Amos 7 - Ɗû na sɗik na wiini Alaw

Wala n'a siŋka arni Amos avut: Ayuwi

¹ Wala n'Epiɗ-ɗai ALAW a siŋkaŋa ara ɗa a na maini nɵa: A na fu aŋ za ayuwi dam, won hlai na balamni kuzum n'e ɵiɓiŋni wiini pai a tika pini aŋ goɗa.

² Won hlai n'ayuwi a luma sugoi na midini afti ɗa paŋ li, mu muɗa: Epiɗ-ɗai, ALAW wiya, za barka, siyi ni, pinzibani Yakob ɗa a suwa agwi gara lai ɗa, kapai a za maɵa maɵa ɗa?

³ EPIƊ-ƊAI a bunda hinini, a muɗa: Wala hanɗa aga a za kai.

Wala n'a siŋka arni Amos n'ag'aŋ sulu: ɑfu

⁴ Wala n'Epiɗ-ɗai, ALAW na wiya a siŋkaŋa ara a na maini nɵa: Epiɗ-ɗai, ALAW na wiya a na muɗa midiɗi sariya na gaini afu. Yûvûgûni afu ɗa a siita yem n'a na azumai gaigai pini hlai, a ya afti na wiiɗi Izrayel ɗa lai.

⁵ Mu muɗa: Epiɗ-ɗai, ALAW na wiya, mu siiwuku, za barka ɗiyaŋ zaw, pinzibani Yakob ɗa a suwa agwi gara lai ɗa, kapai a za maɵa maɵa ɗa?

⁶ EPIƊ-ƊAI a bunda hinini, a muɗa: Wala hanɗa aga a za kir kai.

Wala n'a siŋka arni Amos n'ag'aŋ hu: Kawai na sogom pini teɓ zi kiti hlai

⁷ Wala n'a siŋkaŋa ara a na maini nɵa: EPIƊ-ƊAI a ɗiya amai midiɗi ɵagai zi kiya, kawai zi kiya na sogom pin teɓ tini yaw.

⁸ A muɗaŋa: Amos ku tala ɗa a maɗa? Mu wiyini seŋ: A kawai zi kiya na gaini sogom pini teɓ, n'e kiti hlai gaini. Nɵa EPIƊ-ƊAI a muɗa: Ɗaiŋa na Izrayel e ɗa maini ɵaga na gai fi ka nɵa, mu halaɗi arbaɗi gaini kiya na gai sogom pini teɓ na ɗa aŋ kataŋ siɗi. Aga mu vuga midini meefeŋ na wiiɗi kir kai.

⁹ Hlai zi ɓaka na wiiɗi pinzibani Isaak ɗa aga a giɵa azumai, hlai na sɗik na wiiɗi Izrayel aga a bunda aŋ greŋ, aga mu faka amai war hatam siɗi pinzibani Yerobowam na pai ɗa.

Pai zi ɓaka Amasia a birga Amos edi war Betel par

¹⁰ Nɵa, Amasia pai zi ɓaka na war Betel, a ɵina ɗai sini Yerobowam, pai na Izrayel aŋ miɗini ɓa: Amos a na faka ɗai amai suku arbaɗi pinzibaɗi aliɗi Izrayel; seŋ n'a na niyasi war mini par ɗa a suwa gdaŋɗi ɗai suwai.

¹¹ Buri a na muɗa maini nɵa: Yerobowam aga a mra min kaɵkar, aliɗi Izrayel gai hlai paŋ, aga e kiɗi edi gaigai sini aftiɗi par lai.

¹² Amasia a miɗini wiini Amos: Faka hala, epini wala zi siŋki, waya midini afti na Yuda sek, woni aga ku muɗa seŋku na min Alaw par lai, ku suma muku pini lai.

¹³ Amma a Betel na ɗa ku waya pin seŋku na min Alaw par kir kai. Buri ɓa hlai hanɗa a hlai na sɗik na wiini pai, a tempel na wiiɗi pai lai.

¹⁴ Amos a wiyini seŋ wiini Amasia: Ta mu na fu mu ɗif na min Alaw kai, mu pinzibani ɗif na min Alaw kaalai, mu na fu mu ɗif n'a wula ɵaakai, mu pa luwuŋ Sikomor lai.

¹⁵ amma EPIƊ-ƊAI a yimaŋasi edi pini ɵaakai par, a muɗaŋa: Hala, ku muɗa seŋ na min Alaw edi siɗi ɗaiŋa na Izrayel.

¹⁶ Tiyana ɗa, ɵina seŋ na wiini EPIƊ-ƊAI ɗa, tuku Amasia na ku muɗa ɓa: Ku muɗa seŋ na min Alaw par siɗi Izrayel kai, ku muɗa seŋ na ɗapni kai sini pinzibani Isaak kai ɗa,

¹⁷ Pin hanɗa EPIƊ-ƊAI a na muɗa maini nɵa: Muniku aga te bunda aŋ zawar aha war fuŋ n'abai ɗa, aliku na maɵagai gaiɗi na falakai aga e mri min kaɵkar, Ɗai aga e ɓûrwi afti ɗa tiɗi, tuku aga ku mra edi midini afti na hihir, ɗai na Izrayel aga e kiɗi edi gaigai sin aftiɗi par lai.