wiini Seze-sɗik, n'Alaw a za ɵini ha miɗini midiki lai.

¹⁴ Hanɗa a wala zi araŋ, na wiini bulum na wiimu, burini pli n'edi na wiini wala n'a zaŋ aŋ wiini ɗa, aŋ sa kol siɗi abaini.

Pawlus a siiwa buriɗi ɗaini Kristu

¹⁵ Buri nɵa, ta lai, won hlai na mu ɵina labarni yimi na wiiki na war Epiɗ-ɗai Yesu, gaini diriki na buriɗi ɗaiŋa wiini paŋ lai ɗa,

¹⁶ mu na sini tese wiini Alaw buriki kûreɗ-kûreɗ, mada a wula gaiki war siiwiŋa kai,

¹⁷ kapai Alaw na wiini Epiɗ-ɗaimu Yesu Kristu, Api n'abai ɗa a siki seze zi yel gaini seze zi siŋki wala na war ŋoyai, kapai a siŋkiŋki edi arki,

¹⁸ a mala hiiniki edi, kapai ki siɗi ɓa biyi-na-pin-ɵeɗ n'a yikikisi sini ɗa a na maɵa ɗa? Kapai ki siɗi abaiɗi abai na wiini bulum na wiini, n'a na buriɗi ɗai na wiini ɗa lai.

¹⁹ kapai ki siɗi ɓa abaini spakni n'abai a na maɵa ta ɗa? Pin sɗa n'abai n'a na zaŋ war spakni.

²⁰ A siŋka spak hanɗa edi war Kristu, won hlai n'a ɵiyaŋsi amai arbaɗi zi mri par, a tikaŋ war hlai zi hormo, na wiini, amai war hlai n'amai,

²¹ a tikaŋ amai midiɗi abai paŋ, midiɗi pai paŋ, midin spak paŋ, miɗini ŋiriya paŋ, gaini yiki paŋ n'a na yika warɗi yai hanɗa kiini kai, amma warɗi yai na te na gizi ɗa lai.

²² A mula wazagai paŋ azumai pin ezini, a saŋ aŋ humok amai midini wazagai paŋ, wiini tipi.

²³ Tipi hanɗa a sini, a vi n'amai na wiini ni, n'a va wazagai paŋ war paŋ.