Amos 9 - Ɗû na sɗik na wiini Alaw

Wala n'a siŋka arni Amos n'ag'aŋ ɵim: Hlai na sɗik a tuura edi

¹ Mu tala EPIƊ-ƊAI gai ɗiyi zaw, ɵimani hlai zi ɓaka, a muɗa: ɵiɓasi merfeŋni gaarakai n'amai par ɗa, pini n'azumai ɗa aga a gigiɗa, haɗaŋ amai midiɗi ɗai ɗa, aga mu fiɗiɗi aliɗi edi gaini kaɵkar, piɗi par, ɗif ktai maa aga a pra edi kaalai.

² Koo ɓa e niyi azumai war hlaiɗi ɗai zi mri kaw, ta aga te miliɗisi amai, koo ɓa e ŋûyi amai war hlai n'amai ɗi, aga mu wiyiɗisi azumai.

³ Koo ɓa e ŋûyi siɗi amai merfeŋɗi huwuŋ Karmel, aga mu piyiɗisi mu wiyiɗisi; koo ɓa e pi buni azumai war hulumni yem-ra n'abai, woni, aga mu sini futi wiini wala meefeŋ buri a limiɗi.

⁴ Na ɓa e si siɗi li war tiɗi gawɗi aŋ bagakai ɗa, woni aga mu sa futi wiini kaɵkar buri a vidiɗi edi; aga mu mula ara midiɗi, aŋ ziɗi pɗem ɗa kai, amma aŋ ziɗi meefeŋ.

EPIƊ-ƊAI a epin-gezani hlai n'amai gaiɗi yai

⁵ Epiɗ-ɗai ALAW, Alaw zi spak paŋ, a tika tini li sini afti ɗa, afti a hiliya; Ɗai na warni paŋ e niyi war tuwi, afti gai hlaini a tika amai maini ra Nil nɵa, a lawa maini ra Nil na war Egipte ɗa nɵa.

⁶ A za hlaini zi simni amai war hlai n'amai, n'a pasi amai par midiɗi yai maini miɗini dalam nɵa. a yikasi yem war yem-ra n'abai ɗa par, a hinaŋ a suma midini afti na huleŋ, Yikini ɓa EPIƊ-ƊAI.

Gir na wiiɗi ɗai na tuwarai

⁷ Tiki ɗai na Izrayel, wuzani ara ɗa, ki ɗa maiɗi ɗai na Etiyopiya ɵa kai ɗi? A miɗi na sini EPIƊ-ƊAI par. Mu miliɗisi aliɗi Izrayel edi midini afti n'Egipte par, Filistrekai edi midini afti na Kaftor par, Ɗai na Siriya edi midini afti na Kir par lai ɗa, mu ta kai ɗi?

⁸ Tili arni EPIƊ-ƊAI a na midini afti na wiini pai na Izrayel n'a za meefeŋ. Aga mu vadaŋ edi midini afti par, gai hanɗa paŋ, aga mu vidiɗi pinzibani Yakob edi midini afti par paŋ kai A miɗi na sini EPIƊ-ƊAI par.

⁹ Nkam aga mu sa miɗi, aga mu digiliɗi pinzibaɗi aliɗi Izrayel arbaɗi pinziba na zamai par, maini n'e digili seyem nɵa, ktai maa aga a kɵa azumai arni afti kai.

¹⁰ Nagai na tuwarai n'arbaɗi ɗaiŋa ɗa, aga e mri mini kaɵkar, nagai n'e ɗi ka e miɗi ɓa: aga ku kasi gir ɗa siyi gobi kai, aga ku kaŋsi haa siyi kaalai.

Asakal par, pai na wiini David aga te waya war balamɗi n'avut

¹¹ War mefeŋ ni ɗa, aga mu rgiti dugoi na gai kiciɓi na wiini David, na te dara te hurba ɗa amai, aga mu vuna arni hlai n'a luɓa ɗa amai, aga mu rga greŋɗi amai, aga mu rgiti maini na ɗipar nɵa.

¹² Kapai e tiki hlaiɗi ɗa, tiɗi ɗai na Edom gaini pinziba na zamai, na ɗipar e ɗi ka e siiwiŋa a miɗi na sini EPIƊ-ƊAI n'a za wazagai hanɗa paŋ par.

¹³ Mefeŋ a na gizi, a miɗi na sini EPIƊ-ƊAI par, woni, hiɗi aga a za viya, haa a vada amlai min hirim, Riwini ali luwuŋ zi vin aga a za haa sin mefeŋ na ɗai e bili seyem ɗa ta, woni, vin na hehe aga a kasi amai sini huwaŋai par, boŋorai paŋ aga a va gaini firiyi.

¹⁴ Aga mu wiyiɗi Izrayel na ɗaiŋa warni eziɗi n'avut ɗa, fuŋɗi n'abakai n'a tuura edi ɗa aga e rgiŋ amai, aga e simni warni aga e pi luwuŋ zi vin, e ci vinni lai, aga e pi luwaŋai, e simi alini lai.

¹⁵ Aga mu piɗi midini aftiɗi, ɗif aga a hûrɗiɗi amai kir kai midini afti na mu siŋɗi par ɗa, a muɗaŋ a EPIƊ-ƊAI, Alaw na wiiki.