Ɗif zi ɓiki seŋ 3 - Ɗû na sɗik na wiini Alaw

Wala paŋ gaini sartini sartini

¹ Wala paŋ aŋ gaini sartini, wala n'a za midiɗi yai paŋ aŋ gaini sartini.

² Sarti na wiini wii a na, sarti na wiini mri a na lai, sarti na wiini pini luwuŋ a na, sarti na wiini hûrɗini n'amai a na lai.

³ Sarti na wiini fiɗi n'edi a na, sarti na wiini zûûli a na lai, sarti na wiini gɵini hlai a na, sarti na wiini rgini hlai a na lai.

⁴ Sarti na wiini tuwi a na, sarti na wiini riyi a na lai, sarti na wiini ɵini hama a na, sarti na wiini didimi a na lai,

⁵ sarti na wiini feŋ na gaiɗi marɗi a na, sarti na wiini feŋ kai a na lai, sarti na wiini dawaŋ a na, sarti na wiini dawaŋ kai a na lai.

⁶ Sarti na wiini piyini wala a na, sarti na wiini bini wala a na lai, sarti na wiini gɗamni wala a na, sarti na wiini bilini wala edi a na lai,

⁷ sarti na wiini ɓisini wala edi a na, sarti na wiini jiigini a na lai, sarti na ɗif a ɓa mini woni a na, sarti na ɗif a muɗa seŋ woni a na lai,

⁸ sarti na wiini diri a na, sarti na wiini bilini gaw a na lai, sarti na wiini gaw a na, sarti na wiini ɵeɗ a na lai.

⁹ Ɗif n'a za sda ɗa ribani na woni ɗa a maɗa?

¹⁰ Mu tala sda n'Alaw a siŋɗi wiiɗi ɗai kapai e ziŋ haa ɗa,

¹¹ A za wala paŋ na gaini futini war sartini, a sini yel wiini ɗif aŋ sɗa wazagai n'a vuga gaini n'aga za, amma sda n'Alaw a na zaŋ war pini zi tiki par haa sini vidini ɗa, ɗif a kiɗa a sɗaŋ paŋ kai.

¹² Buri nɵa, mu sɗa ɓa wala na pɗem burini ɗif ɗa, a firiyi na agulni te firiya pini derni lai, a dawaŋ n'a ɵaŋ gaini lai, won hlai n'a na karni lai.

¹³ Na ɓa ɗif a suma, a ca agulni te firiya buri sdani lai ɗa, hanɗa a like na sini Alaw par.

¹⁴ Mu sɗa ɓa wala n'Alaw a zaŋ paŋ ɗa a sumna haa kureɗ: A wala na ɗif a tika amlai mini kaalai, a tika edi warni par kaalai, Alaw a zaŋ nɵa ɓa kapai mu hunuŋmu.

¹⁵ Wala n'a na tiyana ɗa, a za ka duk ya, wala n'aga a za ɗa, a za ka duk ya lai, Alaw a wayasi wazagai n'a za ka duk ya pra.

Mri a dibi na wiini wazagai paŋ

¹⁶ Mu tala wala zamai midiɗi yai pra: Hlai n'e zi pini gadai woni ɗa, aŋ woni ɗa a meefeŋ; hlai n'e ziti jre woni ɗa, aŋ woni ɗa a meefeŋ ɗaai.

¹⁷ Mu muɗa gaiɗi agula ɓa, Alaw aga a ziti sariya wiini ɗif na jre gaini na meefeŋ, buri wala paŋ aŋ gaini sartini, nɵa aga a tala sdamu na mu zuŋmu paŋ.

¹⁸ Mu muɗa gaiɗi agula ɓa, ɗai ɗa Alaw a titimiɗi na ɗa a titimi, kapai a siŋkiɗi ɓa nagai lai e ɗa kal kal maini wazagai n'azi pini puɗu puɗu.

¹⁹ Buri ɓa n'a za sini ɗif ɗa, a n'a za sini wazagai n'azini puɗu puɗu lai, a wala ni nɵa ktai. Mri na wiini wala n'azi pini puɗu lai, mri na wiini ɗif lai a ni ktai. Suŋfa n'aŋ warɗi maini marni ɵa, abaini ɗif na midini wala n'azini puɗu t'aŋ kai, buri ɓa paŋ a meere kadai.

²⁰ Wazagai na karni paŋ a hala fu na war hlai ni ktai, paŋ a halasi arni afti par, a waya fu na arni afti paŋ.

²¹ N'a sɗa ɓa suŋfa na wiini ɗif ɗa, ni a hala amai sek, war hlai n'amai, amma na wiini wala n'azini puɗu ɗa a hala azumai sek, pini afti lai asiya ɗa?

²² Wala na pɗem agwi burini ɗif ɗa, a na ɓa a firiya gaini derni n'a navaŋ ɗa, a na wiini ta. Buri ɓa n'aga a wayaŋsi aŋ tala wala n'aga a za duɓani ɗa asiya ɗa?