Daniyel 5 - Ɗû na sɗik na wiini Alaw

Fet na wiini pai Baltazar: Ɗû n'amai sini hlai

¹ Mefeŋ ktai, Pai Baltazar a ziti fet n'amai buriɗi ɗaini n'abakai zi sda, n'e ɗa dubu ɗaw, a sumna azumai gaiɗi a ca vin.

² Won hlai n'a tetema vin ɗa ya, a sa futi buri e milisi kopai zi or gaini zi arzaŋ na Nebukadnezar n'epini a mulaŋsi war tempel na Yeruzalem par, kapai ni gaiɗi ɗaini n'abakai gaiɗi falakai n'aha gaiɗi n'edi ca ca lai e ci gaini.

³ Nɵa e kisi kop zi or n'e miliŋsi war tempel par, a dara muɗa war Dalam n'Alaw na Yeruzalem. Pai gaiɗi ɗaini n'abakai, falakaini n'edi gaiɗi n'aha lai e ci gaini.

⁴ Won hlai na e ci li, e tiki piɗi aŋ kûli alawai zi or, zi arzaŋ, zi kiiya, zi kawai, zi luwuŋ, zi kriyit lai.

⁵ Won hlai ni tizaw, ali tini ɗif a niyasi edi, a ɗoha amai sini ɵaga na muɗukwi na wiini pai, wuzani wala zi higi petle sini. Pai a tala wulani tini ɗif n'a na ɗo.

⁶ Nɵa pai sirdaini a gɵa duk duk, hinini a turla, huwai, a yima amai wuzani kir kai, kurnaini a ɵiɓa sini marni kit kit.

⁷ Pai a ɗuula gaini gdaŋni buri e yikiɗiŋsi ɗai zi zi evek, paakaiɗi zi ɓaka, gaiɗi zi siɗi wuti lai. Pai a tika seŋ a miɗiɗi wiiɗi ɗai na yalakai na Babilon: Asiaɗi paŋ na ŋa ɗû hanɗa li, a siŋkiŋa ezini hanɗa li lai, aga mu witini sapai zi pai sini, aga mu ɵitini aiduwi zi or wulani, aga aŋa arbaɗi n'abakai na hu na midiɗi pai.

⁸ Nɵa ɗai na yalakai na wiini pai e niyi aha sini, e kiɗi aŋŋi wala na ɗo amai sini hlai kai, e siŋkini ezini kaalai.

⁹ Nɵa pai Baltazar a turla a suwa pɗemni, a kwima gara lai, ɗaini n'abakai hunai te yimiɗi.

Daniyel a siŋka wala n'a ɗoha amai sin hlai edi

¹⁰ Won hlai n'emini pai te ɵina wulani gaiɗi n'abakai, te niyasi amlai warɗi dilimi zi simi, te tika seŋ te muɗa: Jaamus, wala a zuku kai! ku hina hiiniku a turla kaalai, ku kwima kaalai!

¹¹ Avut par, war mefeŋ na wiini apuku, ɗif ktai a na ka, yikini ɓa Daniyel, tiyana a na midini aftiku lai, seze na wiini alawai na sɗik aŋ sini, n'a sɗa wala n'a vuga gaini na wuze. A siɗa ezini wazagai n'a hulamai, yel na midini ɗa, maini na wiiɗi alawai nɵa. Pai Nebukadnezar n'apuku a tikaŋ aŋ abaiɗi ɗai zi hiila, z'evek, midiɗi paakaiɗi zi ɓaka gyɗi zi siɗi wuti lai. Hanɗa a wala na pai n'apuku a zaŋ.

¹² Buri e nivi ɓa, Daniyel na pai a ɵini yiki ɓa Baltazar aŋ gaini seze na kiini ta sini, a siɗa ezini wazagai na hulamai lai. Gaini hanɗa a kiɗa aŋ siŋka ezini weseŋ zi pɵi, a siɗa ezini seŋ zi joriyo, a zizina seŋ lai. Nɵa tiyana mu yukumusi Daniyel ɗa, aga a siŋkumu ezini hanɗa edi.

¹³ Nɵa e ki Daniyel amlai wuzani pai, pai a tika seŋ a zilbaŋ: hanɗa ku tuku Daniyel, ktai arbaɗi nagai na pai n'apa a miliɗisi edi war Yuda par ɗi?

¹⁴ Mu ɵina ɓa k'aŋ gaini seze na wiini alawai suku, ku siɗa wala n'a vuga gaini na wuze, ku siɗa ezini wazagai na hulamai, k'aŋ gaini yel na mini kiini ta lai

¹⁵ E yikiɗiŋasi ɗai na yalakai, gaiɗi ɗai zi zi evek, kapai eŋi wala na ɗoha amai sini hlai, kapai e siŋkiŋa ezini lai. Amma e kiɗi aŋ siŋkiŋa ezini wala hanɗa kai.

¹⁶ Amma ta, mu ɵina ɓa tuku ku kiɗa aŋ siŋkiŋa ezini wazagai edi, ku vada seŋ lai. Tiyana ɗa, na ɓa ku kiɗa ku ŋa ɗû hanɗa, ku siŋkiŋa ezini edi lai ɗa, aga ku wuti sapai zi pai suku, aiduwi zi or wulaku, aga ku ŋa arbaɗi na hu na midiɗi pai lai.

¹⁷ Nɵa Daniyel a tika seŋa a miɗini wiini pai: Katu na wiini pai ɗa a wiini, farai zi riyi amai ɗa a siŋɗi wiiɗi na zamai, amma wala na ɗoha ɗa, aga mu ŋiŋni wiini pai, aga mu siŋkini ezini edi lai.

¹⁸ Jaamus, Alaw n'amai ɗa a sitini pai, abai na pɗem gaini hormo lai wiini Nebukadnezar n'apuku ta;

¹⁹ Buriɗi abai na te sa sini ɗa, ɗai na war pinziba paŋ, midini afti paŋ, war meme meme paŋ e ziriyi tiɗi hunai wuzani, a fuɗa ɗif pin dirini, a hina ɗif karni pin dirini, a sa rɗi n'amai wiini ɗif pin dirini, a hosa ɗif azumai pin dirini lai.

²⁰ Won hlai n'aniya war kûlûni-si, sezeni a bunda hiriyik, haa hunai na pin Alaw warni kir kai, Alaw a birgaŋ edi midiɗi paramaiɗi pai par, hormoni a tika edi lai:

²¹ A birga edi arbaɗi ɗai par, hinini a bunda maini wala na buza nɵa, a sumna gaini muru, a suma kuzum maini ɵaakai nɵa. Maɗai a waŋ haa a siɗa ɓa Alaw n'amai a epingezaɗi paakai. A sitini pai wiini asiya n'a daraŋ.

²² Amma tuku Baltazar n'ahini, ku siɗa wazagai hanɗa paŋ ɵa lai, ku hosa suku azumai kai.

²³ Ku faka amai sini Alaw n'amai, kopai na war tempelni par ku mulaŋsi anene. Tuku gaiɗi ɗaiku n'abakai, gaiɗi falakaiku n'edi ca ca gaiɗi n'aha lai, ki ci vin gaini. Ku sa kol sini alawai zi arzaŋ, zi or, zi kiiya, zi kawai, zi luwuŋ gaini zi kriyit lai n'atala kaalai a ɵina kaalai a siɗa wala kaalai. Amma Alaw na suŋfaku aŋ war tini, n'a siɗa payaiku, gaini hiiniku, ku sini kol kai.

²⁴ Nɵa wulani tini ɗif a ɵinaŋsi a ni aŋ ɗoha wala hanɗa:

²⁵ Wala n'a ɗoha a na ɓa MENE MENE, TEKEL, PARSIN lai.

²⁶ A waya edi maini nɵa: MENE a dara muɗa: Pɵa. Alaw a pɵa mefeŋku na warɗi pai ya, a ɗiyaŋ zaw.

²⁷ TEKEL a waya edi ɓa tikini kilo. E tukuku miɗini kilo ta, ku gomoŋ kadai.

²⁸ PARSIN a dara muɗa ɓa ɓûrwi. Paiku te ɓurwa ca. Te sa tiɗi Medekai gaiɗi Persekai.

²⁹ Nɵa Baltazar a sa futi buri e witini sapai zi pai sini Daniyel, a ɵitini aiduwi zi or wulani lai. E si miɗi edi midini ɓa ni aga a ŋa arbaɗi nagai na hu na wiiɗi pai.

³⁰ Duvuk ni haa, Baltazar pai na Babilon a nava fiɗi n'edi.