Abdiyas 1 - Ɗû na sɗik na wiini Alaw

EPIƊ-ƊAI a muɗa midini ɓilki n'edi na wiiɗi Edom

¹ Siŋki n'a za sini Abdiyas. Alaw EPIƊ-ƊAI a muɗa midiɗi Edom maini nɵa: tiyi ɗai edi arbaɗi pinziba na zamai a muɗa: fiki amai, hulumu midiɗi Edom aŋ hitumutumu.

² Siɗi Edom a muɗa: tala, aga mu bunduku aŋ n'agwi arbani pinziba paŋ. Ɗai aga e miisuku a suwa paŋ.

³ A buku edi n'a kûlûni-si na warku ɗa. tuku na k'aŋ war huduk n'arbani huwaŋai, amai merfeŋni hlai n'amai mogo, na ku hiina warku ɓa: n'aga a hogoŋa azumai ɗa asiya ɗa?

⁴ Koo ku ɗufla amai gaigai maini beges nɵa tekeɗeɗi, koo ku rga gutku amai arbani meeɵek ɗi, woni par aga mu hugukusi azumai. A miɗi na sini EPIƊ-ƊAI par.

⁵ tili haw na ɓa mahalakai; zaw ɗai n'e virmi duvuk-duvuk e hilisi, e sukuku a ha, aga e mili wazagai n'e kiɗi aŋ miliŋ ɗa kai ɗi? aga e hunuku war kasara kai ɗi? Na ɓa ɗai zi rûwi ali luwuŋ zi vin e hilisi war vowaiku, a hinali piɗi ɗa a n'a naiya kai ɗa kai ɗi.

⁶ Pinzibani Ezaw, gawki e niyisi ahaki dega, e hiɗi hlai paŋ kap-kap haa godaiki na gaini ŋûyi sok-sok paŋ e niviŋ paŋ.

⁷ Ɗai aga e birgiki edi midini aftiki par. Nagai na bonoki ktai ɗa aga e dûûliki. Marmakaiku na ɗipar ɗa e bindi e ŋi muduku, Nagai n'e simi suku par, e ɗûkûli azuku, E miɗi: yel miɗini kir kai.

⁸ A na ɵa kai ɗi? War mefeŋ zi hiy ni ɗa, aga mu vidiɗi, ɗai na yalakai na war Edom, gaiɗi nagai zi siɗi na midiɗi huwuŋ na wiini Ezaw paŋ edi. A miɗi na wiini EPIƊ-ƊAI zi spak paŋ.

⁹ Teman, hunai n'amai aga te yimiɗi ɗaiku zi hatam, haa nagai paŋ na midiɗi huwuŋ na wiini Ezaw aga e nivi fiɗi n'edi.

Meefeŋ na wiiɗi Edom

¹⁰ Burini gir na ku siŋkiŋɗi arɗi pinzibani Yakob na tawalku ɗa, siyer aga a duguku, aga ku vada edi gamai lai.

¹¹ Won hlai na gaw te simiɗi tawalakaiki, tiki ki ɗiyisi edi par sa-sa, ki tili gaini arki kadai, Won na morkokai e niyisi aha war fuŋ, e ɓili wazagaiɗi Yeruzalem edi aŋ tanblo, tiki ki ɗi fu maiɗi ɗai na piɗi par nɵa.

¹² Ki firiyi piɗi tawalakaiki kai war mefeŋ na gir a niviɗi ɗa, ki firiyi piɗi alini Yuda war mefeŋɗi zi ɓilki n'edi kai. Ki riyi piɗi war mefeŋ zi gir kai.

¹³ Kadai tiɓ ki niyi a ha war fuŋɗi ɗaiŋa kai war mefeŋ zi ɓilki-n'edi na wiiɗi kai, kadai tiɓ ɗai na maiki nɵa ɗa ki firiyi burini gir na wiiɗi na war mefeŋ zi ɓilki n'edi kai, war mefeŋ zi ɓilki-n'edi na wiiɗi kai, ki tiki tiki sini faraiɗi war mefeŋ zi ɓilki n'edi na wiiɗi kai.

¹⁴ Ki ɗiyi mini dagrani futi sa-sa aŋ fiɗiɗi nagai n'e prisi edi kai, ki siɗi nagai n'e hini karɗi war tiɗi gawɗi war mefeŋ zi gir ɗa kai.

¹⁵ Buri mefeŋ zi hiy na wiini EPIƊ-ƊAI a na gobi, mefeŋ zi mili hunai piɗi ɗai paŋ. Na ki zin siɗi na zamai aga a za siki tiki lai; sdaki na ki ziŋ paŋ aga a waya midiki.

Rɗi n'amai na wiiɗi aliɗi Izrayel

¹⁶ Maini tiki Izrayel ki si war kawai zi hiy na wiya amai midiɗi huwuŋ na sɗik, nɵa lai pinziba na zamai paŋ aga a sa wuzani sek-sek. Aga e si haa e siini. aga e vidi edi tran maini na ɓa e ɗi ka duk kai nɵa.

¹⁷ Amma nagai n'e kurɗisi edi, aga e nivi hlai zi ŋoyai amai midiɗi huwuŋ Siyon, Aga te bunda edi sɗik pra, pinzibani Yakob aga e tiki aftiɗi na ɗai e tikiŋ tiɗi par ɗa.

¹⁸ Pinzibani Yakob aga e bindi aŋ afu, pinzibani Yusef, aŋ alesni afu, amma pinzibani Ezaw aga e bindi aŋ brogo. Pinzibani Yakob gaini pinzibani Yusef aga e tiki pini e yiŋ edi, ɗif ktai ma aga a hina piɗi kai, buri Ta EPIƊ-ƊAI mu muɗa ya.

¹⁹ Nagai aga e tiki afti na Negef, huwuŋ na wiini Ezaw, afti na piɗi futi na koskoi sek, afti na wiiɗi Filistrekai, afti na wiini Efrayim gaini afti na wiiɗi Samariya lai. Benyamin aga a tika afti na Galaad lai.

²⁰ Aliɗi Izrayel n'e yimiɗi min gaw, n'e zi aŋ vok n'abai na wiiɗi askarai, aga e birgiɗi ɗai na Kanaan haa a Sarepta, ɗai na Yeruzalem n'e yimiɗi mini gaw n'e ɗa war Sefarad, aga e mili fuŋ n'abakai na midini afti na negev.

²¹ Won hlai n'e pilitisi Yeruzalem edili ɗa aga e hili e tikiti huwuŋ na wiini Ezaw kapai e ŋiti paiɗi midiɗi, amma EPIƊ-ƊAI gaini midini dama aga a sumna aŋ pai midiɗi ɗaini.