Amos 6 - Ɗû na sɗik na wiini Alaw

Hiini zi digai na wiiɗi ɗai zi farai

¹ Haw gara buriɗi nagai n'e ɗa gai hangalɗi aha war Siyon, n'e tili siɗi ɓa huwyi siɗi kai, amai midiɗi huwuŋ na Samariya, tiki na aftiki ɗa, a n'avut arbani afti paŋ, tiki ki ɗi n'abakai na midini lai, n'aliɗi Izrayel e hiliɗi siki.

² Hili war Kalne, tili wala n'a za ɗa, won par, wiyisi war Gat, ki vigi haa war Hamat n a fuŋ n'abai ɗa, Asakal par ki hili azumai a Gat, ahaɗi Filistrekai, Fuŋ hanɗa pɗamai a suwa afti na wiini pai na Samariya gaini na Yuda hanɗa ɗi? Aftiɗi ɗa suwa na wiiki gaini abai ɗi?

³ Tiki ki hiini ɓa ki ɗa hûgû mefeŋ zi gir edi siki par, amma ki yimisi siki sek na ɗa a mefeŋ zi kaarai.

⁴ Gai fini azumai waŋ waŋ miɗini liy, n'e ziziniŋ gaini sesiyeŋ pekne, gai miɗi azumai meɗ meɗ war tapi na kukufuɗ, aŋ limi alini adumai na nur nur na war fara, gaini ali ɵaakai na gai liki na war guru lai.

⁵ Adill a tuwa li tar e zini yama tar, e zizini wazagai n'e zini yama gaini, maini David nɵa.

⁶ E ci vin ɗa warni kup n'abakai, e girdi siɗi a emel n'a luguza pɗem, na wûrini abai gara lai. Ɓilki n'edi na wiini pinzibani Yosef ɗa a fiɗiɗi siɗi agwi kai zaŋ.

⁷ Nɵa tiyana ɗa aga kiɗi edi aŋ bege, edi wuzaɗi marɗi ta ta. Fet na wiiɗi ɗai n'e yivi meɗ meɗ ɗa aga a vada.

Ɓilki n'edi na wiiɗi Samariya

⁸ Epiɗ-ɗai ALAW, a ha wala mini gaini sini dama, a miɗi na sini EPIƊ-ƊAI Alaw na wiini spak paŋ par, kûlûni-si na wiini Yakob ɗa a baza ma biz, dalamɗi na pɗamai ɗa mu firyaŋ kaalai, Samariya gaini wazagai na warɗi paŋ, aga mu siti war tiɗi gawɗi.

⁹ Na ɓa warɗi pakatai ktai ɗai e hini li doogo ɗa, aga e mri paŋ.

¹⁰ Na ɓa zigelɗi ktai a halasi li aŋ mulasi kopoŋ aha war dalam ɗa par aŋ yaŋ edi ɗa, aga a zilba ni n'a navaŋsi karni ɓa: ɗif zamai a na aha gaiku ɗe? Ɗif aga a wiyini seŋ ɓa: Ɗif ktai maa aŋ kai. Aga a muɗa ɓa: Ba, buri ɓa e yiki yikini EPIƊ-ƊAI miɗi kai.

¹¹ Buri EPIƊ-ƊAI a na sa futi buri e hiɗi hlai azumai, Dilimi n'amai ɗa aga te bunda aŋ deeɓer, n'agwi ɗa aŋ kolkoɗai lai.

¹² Plasai amai midini huwuŋ ɗa a lawa ɗe? E hirmi gaini garakai amai midini huwuŋ lai ɗe? Na kapai ki bindi jre ɗa aŋ masnaw, alini jre-ɗikat aŋ wala na ɗewek ɗa?

Rɗi n'amai zamai ɗa a nafa kai

¹³ Tiki ki firiyi buri ki rɗi amai midiɗi Lo-Dabar, “fuŋ n'abai n'a nafa wala kai”, ki miɗi ɓa Karnayim “Miyok na sulu” mi tikiti gaini gdaŋyi kai ɗi?

¹⁴ Buri nɵa, aga mu fakasi pinziba ktai amai suku, Izrayel, a miɗi na sini EPIƊ-ƊAI Alaw na wiini spak paŋ par, pinziba n'aga a ziki gir, a Lebo-hamat war gal n'azumai sek ɗa par, haa sini yem zi ki na Araba, war gal n'amai sek ɗa ta.