Amos 1 - Ɗû na sɗik na wiini Alaw

¹ Miɗi na wiini Amos, ktai arbaɗi ɗai zi wili farai na war Tekowa; miɗi hanɗa a sa sini war siŋki buriɗi Izrayel, war mefeŋ na Oziyas a na aŋ pai na Yuda, Yerobowam n'ahini Yowas a na aŋ pai warɗi Izrayel lai, buza sulu wuzani jiriyini afti ɗa par.

² A muɗa: War Siyon par EPIƊ-ƊAI a nuuma maini gurnai nɵa, warɗi Yeruzalem par, wulani a wasi edi, Hlai na farai a suma warni ɗa a tuura edi li, merfeŋɗi huwuŋ Karmel a siita siyat.

Miɗi na wiini EPIƊ-ƊAI siɗi Izrayel gaini afti na ɵimaɗi Siɗi Siriya

³ EPIƊ-ƊAI a na muɗa maini nɵa: Buri meefeŋ na wiiɗi ɗai na Siriya na war Damaskus, hiyŋa na siɗi aga mu hinaŋ afuti ta kai. Meefeŋ n'a suwa paŋ ɗa a hanɗa: E giɵiɗi ɗaiŋa na war Galaad maini afti na darɓaɵai n'e giɵiŋ gaini kawai nɵa.

⁴ Buri nɵa, aga mu ɵa afu pin dalam na wiini Hazayel, a ya dalamni pai Ben -Hadad ɗa lai.

⁵ EPIƊ-ƊAI a muɗa maini nɵa: kawakai na gdaŋai n'e ɵi mini magala na Damaskus gaini ɗa aga mu haɗaŋ edi, war Bikat-Aven par aga mu vidiɗi ɗai edi, war Bet-Eden par, mu yima ni na amaraŋai zi pai t'aŋ tini ɗa edi lai ɗai na Siriya aga e kiɗi edi aŋ jak midini afti na Kir lai.

Siɗi Filistrekai

⁶ EPIƊ-ƊAI a muɗa maini nɵa: Buri meefeŋ na wiiɗi Filistrekai na warɗi Gaza, hiyŋa na siɗi aga mu hinaŋ afuti ta kai. Meefeŋ n'a suwa paŋ ɗa a hanɗa: E miliɗisi ɗai gai hlaiɗi, gaini gdaŋ war hlaiɗi par, aŋ siɗi edi tiɗi Edomitekai aŋ bagakai.

⁷ Buri nɵa aga mu ɵa afu piɗi ɵagai na Gaza, a ya dalamɗi na pɗamai edi.

⁸ War Asdod par aga mu yima pai edi, gaini ni n'amaraŋai zi pai t'aŋ tini war Askalon ɗa lai: Asakal par mu bunda ara siɗi Ekron, Filistrekai n'e hini karɗi ɗa, aga e vidi edi lai. A muɗaŋ a Epiɗ-ɗai ALAW.

Siɗi Tirus

⁹ EPIƊ-ƊAI a muɗa maini nɵa: Buri meefeŋ na wiiɗi ɗai na Tirus, hiyŋa na siɗi aga mu hinaŋ afuti ta kai. Meefeŋ n'a suwa paŋ ɗa a hanɗa: Nagai e hiini midini bonu zi tawal n'arbaɗi gaiɗi ɗai na Izrayel ɗa kai, e yimiɗi ɗai zi jak n'e ɗa arbaɗi war fuŋɗi, e siɗi edi tiɗi Edomitekai.

¹⁰ Buri nɵa aga mu ɵa afu piɗi ɵagai na Tirus, a ya dalamɗi na pɗamai edi.

Siɗi Edom

¹¹ EPIƊ-ƊAI a muɗa maini nɵa: Buri meefeŋ na wiiɗi ɗai na Edom, hiyŋa na siɗi aga mu hinaŋ afuti ta kai. Meefeŋ n'a suwa paŋ ɗa a hanɗa: E tiki futi piɗi tawalakaiɗi na Izrayel gaini kaɵkar war tiɗi, hiinini haw na warɗi buriɗi e rûzûŋ ruz, hiy na warɗi a hûgûɗi aŋ fiɗiɗi wuzaɗi sek sek, warɗi n'a limiɗi siɗi ɗa a vada kaalai.

¹² Buri nɵa aga mu ɵa afu piɗi Teman, aga a ya dalamai na pɗamai na Botsra edi.

Siɗi Ammonitekai

¹³ EPIƊ-ƊAI a muɗa maini nɵa: burini meefeŋ na wiiɗi Ammonitekai, hiyŋa na siɗi aga mu hinaŋ afuti ta kai. Meefeŋ n'a suwa paŋ a hanɗa: E ɓisi warɗi falakai zi ziyi na war Galaad ɗa edi, ɓa kapai aftiɗi a riya edi.

¹⁴ Aga mu ɵa afu piɗi ɵagai na siɗi Rabba, a ya dalamai na pɗamai edi, arbani suura zi gaw, war mefeŋ zi gaw, arbani berber, war mefeŋ zi barawai n'abai.

¹⁵ Pai na wiiɗi aga e kiŋ edi midini afti zamai, ni gaiɗi ɗai n'abakai na wiini lai, a muɗaŋ a EPIƊ-ƊAI.