Amos 5 - Ɗû na sɗik na wiini Alaw

Yama zi tuwi na midiɗi Izrayel

¹ ɵini seŋ hanɗa, aliɗi Izrayel, ziɓiriti yamai zi tuwi na mu na ziniti midiki hanɗa.

² Izrayel te na maiɗi ɓulmi na te na gai mri su, te kɵa su, te kiɗa te faka amai kir kai. Izrayel na Juvi, t'aŋ gaini fini azumai midini aftiɗi waŋ, ɗif n'a yimiti amai aŋ kai.

³ Buri Epiɗ-ɗai ALAW a muɗa siɗi Izrayel maini nɵa: Fuŋ n'abai n'a na ka a ɵina ɗai edi min gaw dubu ɗaw ɗa, aga a hinasi piɗi ɗa miya ɗaw, n'a ɵina ɗai miya ɗaw ɗa, aga a hinasi piɗi doogo.

Piyi EPIƊ-ƊAI, nɵa aga ki simni karki

⁴ Buri EPIƊ-ƊAI a muɗa siɗi pinzibaɗi Izrayel ɗa maini nɵa: Piyiŋa, nɵa aga ki simni karki!

⁵ Amma ki piyiŋa ɗa war tempel na Betel ɗa kai, Ki niyi aha war hlai zi ɓaka na war Gilgal ɗa kai, ki vigi war hlai na Berseba ɗaw kaalai. Buri ɓa ɗai na Gilgal gai hlaiɗi paŋ, aga e kiɗi edi midini afti zamai. Betel dalam na wiini Alaw, aga a bunda aŋ dalam na wiiɗi alawai na jrekai kai.

⁶ Piyi EPIƊ-ƊAI, nɵa aga ki simni karki, Tiki pinzibani Yosef, ki zi hangal, kapai a siŋka gadaŋni edi siki aha war Betel, maini afu n'a ya wala, na ɗif n'a fuɗaŋ aŋ kai nɵa kai.

⁷ Tiki na ki bindi jre ɗa aŋ wala na ɗewek, na ki kirpi jre-ɗikat azumai pin eziki lai.

⁸ A za meeɵek na yikini ɓa diŋis gaini dawra-pekne a ni, a bunda gegeŋ na tikiɗim aŋ gaglai na gorof par, a bunda hlai na girvudi ɗa gegeŋ, kapai duvuk a za, a yikasi yem war yem-ra n'abai par, kapai a suma midini afti na huleŋ, Yikini ɓa EPIƊ-ƊAI.

⁹ A sa futi aŋ virmi ɗif na gdaŋ ɗa, a ni a sa futi buri ɗai zi vram e niyi aha war fuŋ n'abai zi ɵaga gaini gdaŋ a ni lai.

¹⁰ War faada ɗa, ɗif n'a pa seŋ arɗi ɗai zi ɗûklûti sariya war jre kai ɗa, e diriŋ kai. Ni n'a muɗa jre ɗa e firyiŋ kaalai.

¹¹ Pra, ki kiriɗi nagai na murgakai, ki mili seyemɗi gaini gdaŋ aŋ katu, ki rgi dalam gaini ali-fuŋ n'abakai, amma aga ki simni warni kai, ki pi luwuŋ zi vin na pɗamai, amma aga ki ci vinni kai.

¹² Buri mu siɗa ya, meefeŋki a viya, tuwurki a suwa suwai lai. Ki zini gir wiini ɗif na jre ɗa, ki yimi farai tiɗi ɗai na maafanai par, ki kûkûsi sariyaɗi ɗai na murgakai war faada.

¹³ Nɵa ɗa, war mefeŋ na mai hanɗa ɵa ɗa, ɗif zi yel ɗa a ba mini ba, buri ɓa hanɗa a mefeŋ zi gir.

¹⁴ Ki piyi aŋ zi ɗa a wala na meefeŋ kai, amma ki zi ɗa a na pɗem, kapai ki simni karki, nɵa EPIƊ-ƊAI, Alaw zi spak paŋ aga a za gaiki, maini na ki ɗa miɗiŋ na ɗa ɵa.

¹⁵ Ki bili gaw sini wazagai na maafanai, ki firyi wazagai na pɗamai, war faada ɗa, ɗiyi miɗini jre, Ablaŋtaŋkai ɗa EPIƊ-ƊAI, Alaw zi spak paŋ aga a za yum siɗi pinzibani Yosef n'e hini ɗi ɗa!

¹⁶ Buri nɵa, EPIƊ-ƊAI, Alaw zi spak paŋ a na muɗa maini nɵa: war hlai na ɗai e tipi woni ta ta ɗa paŋ, ɗai aga e ɵi hama, war futi paŋ ɗai aga e miɗi ɓa: hai hai gir hanɗa, aga e yikiɗisi ɗai zi hirim paŋ mini tuwi, nagai n'e siɗi yama zi tuwi gara ɗe mini ɵini hama lai.

¹⁷ war vowai na wiini luwuŋ zi vin ɗa paŋ, ɗai aga e ɵi hama siɗi, won hlai n'aga mu vugaɗi arbaki, a muɗaŋ a EPIƊ-ƊAI.

Mefeŋ na wiini EPIƊ-ƊAI

¹⁸ Gir gara buriɗi nagai n'e diri e tili mefeŋ na wiini EPIƊ-ƊAI! Aga a kikisi ɗa a ma ɗa, mefeŋ na wiini EPIƊ-ƊAI ɗa? Aŋsi na ɗa a mefeŋ zi gaglai kai, amma zi gegeŋ.

¹⁹ A na maini ɗif n'a lawa wuzani gurnai, amma a tapa miɗini wala na buza na tuwur pra, a niya aha sek, tini n'a tikiti amai sin hlai ɗa, wala meefeŋ a lumaŋ ɗa nɵa.

²⁰ Mefeŋ na wiini EPIƊ-ƊAI ɗa a zi gaglai ɗe? A mefeŋ zi gegeŋ kai ɗe? a gegeŋ na tikiɗim na gaglai nɵa agwi warni kai kai ɗi?

Hlai zi siiwa n'Alaw a firyaŋ kai

²¹ Fetaiki ɗa, mu firyaŋ kai, ma pini kai. Diŋgikaiki n'abakai na ki ɗa ziŋ ɗa, mu daraŋ kai tiŋ.

²² Ɓaka zi yi na ki ɗa ziŋa, gaini ɓaka na gaini ali seyem na ki ɗa ziŋa lai ɗa, mu daraŋ kir kai. Ɓakaki zi ɵeɗ gaini wazagai n'ezini puɗu puɗu na gai liki ɗa, ma vu pini kai.

²³ Fiki edi ma par gaini yamaki zi suura ɗa, adill na ki ɵiɓiŋ ɗa paŋ mu dara mu ɵinaŋ kai.

²⁴ Amma na mu dara ɗa a hanɗa: Ki hini jre a ka maini yem nɵa, jre ɗikat maini yem zi ki n'a hiɗika kai nɵa.

²⁵ Tiki aliɗi Izrayel, buza na doogo doogo puɗu, na ki ziŋ edi war basga na kaɗataŋ ɗa, ki ɗa ziŋa ɓaka gaini ɓaka na gaini ali seyem ɵa,

²⁶ Amma girna ɗa, ki ɗa libi alawai zi rgi na tiki dama ki ziziniŋ, maini Sikut, n'a pai na wiiki lai, a Alaw na wiiki lai, gaini Kewan na te maaɵiki na wiiki lai, t’ Alaw na wiiki lai ɗa na ɗa koo?

²⁷ Aga mu kiki edi midini afti na gaigai edi duɓaɗi Damaskus par, a muɗaŋ a ni na yikini ɓa EPIƊ-ƊAI, Alaw zi spak paŋ.