Daniyel 3 - Ɗû na sɗik na wiini Alaw

Gawlakai na hu warni waŋ z'afu n'abai

¹ Pai Nebukadnezar a za wala zi rgi n'a ziŋga ɗif gaini or: wûlini n'amai kil doogo doogo ɵaara, brukni kil ɵaara lai. A ɗiyaŋ war hlai na plas na Dura, midini afti na Babilon.

² Pai Nebukadnezar a ɵina ɗai buri e diŋgiɗisi satrapai, lawaŋai, jawrakai, n'e si gadai, n'e giɗimi farai, n'e zi gadai, n'e ɗûkûli sariya, zi sda paŋ na war provens paŋ kapai e hilisi miɗi fet na wiini Alaw n'a rgaŋ.

³ Nɵa satrapai, ɗai zi giɗimi wazagai, lawaŋai, ɗai zi si gadai, ɗai zi giɗimi godai, ɗai zi rgi gadai, zi ɗûklûti sariya, n'abakai zi ɵi wuze, ɗai zi sda paŋ e diŋgisi, e ɗiyi wuzani Alaw zi rgi na wiini Nebukadnezar buriɗi fet.

⁴ Paiɗi fet a ɗuula gaini wulani amai a muɗa: Mu na midiki tiki ɗai na war pinziba paŋ par, na midini afti na kiini kiini par, na war meme kiini kiini lai, ɵini seŋ hanɗa.

⁵ Won hlai na ki ɵinili tuwini faana, algaita, gaŋgraŋ, amiyok, edil gaini wazagai zi yama zamai zamai ɗa, ki hûrgû azumai wuzani Alaw zi rgi zi or na pai Nebukadnezar a ɗiyaŋ wuzaki.

⁶ Asiya asiya paŋ n'a dara a hurga azumai wuzani kai, a siiwa tini kaalai, tizaw aga e bliŋ warni waŋ z'afu n'abai.

⁷ Nɵa won hlai na ɗai paŋ e ɵinili wulani hum, algaita, gaŋgraŋ, edil gaini wazagai zi yama zamai zamai, ɗai na war pinziba, paŋ par, afti paŋ par, meme meme paŋ lai, e hûrgû azumai e siiwi tini Alaw zi rgi zi or na wiini pai Nebukadnezar.

Marmakaini Daniyel e gidi pini Alaw

⁸ Asakal par tar paakai zi ɓaka na wiiɗi e hilisi e pi seŋ midiɗi Yudiyakai.

⁹ E tiki seŋ e miɗini wiini pai Nebukadnezar: Jaamus, wala a zuku kai!

¹⁰ Jaamus, tuku gaini muduku dama ku sa miɗi ɓa: ɗif n'a ɵinali wulani hum, faana, gaŋgraŋ, amiyok, adill, gaini wazagai zi yama zamai zamai paŋ, a hurga azumai, a siiwa tini Alaw zi rgi zi or kai ɗa

¹¹ asiya ɗi paŋ n'a hurga azumai kai, a siiwa tini kaalai ɗa, e biliŋ warni waŋ z'afu n'abai.

¹² Amma Yudiyakai zamai na ku miliɗi miɗini sda n'abakai na midini afti na Babilon maini: Sadrak, Mesak, gaini Abed-Nego. Ɗai hanɗa jaamus, e diri e zi pini gadaiku hanɗa kai, e diri e hûrgû azumai wuzani alawai na wiiku kai, e diri e siiwi tini Alaw na ku rgaŋ kaalai.

¹³ Nɵa Nebukadnezar a niya war suwar gaini hiy n'abai, a sa miɗi buri e kinisi Sadrak, Mesak gaini Abed-Nego. Nɵa e kiɗisi wuzani.

¹⁴ Pai Nebukadnezar a tika seŋ, a zilbiɗi, a muɗa: Sadrak, Mesak gaini Abed- Nego, seŋ na mu ɵinaŋ ɓa ki ɗa hûrgû azumai wuzani alawai na wiya kaalai, ki siiwi tini Alaw zi rgi zi or na mu rgaŋ kaalai ɗa a futini ɗi?

¹⁵ Tiyana ɗa, zizini siki, won hlai na ki ɵini li tuwini hum gaini algaita, gaŋgraŋ, edil, amiyok gaini wazagai zamai zamai zi yama ɗa, ki hûrgû azumai, ki siiwi tini Alaw na mu rgaŋ, na ɓa ki siiwi tini kai ɗa, tiyana tar aga mu pûkûki warni waŋ z'afu n'abai. Kapai mu siɗa Alaw na halasi a pliki edi ta par ɗa.

¹⁶ Sadrak, Mesak gaini Abed-Nego, e tiki seŋ e miɗini wiini pai: Jaamus, tiyi aga mi wiyuku seŋ ktai miɗini hanɗa kai.

¹⁷ Na ɓa Alawyi na mi ɗa hûrgû azumai wuzani a kiɗa piltiyi edi ɗa, aga a pliyi edi mini waŋ z'afu n'abai hanɗa par, tuku tuku par lai, jaamus.

¹⁸ Koo ɓa a za hanɗa kai tekeɗeɗi, jaamus, tiyi aga mi hûrgû azumai wuzani alawai na wiiku kai, mi mi siiwi tini Alaw zi rgi zi or na wiiku kaalai.

¹⁹ Nebukadnezar a niya war hiy n'abai, a raka arni amai sini Sadrak, Mesak gaini Abed-Nego. A tika seŋ a muɗa buri e swi waŋ z'afu azi muguzak a suwa n'avut par.

²⁰ A sa futi siɗi ɗai na gdaŋai arbaɗi askaraini, buri e rgi Sadrak, Mesak gaini Abed-Nego, kapai e pûkûɗi war waŋ z'afu zi yûvûgû n'abai.

²¹ Nɵa e rgiɗi ɗai hanɗa gaini sirla na piɗi, jaŋfana siɗi, barlusɗi gaini cuki na midiɗi gaini harabak n'eziɗi paŋ e pûkûɗi warni waŋ z'afu n'abai.

²² pini miɗini pai na ɗiya gdaŋ, e swi waŋ z'afu a suwa pɗemni. Ɗai n'e hili e pûkûɗi miɗi Sadrak, Mesak gaini Abed-Nego warni waŋ ɗa, alesni afu a yiɗi edi yi.

²³ Amma Mesak, Sadrak gaini Abed-Nego, e yikki war waŋ z'afu gaini rgi ɓak ɓak.

Alaw a kûrɗiɗi marmakaini Daniyel edi warni waŋ z'afu par

²⁴ Pai Nebukadnezar a tala e ɗa zini yama, hunai te yimaŋ. A faka kot tar, a tika seŋ a zilbiɗi ɗaini n'abakai a muɗa: Mu pukumu ɗai gaini rgi ɓak ɓak arni afu hu kai ɗi? E wiyini seŋ e miɗi: Nkam, a na nɵa! jaamus.

²⁵ Pai a waya seŋ a muɗa: Mu tala na ɗai puɗu gaini rgi kai, e hili arbani afu yaw yaw, wuruk siɗi kai, ɗif n'ag'aŋ puɗu a tala maini ahini Alaw nɵa.

²⁶ Nɵa pai Nebukadnezar a torosi mini waŋ z'afu n'abai, a ɗûûliɗi a muɗa: Sadrak, Mesak gaini Abed-Nego, ɗai zi sda na wiini Alaw n'Amai, niyisi amai, hilisi. Nɵa Sadrak, Mesak gaini Abed-Nego, e niyisi edi arni afu par.

²⁷ Satrapai, ɗai zi giɗimi wazagai, lawaŋai, gaiɗi ɗai zi si gadai na wiini pai, e tipisi e tiliɗi ɗai hanɗa: Afu a za wala ktai siɗi kai, ayir na midɗi maa afu a zibiyaŋ kai, sapa na siɗi maa sini ɵa hiyak, lugosni afu maa siɗi kai.

²⁸ Nebukadnezar a tika seŋ a muɗa: Kol sini Alaw na wiini Sadrak, Mesak gaini Abed-Nego, n'a ɵinasi ɵeŋni aŋ kûriɗi zi sda edi, buri e hini siɗi war tini. E hi amai midini gadai na wiini pai, e si siɗi edi min mri, e diri e hûrgû azumai wuzani Alaw na zamai kai, aŋ siiwi tini kaalai, sai tini Alaw na wiiɗi ktai.

²⁹ Tiyana, ta mu sa miɗi na ɓa, asiya asiya paŋ, war pinziba na woɗi paŋ, war meme meme paŋ lai, midini afti na woɗi paŋ na miisa Alaw na wiini Sadrak, Mesak gaini Abed-Nego, ki fiɗiŋ edi, dalamni a bunda aŋ zilgit. Buri Alaw zamai n'a kiɗa aŋ pla ɗif edi maini nɵa aŋ kai.

³⁰ Nɵa pai a riya Sadrak, Mesak gaini Abed-Nego amai war sdaɗi midini afti na Babilon.

³¹ Pai a sa miɗi siɗi pinziba paŋ, sini afti paŋ, war meme meme paŋ na midini afti paŋ lai maini nɵa: A juva ɓa Alaw a kasi ɵeɗ midini afti ɗa.

³² A tala ara pɗem buri mu siŋkiki wazagai zi siŋki, gaini zi hiila n'Alaw n'amai a zaŋ sa.

³³ Wazagai n'a siŋka ara a na abakai, hiila n'a zaŋ sa a zi spak lai. Paini na te vada kai, spakni a vada kaalai.