Ɗif zi ɓiki seŋ 4 - Ɗû na sɗik na wiini Alaw

Mri a suwa simni na karku

¹ Pra, mu tala karai n'a na za midiɗi yai ɗa, ɗai n'e ɗa siɗi gir tiɗi marɗi ɗa e tûwi, -ɗif n'a siɗi arai zi pi aŋ kai; gdaŋ t'aŋ tiɗi ɗai n'e zi gir wiiɗi marɗi par, -ɗif n'a siɗi arai zi pi aŋ kai.

² Nɵa ta mu ziɗi wuti wiiɗi nagai n'e mri ya ɗa, midiɗi nagai na karɗi n'e mri kai hai ɗa.

³ Ni n'a wa edi kai hai ɗa, a sûwiɗi na karɗi gaiɗi n'e mri lai, buri a tala sda na maafanai n'a na za midiɗi yai ɗe kai.

Sda gaini gir na pini

⁴ Ta mu tala ɓa sda paŋ, sda n'a ɵa edi pɗem paŋ, a sile n'aŋ warɗi ɗai siɗi marɗi. Hanɗa kaw a meere kadai, a luwi na pini smer.

⁵ Ɗif na tatala a ɵawa tini sa, a luma ɗa a neŋ-sini

⁶ Tiy kof na wiini si-n'amla, a suwa tiy kof kof sulu na wiini sda na wiini luwi na pini smer.

Sulu te suwa ktai

⁷ Mu tala wala na meere kadai zamai ktai pra azumai midiɗi yai.

⁸ Ɗif zamai ɗa kiini pal, ahini kai, tawalni aŋ kai. A za sdani wuzani sek, arni a baza gaini farai kai. Na ɓa nɵa ɗa, mu za sda, mu va diriŋa amai kai ɗa, mu zaŋ na wiini asiya ɗa? Hanɗa kaw a meere kadai, a sda na meefeŋ kadai.

⁹ Ɗai sulu ɗa e sûwi ɗif na ktai ɗa, buri ɓa e nivi der na pɗem pini sdaɗi jek.

¹⁰ Buri ɓa, na ɓa ktai a kɵa li, maini a yimaŋ amai, haw gara burini ni n'a na kiini ktai ɗa! na ɓa a kɵa li ɗa, maini na gaini n'a yimaŋ amai aŋ kai.

¹¹ Pra na ɓa e fini ktai ɗa, e kûpi siɗi marɗi, amma ni n'a na kiini ktai ɗa a kopo sini maɵa maɵa ɗa?

¹² Na ɓa ɗif gdaŋni a suwa ɗif na ktai li su ɗa, ɗai sulu aga e sûwiŋ su; sogom na lufa li hu ɗa a rawa kai.

Abai gaini gir na pini

¹³ Arwagwi n'agwi, na murga, zi yel ɗa, a suwa pai na wel, na yelni a kiɗa kai, n'a yima gadaiɗi ɗai kir kaalai ɗa.

¹⁴ Koo na ɓa arwagwi hanɗa a niyasi war daŋgai par aŋ simiti pai, zaw koo ɓa a na fu blaŋ a siiwa gaini siiwi kapai a simiti pai tekeɗeɗi ɗa.

¹⁵ Mu navaŋ ɓa ɗai na midiɗi yai ɗa paŋ ɗa, e ɗiyi pini arwagwi n'a na tika balamni pai na wel ɗe par.

¹⁶ A sɗa ta ɗai pini fara fara, ni a paiɗi lai, amma vuna n'asakal sek ɗa e kiɗi e firiyi pini kai, buri hanɗa kaw a meere kadai, a luwi na pini smer.

Ku ɓaka sariya wuzani Alaw viya kai

¹⁷ Hlai na ku hala amlai war Dalamni Alaw ɗa, ku tika hangalku ta, ku hala aŋ zuɓura wala, aŋ za ɓaka na wiiɗi na tatalakai kai, buri e siɗi ɓa e zi na ɗa a meefeŋ kai.