Amos 4 - Ɗû na sɗik na wiini Alaw

Siɗi Falakai na war Samariya

¹ Tiki falakai na war Samariya, na gai liki maini ɵaakai na war Basan ɵa ɗa, ɵini seŋ hanɗa, tiki na ki ɗa amai midini huwuŋ na Samariya, na ki kiriɗi ɗai na hurofai, na ki kirpiɗi na murgakai, na ki miɗiɗi wiiɗi maɵagaiki ɓa: kisi wala zi ci, cumu!

² Epiɗ-ɗai ALAW a ha wala mini gaini sɗik a muɗa: Nkam, tili mefeŋ aga a cosi midiki, na ɗai aga e pi kawai miki, e gidiyiki tiki gaini, aliki, e gidiyiɗi gaini trum lai.

³ Aga ki niyi edi war fuŋ n'abai par, warni arni ɵaga na ɓasa, muni paŋ te ka midiɗi, tiki aga ki ŋûyi amlai war hlai zi ŋoyai ɗa, A miɗi na sini EPIƊ-ƊAI par.

Ɓaka na nafani aŋ kai

⁴ Hili a Betel, hi amai midini gadai ɗaai, hili war Gilgal, hi amai midini gadai a suwa pra, Hili zi ɓaka na wiiki gorof par tar, si doogoni wazagaiki edi war mefeŋ n'ag'aŋ hu lai.

⁵ Yi ɓaka zi zini tese gaini peŋ na is arni kai, miɗini gûwiŋ zi ɓaka. miɗi edi wiiɗi ɗai miɗini like n'a sa pin dirini ɗif, hanɗa a wala na ki firyiŋ ɗa kai ɗi, ɗai na Izrayel, a miɗi na sin Epiɗ-ɗai ALAW par.

Ɗai na Izrayel e wiyisi sini Alaw kai

⁶ Ta ɗa, wala n'aga mu kaŋsi midiki a hanɗa: war fuŋki n'abakai paŋ aga mu kasi wiyamai, war hlaiki paŋ wala zi simi nɵa aŋ kai, Gai hanɗa paŋ, ki wiyisi sa kai, a miɗi na sini EPIƊ-ƊAI par.

⁷ Ta mu ɗiya faŋ ɗa zaw, paŋ ktai tile a hina avut sek hu kapai ɗai e hiɗi seyem, war fuŋ n'abakai zamai mu hina faŋ a ɵa, warni na zamai ɗa, mu hinaŋ a ɵa kai. Vowai zamai faŋ a yimaŋ pɗem, na zamai ɗa faŋ sini kai, a hula.

⁸ Fuŋ n'abakai sulu zaw hu ɗi, e tipi piɗi marɗi e hili war fuŋ na zamai aŋ piyi yem zi ci, amma e ci midiɗi saiɗi kaalai, gai hanɗa paŋ, ki wiyisi sa kai, a miɗi na sini EPIƊ-ƊAI par.

⁹ Seyem na war vowaiki ɗa, mu hina vegle a yimaŋ, ɵimani a kwimra, neme neme a yimaŋ lai, zardeŋki na viya viya, gaini luwuŋ zi vin na wiiki, luwuŋ Fige na wiiki gaini luwuŋ olive lai atla a lumaŋ ta ta. Gai hanɗa paŋ, ki wiyisi sa kai, a miɗi na sini EPIƊ-ƊAI par.

¹⁰ Mu ɵinaɗi vlak arbaki maini na war egipte nɵa, mu hiniɗi gawki aŋ fiɗiɗi aliki na gawlakai edi min hatam. E yimi plasaiki lai; lugosɗi ɗaiki n'e mri war kaŋki, mu hinaŋ a luguza merfeŋki. Gai hanɗa paŋ, ki wiyisi sa kai, a miɗi na sini EPIƊ-ƊAI par.

¹¹ Mu tûûriki edi, maini n'Alaw a tûûriti Sodoma gaiɗi Gomora edi ɗa nɵa. Tiki ki kûrɗisi mini par maini luwuŋ n'e tikiŋ edi arni afu par nɵa, Gai hanɗa paŋ, ki wiyisi sa kai, a miɗi na sini EPIƊ-ƊAI par.

¹² Buri nɵa Izrayel, aga mu zuku wala ktai. Buri wala n'aga mu zuŋku hanɗa, tuku Izrayel, zizina suku pɗem, aŋ nava gaini EPIƊ-ƊAI.

¹³ Buri ɓa, ni n'a zizina huwuŋ, n'a za smer lai, n'a siŋka hinini wiini ɗif, n'a bunda hlai na rum rum aŋ gegeŋ, n'a hala amai merfeŋni hlai n'amai mogo na midini afti, yikini ɓa: EPIƊ-ƊAI, Alaw zi spak paŋ.