Ɗif zi ɓiki seŋ 7 - Ɗû na sɗik na wiini Alaw

Wala na pɗem a suwa paŋ

¹ Azi zi wii na pɗem ɗa, pɗemni a suwa yitir na lugosni pɗem gara ɗa, mefeŋ na wiini mri ɗa, a suwa na wiini wii ɗa lai.

² Hili na war hlai zi tuwi ɗa, a suwa na war hlai zi fet ɗa, buri ɓa dibini ɗif paŋ a na maini nɵa; nɵa ɗai na karɗi paŋ aga e hiini hanɗa.

³ Kwimi a suwa riyi; ɗif n'arni a tala gaini kwimi ɗa, agulni te kiɗa te za war firiyi.

⁴ Hiiniɗi ɗai na yalakai ɗa aŋ gaiɗi ɗai na war kwimi, amma hiiniɗi na tatalakai ɗa aŋ gaiɗi na war firiyi lai.

⁵ Ɓarai na wiini ɗif na yel ɗa, a suwa kol na wiini ɗif na tatala ɗa.

⁶ Buri riyi na wiini ɗif na tatala ɗa, a na maini Sem Sem n'a naɓa arni afu na pini burma nɵa. Hanɗa kaw a meere kadai paŋ.

⁷ Gir ɗa a duula ɗif na yel ɗa, like ɗa a tuura hinini lai.

⁸ Vidini wala paŋ ɗa a suwa pini zi tiki ɗa, Hangal na gaini tiki ta ɗa a suwa ɵûri na got got ɗa.

⁹ Ku purma aŋ za hiy kai buri ɓa hiy ɗa aŋ war hiiniɗi ɗai na tatalakai.

¹⁰ Ku muɗa kai ɓa: Hlai na ɗipar pɗem pɗem sini na tiyana, buri ma ɗi ɗa kai, zilbi na maini hanɗa nɵa ɗa a zuku puku na ɗa, a yel ɗa kai.

¹¹ Yel ɗe pɗem maini bulum nɵa, a nifiɗi ɗai na karɗi paŋ.

¹² Buri ɓa, simni na pini sezeni yel ɗa, aŋ maini simni na pini sezeni farai ɗe ɵa, ribani n'aŋ war siɗi ɗa a na ɓa a sa suŋfa wiiɗi nagai n'e niviŋ ɗa.

¹³ Tala sda na wiini Alaw ɗa; n'a kiɗa a maaɗa wala na Ni a faŋ kaa ɗa asiya ɗa?

¹⁴ War mefeŋ zi firiyi, firiya, war mefeŋ zi gir, tala: Na hanɗa lai, hanɗa lai, sulu paŋ a zaŋ ɗa a Alaw sa, kapai ɗif a sɗa wala n'a za duɓani sek ɗe kai.

Jre ɗikat gaini yel

¹⁵ War simniŋa n'agwi warɗi yai ɗa, ara a tala wala viya, ɗif zamai na jre ɗa a mra gobi burini jreni, ɗif zamai na meefeŋ ɗa a fana viya war meefeŋni ɵa lai.

¹⁶ Ku za suku aŋ ɗif na jre a suwa kai, ku za suku aŋ ɗif na yel gara kaalai, ku tuura suku edi kadai buri ma ɗa?

¹⁷ Ku za suku edi aŋ ɗif na meefeŋ gara kai, ku duula suku kaalai, ku fuɗa suku edi wuzani hlai na ɗa buri maɗa?

¹⁸ A pɗem ɓa ku yima gadai hanɗa muduku sulu paŋ, buri ɗif n'a huna Alaw ɗa, aga a za pini gadai hanɗa gaini sulogoini paŋ.

¹⁹ Yel ɗa a bunda ɗif zi yel spak, a sûwiɗi lawaŋai doogo n'e ɗa war fuŋ n'abai.

²⁰ Buri ɓa ɗif ktai na jre gara azumai midiɗi yai, n'a za ɗa pɗem sal, a za tuwur kai ɗa aŋ kai.

²¹ Miɗi na ɗai e miɗiŋ paŋ ɗa, ku zaga ɵimaku mini kai, nɵa kai ɗa aga ku ɵina ɓa begeku a na muɗa seŋ na meefeŋ muduku.

²² Buri ɓa meefeŋ zamai ɗa, hiiniku a suŋku ɓa, tuku lai ku na muɗa meefeŋ siɗi ɗai zamai lai.

Ɗai n'e piyi yel haa e niviŋ ɗa viya kai

²³ Mu tetema wazagai hanɗa paŋ gaini yel, mu hiina ɓa: mu za fu na aŋ ɗif zi yel. Amma mu kiɗa sini kai.

²⁴ Wala n'a na tiyana ɗa, pini aŋsi na ɗa gaigai, hulumni a hulum kai, n'a kiɗa a siɗaŋ edi gaglai ɗa asiya ɗa?

²⁵ Ta mu rga wara aŋ siɗa, aŋ fufuka, aŋ paya yel gaini ezini-seŋ, aŋ sɗa ɓa meefeŋ ɗa a dûûli; a dûûli na meefeŋ.

²⁶ Mu nava ɓa, muni na payaiɗi meefeŋ ɗa sababɗi a suwa mri; buri ɓa t'azaw, agulɗi ɗa a ava, tiɗi ɗa a jaɓ lai; ni n'Alaw a firiyaŋ ɗa a yima tiɗi kai, amma ni na tuwur ɗa a mula miɗi par kai.

²⁷ Ɗif zi ɓiki seŋ a muɗa: Hanɗa a wala na mu navaŋ, Won hlai na mu tala wazagai hanɗa edi ktai ktai paŋ kapai mu nava ezini ɗa.

²⁸ Mu na paya ɵa ɗaai amma mu nava kai hai: Arbaɗi maɵagai dubu ɗaw ɗa, mu nava ɗif zi yel ktai, arbaɗi falakai gaini hlaiɗi ɗa, mu nava muni ktai maa kai.

²⁹ Amma na mu navaŋ ɓa, Alaw a rgiɗi ɗai ɗikat, amma e piyi seŋ na meefeŋ ɗa e ɗi nagai.