Amos 3 - Ɗû na sɗik na wiini Alaw

EPIƊ-ƊAI a zilba miɗi ɗai na Izrayel

¹ Ziɓiri seŋ hanɗa, n'EPIƊ-ƊAI a na muɗaŋ siki ɗa, tiki ɗai na Izrayel paŋ, pinziba na mu milikisi edi war Egipte par paŋ.

² Arbaɗi pinziba na midiɗi yai paŋ, mu firyiki gara gara ki ɗi tiki. Aga mu zilba meefeŋki na ki ziŋ paŋ war tiki.

Na ɓa Alaw a na muɗa ɗa, ɗif na min Alaw a ba min ba ɗi?

³ Ɗai sulu e piyi piɗi marɗi amma seŋɗi ktai kai a siɗa aŋ za ɗi?

⁴ Gurnai a nava wala n'a lumaŋ kai ɗa, a nuuma edi war basga ɗi? Na ɓa ahi gurnai wala mini kai ɗa, a tuwa amlai war waŋni ɗe?

⁵ Wala zi ɗufli ayima warni azaw ɗa, wala zi simi n'a tanaŋsi a na kai ɗe, gurbuduk na wala a titimaŋ kai ɗa, a kiɗa a dogo azumai duk ɗe?

⁶ Hum a tuwa li war fuŋ n'abai ɗa, ɗif na jiriya kai a na ɗi? Gir ktai n'a za war fuŋ n'abai, n'a hinaŋsi a EPIƊ-ƊAI kai a na ɗi?

⁷ Nɵa wala n'Epiɗ-ɗai ALAW a dara a zaŋ paŋ ɗa, a siŋkiŋɗi arɗi ɗaini na min Alaw ɗa ta ta haw.

⁸ Gurnai a nuuma li ɗa, ɗif n'a huna kai ɗa asiya ɗa? Epiɗ-ɗai ALAW a muɗa li ɗa, ɗif n'aga a muɗa mini edi kai ɗa asiya ɗa?

Samariya aga te hina kadai su

⁹ Amai miɗini dalamai na pɗamai na war Asdod amai midini dalamai na pɗamai na war Egipte lai, ɗûûli, ki miɗi edi ɓa: Diŋgisi amai midiɗi huwuŋ na Samariya, tili tûrli n'abai n'a na aha arbaɗi, gaini kaarai n'a na warɗi lai.

¹⁰ Ɗai hanɗa sda na jre ɗikat e siɗi futini kai, a miɗi na sini EPIƊ-ƊAI par, Wazagai n'e miliŋsi gaini gdaŋ lai gaini hill lai ɗa, e kiŋ amlai war dalamɗi na pɗamai ɗa.

¹¹ Buri hanɗa, Epiɗ-ɗai ALAW a na muɗa maini nɵa: Samariya, gawku aga a guna aftiku azumai, Gdaŋku n'a na ɗa aga a vadaŋ edi, dalamku na pɗamai aga e virmiŋ lai.

¹² EPIƊ-ƊAI a muɗa maini nɵa: maini ɗif zi giɗimi n'a hultasi azi sulu zaw ɵime bew mini gurnai par, nɵa lai aliɗi Izrayel n'e ɗa war Samariya, n'e fini miɗini liy gaini tapi na Damaskus par ɗa, aga e kûrɗi ɗa maini nɵa.

¹³ ɵini pɗem, zaida hanɗa ki miɗiŋ sin pinzibani Yakob! a miɗi na sini Epiɗ-ɗai ALAW, Alaw zi spak paŋ par.

¹⁴ Mefeŋ na mu faka li siɗi ɗai na Izrayel aŋ zilbiɗi miɗi miɗini hi n'amai midini gadai na wiiɗi ɗa, aga mu zilbiɗi miɗi miɗini gûwiŋ zi ɓaka na war Bet-El, aga e hiɗi koŋni gûwiŋ zi ɓaka, na maini miyok ɵa edi, a yaka azumai.

¹⁵ Dilimi na wiiɗi fat gaiɗi na wiiɗi amsai ɗa, aga mu haɗaŋ azumai. dalamai n'e ziziniŋ gaini sesiyeŋ pekne aga a vada edi, dalamai zamai na gai futini viya aga a tuura edi, a miɗi na sini EPIƊ-ƊAI par.