Ɗif zi ɓiki seŋ 9 - Ɗû na sɗik na wiini Alaw

Gulaini suŋfa

¹ Aakam, mu tika hiiniŋa miɗini wazagai hanɗa paŋ, na mu nava ɗa a hanɗa: Ɗai na jrekai, ɗai na yalakai gaini sdaɗi lai, e ɗa war tini Alaw. Ɗif ɗa a sɗa diri kaalai, bilini-gaw ɗa kaalai, sulu paŋ aŋ wuzani sek paŋ.

² Ɗai paŋ ɗa a za fu siɗi na ɗa a wala ni ktai, wala n'a za sini ɗif na jre ɗa, a za sini ɗif na meefeŋ lai, n'a za sini ɗif na pɗem, na hilu ɗa, a za sini na hihir nɵa lai, n'a za sini ni n'a za ɓaka ɗa, a za sini ni n'a za ɓaka kai ɗe lai, sini ɗif na pɗem maini sini ɗif na tuwur nɵa lai, sini ɗif n'a ha wala mini, maini sini ɗif n'a huna wala zi hi-miy nɵa lai.

³ Wala ktai na meefeŋ a na arbani wazagai n'a na za midiɗi yai ɗa paŋ, a na ɓa, ɗai paŋ ɗa a za siɗi ɗa a wala ni ktai, buri nɵa agulɗi ɗai paŋ a va gaini meefeŋ, dûûli a niya warɗi agulɗi won hlai n'e ɗa karɗi, asakal par e mri lai.

⁴ Paŋktai n'a kiɗa baya pini ɵeɗ ɗa, a ɗif n'a na karni, hirge na karni blaŋ ɗa, a suwa gurnai na gaini mri su.

⁵ Buri ɓa ɗai na karɗi e siɗi ɓa aga e mri, amma ɗai zi mri e siɗi wala ktai kai sam, nagai ɗa hiini na wiini vrak aŋ midiɗi kir kai, buri ɗif miɗini gaiɗi kir kai.

⁶ Diriɗi, bilini gawɗi, sileɗi lai, a mra edi sa, wiiɗi gaini wazagai n'a na za midiɗi yai na paŋ kir kai.

Yima simniku na warɗi yai maini like na tini Alaw par nɵa

⁷ Hala, suma simiku gaini firiyi, ca viŋku gaini firiyi lai, buri ɓa Alaw a firiya sdaku ta ya.

⁸ Hlai paŋ wa sapa na gaini futini suku, ku girda emel arku grit grit lai!

⁹ Simiti duniya gaiɗi muni na ku diriti ɗa, war simniku n'agwi na warɗi yai ɗa; buri mefeŋku n'Alaw a suŋku warɗi yai ɗa a n'a nava kai, buri ɓa ribaku na warɗi yai, gaini sdaku na ku zaŋ midiɗi yai ɗe lai ɗa a hanɗa ta.

¹⁰ Wala na tuku te kiɗa te zaŋ paŋ ɗa, zaŋ gaini gdaŋku paŋ; buri ɓa war hlai zi simni na wiiɗi ɗai zi mri n'aga ku hala woni ɗa, sda aŋ kai, hiini aŋ kai, sɗi aŋ kai, yel aŋ kaalai.

Gir n'aga za na ɗif a hiinaŋ kai

¹¹ Mu tala wala zamai ktai midiɗi yai, e rɗi amai war luwi ɗa e ɗi ɗai na kokolakai kiiɗi kai, war hatam ɗa e ɗi gaŋgalaŋai kiiɗi kai, e nivi simi ɗa e ɗi ɗai na yalakai gara kiiɗi kai, e nivi farai ɗa e ɗi ɗai zi siɗi gara kiiɗi kai, e niviti pɗemni ɗa e ɗi ɗai n'e siɗi abai gara kiiɗi kaalai, buri ɓa pɗem gaini meefeŋ paŋ ɗa a kiɗa a za siɗi nagai paŋ.

¹² Buri ɓa ɗif a sɗa lerni gara gara a suwa, hilif n'a yima warni ava ɗa kai, a suwa wazagai zi ɗufli n'a yima warni azaw ɗa kaalai, ɗai nɵa lai, gir a luɓasi midiɗi war ler na ɗif a hiina miɗini kai.

Yel na wiini ɗif na murga

¹³ Mu tala yel zamai ktai midiɗi yai n'a tala ara pɗem gara.

¹⁴ Fuŋ n'abai ktai na dai dai na ɗai warni viya kai a na fu, pai zi spak ktai a hala aŋ hitimaŋ, a cakaŋ, a zizina hlai n'e riɓtiɗi ɗai woni par sini lai.

¹⁵ Ɗif na murga zi yel ktai a na fu war fuŋ hanɗa, a kurɗa fuŋ n'abai na dai dai hanɗa edi gaini yelni, amma asakal par midiɗi ɗa a wula gaini ɗif hanɗa.

¹⁶ Nɵa mu muɗa: Yel ɗa a suwa spak, amma yel na wiini ɗif na murga ɗa ɗai e piɵiŋ kai, seŋni zi miɗi ɗe ɗif a zuɓuraŋ kaalai.

¹⁷ Seŋ zi miɗi na gaini hangal na wiini ɗif zi yel, a suma ɗa a suwa miɗi na gaini gdaŋ na wiini pai n'abai na muɗaŋ siɗi ɗai na tatalakai.

¹⁸ Yel ɗa a suwa wazagai zi gaw, amma ɗif na tuwur ktai ɗa a ɓulka wazagai na pɗamai viya.