Ɗif zi ɓiki seŋ 2 - Ɗû na sɗik na wiini Alaw

¹ Mu muɗa gaiɗi agula ɓa: Halasi kapai mu suŋkuku wala n'e yikiŋ ɓa firiyi ɗa, kapai ku sɗa wala n'e yikiŋ ɓa muluk ɗa lai. Amma hanɗa a meere kadai paŋ.

² Mu navaŋ ɓa riyi ɗa a dûûli, firiyi ɗa a nava wala ktai kaalai.

³ Mu rga wara ɓa mu sa sa mini sul ta, mu za sa maiɗi ɗai na duulakai nɵa, amma gaini yelŋa wara ta, kapai mu sɗa wala n'a juva aŋ zi na ɗai e kiɗi e ziŋ war mefeŋɗi n'agwi na midiɗi yai ɗa.

⁴ Mu za sda n'abakai: Mu rga dalam wiya ta viya, mu pa luwuŋ zi vin viya lai;

⁵ Mu za zardeŋ, mu pa luwaŋai viya gaini luwaŋai zi simi na pinzibani kiini kiini.

⁶ Mu ɓula avakai zi yem tiɓ tiɓ, kapai mu ɵa yemni pini alini luwuŋ na war zardeŋŋa.

⁷ Mu wura bagakai na maɵagai gaiɗi na falakai lai, ɗai n'e zi sda ahaya viya, ɵaakaiŋa gaini adumai, haakai lai a suwa suwai, mu sûwiɗi nagai n'e vigi wuza aha war Yeruzalem ɗe paŋ.

⁸ Mu tapasi or gaini arzaŋ viya lai, der na wiiɗi paakai gaini na wiiɗi lawaŋai na pa paŋ mu tapaŋsi tap. Mu mula ɗai na maɵagai gaiɗi na falakai n'e zini yama ca ca kapai e viliŋa ara. Mu paya wazagai na pɗamai na ɗai paŋ e firiyiŋ ɗa, falakai pɵaɗi kai.

⁹ Mu bunda abai, mu za farai viya, mu sûwiɗi nagai n'e vigi wuza aha warɗi Yeruzalem paŋ, gaini hanɗa paŋ yelŋa ta kaai ɗai.

¹⁰ Na ara a firiya a talaŋ paŋ mu bula edi sini kai, na agula a daraŋ paŋ mu zaŋ lai, buri sda na mu zaŋ paŋ a firiya agula, hanɗa a riba na mu navaŋ pini sdaŋa ta.

¹¹ Nɵa mu bunda ara sini sda paŋ na mu zaŋ gaini ta, gaini sda na mu sda gir mini viya kapai a za. Amma hanɗa paŋ ɗa meere kadai, a luwi na pini smer, midiɗi yai hanɗa ribani ktai maa aŋ kai.

¹² Mu bunda ara sini yel, dûûli gaini tatala, aŋ sɗa pɗemni ɗa. Mu zilba sa ɓa ɗif n'aga a simiti pai asakala ɗa aga a za ɗa ama ɗa? Buri wazagai paŋ a zasi kaa ya.

¹³ Mu navaŋ ɓa, yel ɗa pɗem pɗem sini dûûli ɗa, maini gaglai ɗa pɗem pɗem sini gegeŋ ɗa nɵa.

¹⁴ Ɗif zi yel ɗa arai pini ca, na tatala ɗa a paya na war melveŋ. Amma ta mu sɗa ya ɓa nagai sulu paŋ dibiɗi ɗa a ni ktai.

¹⁵ Nɵa ta mu muɗa gaiɗi agula ɓa: N'a za sini ɗif na tatala, aga a za sa ta lai. Mu za aŋ ɗif zi yel tiɓ buri maɗa? Mu muɗa gaiɗi agula ɓa, hanɗa kaw ɗa meere kadai.

¹⁶ Ɗif na midiɗi ɗai aga a wula gaini kai aŋ kai, ɗif zi yel ɗa kaalai, na tatala kaalai. Mefeŋ agwi asakal par midiɗi ɗai a wula gaiɗi paŋ. Ɗif zi yel ɗa a mra kal kal maini na tatala nɵa, a za nɵa tiɓ buri maɗa?

¹⁷ Simni na kara warɗi yai ɗa mu firiyaŋ kai, buri wazagai n'a na za midiɗi yai ɗa a saŋa firiyi kai, paŋ meere kadai, a luwi na pini smer.

¹⁸ Ta ɗa, sda na mu zaŋ midiɗi yai ɗa paŋ a saŋa firiyi kai buri ɓa aga mu hinan wiini ɗif n'aga a tika balamŋa ɗa.

¹⁹ A zi yel, azi dûûli, a sɗaŋ na ɗa asiya? Aga a ŋa miɗini sdaŋa na mu zaŋ gaini yelŋa midiɗi yai ɗa paŋ, hanɗa kaw meere kadai paŋ.

²⁰ Hangala a tuura sini sda na mu zaŋ azumai midiɗi yai ɗe paŋ.

²¹ Buri ɓa ɗif n'a za sda gaini yel gaini siɗi n'a ɵaŋ edi pɗem lai, walani n'a navaŋ ɗa a siŋni wiini ɗif n'a za sda kai ɗa, hanɗa kaw a meere kadai, a wala n'a fuɗa si gara.

²² Aakam, ɗif hanɗa, sdani n'a zaŋ paŋ, gaini was n'a fuɗaŋ midiɗi yai paŋ ɗa, n'a hina tini tiɓ ɗa a maɗa?

²³ Mefeŋni paŋ ɗa a mefeŋ zi gir, sda n'a zaŋ paŋ ɗa a sda zi gir lai, koo duvuk tekeɗeɗi agulni te nava si-n'amla kai. Hanɗa kaw a meere kadai paŋ.

²⁴ Wala na pɗem burini ɗif ɗa a simi n'a sumaŋ gaini ci n'a ca lai. A vada hajani vat lai. Ta mu tala ɓa hanɗa lai aŋ sini Alaw par.

²⁵ Ɗif n'a kiɗa a suma, a ca a firiya lai ɗa, asiya ɗa, n'a ɓa Alaw a siŋni kai ɗa?

²⁶ Aakam, a sini yel, siɗi gaini firiyi lai wiini ɗif n'a firiyaŋ ɗa, amma ni n'a za tuwur ɗa sdani a tipini der gaini gɗamni lai wiini ni n'Alaw a firiyaŋ ɗa, hanɗa kaw meere kadai, a luwi na pini smer.