Daniyel 4 - Ɗû na sɗik na wiini Alaw

¹ Ta Nebukadnezar mu na fu aha war dalamŋa, war hangala, war muluk.

² Weseŋ ktai a pɵaŋa, a mulaŋa hunai pa gara, wala na halasi war hiiniŋa war hlaiŋa zi feŋ gaini wala na siŋka ara a turlaŋa viya.

³ Mu sa futi buri e yikiɗiŋasi ɗai na yalakai na war Babilon paŋ aha sa kapai e siŋkiŋa ezini weseŋ zi pɵi hanɗa.

⁴ Won hlai na nagai zi hiila, zi zi evek, paakai zi ɓaka na wiiɗi, ɗai zi siɗi wuti e cûsi, mu virniɗi weseŋ na pɵaŋa ɗa, kapai e siŋkiŋa ezini edi, amma e kiɗi aŋ siŋkiŋa kai.

⁵ Asakal par Daniyel na zinani Baltazar, na e yikiŋ miɗini Alaw na wiya, na seze na wiini alawai na sɗik aŋ miɗini a halasi sa, mu virnini weseŋ na pɵaŋa ta ta.

⁶ Mu miɗini Beltasar, abaiɗi ɗai zi hiila, tuku na mu siɗa ɓa seze na wiini alawai na sɗik aŋ muduku, na wala zi ŋoyai ktai na suwuku aŋ kai, muɗaŋa miɗini wala n'a siŋka ara war weseŋ ɗa, siŋkiŋa ezini edi lai.

⁷ Won hlai na mu na azumai midini walaŋa zi feŋ waŋ, mu tala wala ktai maini nɵa: Edi arbaɗi yai tar, mu tala luwuŋ ktai n'abai tiɓ, gai wili amai mogo.

⁸ Luwuŋ hanɗa a bunda abai gargali, gdaŋ lai, wûlini haa amai sini ɗugul ta, koŋɗi yai na puɗu paŋ arɗi sini paŋ.

⁹ Sugaini zuf gara, ali sini viya lai, wazagai na buza paŋ a sumna pin sezeni, wazagai zi ɗufli a rga gutni amai tini, wazagai na karni paŋ a suma sini par.

¹⁰ Won hlai na mu na midini hlaiŋa zi feŋ waŋ ɗa, mu tala ɗif zi giɗimi ktai na sɗik, a niyasi azumai amai war fuŋ n'Alaw par.

¹¹ A ɗuula gaini gdaŋni a muɗa: bli luwuŋ azumai, ɗûkûli tini edi, ɵûri sugaini edi, ɵiri alini edi lai, kapai wazagai n'a buza n'a suma pini sezeni a miywa, wazagai zi ɗufli n'a sumna amai ɵimani a zogo lai.

¹² Amma pini n'a hina dum, hiniŋ gaini sirdaini arni afti, ki rgiŋ gaini jaɓ zi kawai gaini jaɓ zi kiiya, a diyɓa gaini maɗai n'amai par a suma kuzum maini wazagai na buza nɵa.

¹³ Hiinini zi ɗif aga a bunda a kata gaini na wiini ɗif kir kai, aga a tika hiini na wiini wala n'edi buza, aga a sumna maini hanɗa nɵa haa buza muguzak.

¹⁴ Wala n'a za hanɗa a za pin ɗiyini seŋ na wiiɗi ɗai zi ɵeŋ zi giɗimi, seŋ hanɗa a za pin miɗi na wiiɗi na sɗik lai, kapai ɗai na karɗi e siɗi ɓa Alaw n'Amai a epingezaɗi paakai paŋ, a siti pai wiini ni n'a daraŋ a sa rɗi n'amai wiini ɗif n'asakal piɗi marni lai.

¹⁵ Hanɗa a weseŋ na pɵaŋa, ta pai Nebukadnezar, tiyana tuku Baltazar, siŋkiŋa ezini edi. Buri ɗai na yalakai na warɗi paiŋa paŋ e kiɗi aŋ siŋkiŋa ezini edi kai, amma tuku ku kiɗa, buri k'aŋ gaini sezeni alawai na sɗik muduku.

Daniyel a siŋkini ezini weseŋ n'a pɵaŋ edi

¹⁶ Nɵa arbani hlai ktai ta, Daniyel na zinani Beltazar hunai te yimaŋ gara, haa hinini paŋ a turla. Pai a tika seŋ a muɗa: Beltazar, hina weseŋ gaini ezini zi wiyi edi a turluku kai. Beltazar a waya seŋ a muɗa: epin-geza, weseŋ hanɗa a juva buriɗi gawku, ezini zi wiyi n'edi ɗe buriɗi nagai n'e duruku kai ɗa lai.

¹⁷ Luwuŋ na ku talaŋ n'a bunda abai gargali, gdaŋ lai, na wûlini haa amai sini ɗugul ta, na ɗai na war koŋɗi yai na puɗu paŋ arɗi sini ca ca,

¹⁸ na sugaini a juva gara, ali sini viya gara lai, na wazagai paŋ a suma sini par, wazagai n'edi buza paŋ a sumna pini sezeni, na wazagai zi ɗufli n'arbani hlai n'amai a za gutni tini lai ɗa:

¹⁹ hanɗa ku tuku, jaamus buri ku bunda abai gaini spak lai, abaiku te wula haa te daba pini ɗugul ta, spakku a wa tini edi haa sini koŋɗi yai na puɗu paŋ.

²⁰ Asakal par pai a tala ɗif zi giɗimi na sɗik, a niyasi azumai, amai war fuŋ n'Alaw par, a muɗa: Ɗûkli luwuŋ azumai, tûûriŋ edi, pini n'a hina dum gaini sirdaini, ki hiniŋ arni afti, ki nigiŋ gaini jaɓ zi kawai gaini jaɓ zi kiiya lai, a diyɓa gaini maɗai, aga a suma kusum gaini wazagai na buza haa buza muguzak

²¹ Jaamus, hanɗa a ezini weseŋ n'a pɵuku ɗa, hanɗa a wala n'Alaw n'Amai a ɗiyaŋ buriku ɗa, a suŋkuku arku na ɗa a ni ɗa epin-geza.

²² Aga e burguku edi arbaɗi! ɗai par, aga ku sumna gaini wazagai n'edi buza, aga a suku kuzum muku maini garakai nɵa. Maɗai aga a diyɓuku lai haa buza muguzak, haa kapai ku siɗa ɓa Alaw n'amai ɗa a epingezaɗi paakai paŋ, a siti pai wiini asiya paŋ pin dirini.

²³ Miɗi na ɓa hini pini na dum gaini sirdaini lai azumai arni afti tiɓ ɗa a siŋ ka ɓa won hlai na ku siɗali ɓa Alaw n'amai a epin-gezaku ɗa, aga ku waisi warɗi paiku.

²⁴ Buri nɵa, jaamus, mu siiwuku ɓa ku yima seŋa ɗa, ku hina tuwur edi, ku za jre-ɗikat, ku hina meefeŋku edi, ku hiina haw buriɗi ɗai na murgakai lai, ablaŋtaŋkai ɗa aga ku nava simniku na war ɵeɗ, aga ku toraɗi ka agwiya ɗi ɗa.

Weseŋ zi pɵi a va amai

²⁵ Wazagai hanɗa paŋ a za sini pai Nebubadnezar.

²⁶ A za buza dam asakal par, a niya amai midiɗi poriyo a guna blaŋ blaŋ.

²⁷ Pai a tika seŋ a muɗa: Hanɗa te Babilon n'amai, na mu rgiti aŋ dalamni pai gaini spakŋa n'abai gara, aŋ kol na wiiɗi paiŋa lai kai ɗi?

²⁸ Pai a ɵa mini edi kai hai, wule a wasi amai war fuŋ n'Alaw par a muɗa: Pai Nebukadnezar, e miɗi na ɓa paiku te tika edi ɗaw

²⁹ Aga e burguku edi arbaɗi ɗai par, aga ku sumna arbani wazagai n'edi buza, aga e suku kuzum muku maini ɵaakai nɵa, haa buza muguzak. Haa ku siɗa ɓa Alaw n'Amai a epingezaɗi paakai paŋ, a siti pai wiini asiya paŋ pin dirini.

³⁰ Tizaw tar miɗi hanɗa a va amai sini Nebukadnezar, a birga edi arbaɗi ɗai par, a suma kuzum maini ɵaakai nɵa, maɗai a waŋ, haa ayir na midini a diya mogo kai maini baadani muka nɵa, tetreŋni a bunda maini na wiini wala zi ɗufli nɵa.

Zûûli na wiini Nebukadnezar

³¹ War vidini buza na muguzak hanɗa, ta Nebukadnezar mu yima ara amai war hlai n'amai, hiiniŋa a waisi sa, mu sini tese wiini Alaw n'Amai, mu sini kol gaiɗi abai wiini ni n'a na karni haa kureɗ, buri spakni a spak n'a vada kai, paini te na haa kureɗ lai.

³² Ɗai na midiɗi yai paŋ e ɗi wala ktai wuzani arni kai, a za pini dirini sini wazagai zi rgi n'arbani hlai n'amai gaiɗi ɗai na midiɗi yai. Ɗif n'aga a yima tini amai arni aŋ kai, na midini ɓa: ku za na ɗa a maɗa aŋ kaalai.

³³ Tizaw tar hiiniŋa a waisi sa, buriɗi abai na wiiɗi paiŋa, paiŋa gaiɗi abaiŋa a waisi sa, ɗaiŋa n'e siŋa gadai gaiɗi ɗaiŋa n'abakai e piyiŋasi, e tikiŋa warɗi paiŋa; abaiŋa te bunda te suwa n'avut.

³⁴ Tiyana ɗa ta Nebukadnezar, mu kola pai n'amai, mu siŋka edi midiɗi abaini, mu sini kol lai buri sdani a jre, futini a na ɗikat. A kiɗa a hûsiɗi azumai nagai n'e kûli siɗi amai.