Ɗif zi ɓiki seŋ 10 - Ɗû na sɗik na wiini Alaw

¹ Aduwai zi mri a hofa, a biva emel na wiini ɗif zi zi yitir edi. Dûûli na agwi kadai ɗa, gumani a suwa yel, a sûwiti abai ɗa lai.

² Hiinini ɗif zi yel a hala war gal na pɗem sek, amma hinini ɗif zi dûûli ɗa a kaŋ war gal na meefeŋ sek.

³ Koo war hilini na war futi blaŋ kaw, ɗif zi dûûli ɗa yelni ɗa a kiɗa kai. A siŋkiɗi wiiɗi ɗai paŋ ɓa: a ɗif zi dûûli.

Ɗif zi yel ɗa a firiya simni na ɵeɗ

⁴ Na ɓa abaiku a za hiy suku ɗa, ku hina hlaiku edi kai, buri ɓa, hangal na gaini tiki azumai ta ɗa a hina ɗif a niya war meefeŋ kai.

⁵ Mu tala meefeŋ zamai ktai midiɗi yai, a wili na ɗif n'abai a wula ɗa:

⁶ Ɗif zi dûûli ɗa e tikiŋ amai midiɗi ɗai ta, zi sɗi zûweŋ ɗa azumai par pini sa,

⁷ bagakai miɗini plasai sa, paakai azumai gaini eziɗi yaw maiɗi bagakai ɵa.

⁸ Na ɓla waŋ ezini maini ɗa a kɵa warni a ni dama, n'a ho ɵaga azumai ɗa, wala meefeŋ aga a lumaŋ.

⁹ N'a gɵa ali-fuŋ, a kiɗa a nava wuruk mini, n'a ɓasa luwuŋ ɗa a kiɗa a zini meefeŋ lai.

¹⁰ Na ɓa kawai mini a tiliyika li, e liɓiŋ kai ɗa a vuduku gdaŋku edi abai, gaini yel ɗa wazagai paŋ a za war futini.

¹¹ Na ɓa wala meefeŋ a luma ɗif na evekni aŋ tini ɗa, ribani ɗif z'evek ɗa a maɗa?

Yel gaini dûûli

¹² Seŋ n'a niyasi war mini ɗif zi yel par ɗa a seŋ na nem, amma seŋ na mini ɗif zi dûûli par ɗa a baŋ edi sek.

¹³ Pi zi tiki na wiini seŋni a dûûli, vidini n'edi sek ɗa a dûûli n'a suwa pra.

¹⁴ Ɗif zi dûûli a muɗa seŋ viya viya, amma ɗif a sɗa wala n'aga a za ɗe kai, n'aga a za duɓani sek ɗa a siŋkiŋni asiya ɗa?

¹⁵ Sdani ɗif zi dûûli ɗa a kayaŋ kadai meere, a siɗiti futi na te ka aha war fuŋ n'abai sek ɗa maa kai.

Spakni pai

¹⁶ Haw gara buriku, tuku afti na paiku ɗa a arwagwi n'agwi, na ŋarakaiku ɗa e simi gorof par tar.

¹⁷ ɵeɗ muduku tuku afti na paiku a wa war pinziba na muluk, na ŋarakaiku e simi war hlai ni, e simi kapai e nivi gdaŋ, buri e ciini gaini maiɗi ɗai n'e ci vin ɵa kai.

¹⁸ Ɗif na faali ɗa dalam a hurba midini, na a mulka ɗa, faŋ a ka amlai midini lai.

¹⁹ Buri ɵini dawaŋɗi ɗa, ɗai zi farai ɗa e di simi, vin ɗa a firiya agulɗi ɗai, farai ɗa a za wala paŋ lai.

²⁰ Ku muɗa seŋ na meefeŋ sini pai kai, koo amlai warɗi agulku, koo amlai warɗi dilimiku zi feŋ tekeɗeɗi ku muɗa seŋ na meefeŋ sini ɗif zi farai kaalai, buri ɓa wala zi ɗufli n'arbani hlai n'amai a kiɗa a ka seŋ hanɗa, aduwai te kiɗa te vurna seŋ hanɗa lai.