2 Yohana 1 - Ɗû na sɗik na wiini Alaw

Ɵiɓini wuti

¹ Ta n'abai ɗa, mu dara mu ɗo siɗi Kuriya, zi viri n'edi, gaiɗi aliɗi na ta mu diriti jre jre. -Mu ta kiya kai, amma nagai paŋ n'e siɗi jre ɗa lai-

² Pin jre n'aŋ warmu, n'aga a sumna gaimu haa hlai n'a vada kai.

³ Yum, gaini hiinini haw gaini ɵeɗ na wiini Alaw Api, gaini na wiini Yesu Kristu n'Ahini Api a sumna gaiki war jre, war diri lai.

Seŋ zi gadai na sin Api par

⁴ Mu firiya abai gara buri mu niviɗi zamai arbaɗi aliku e ɗa piyi war jre, pin gadai na mi niviŋsi sini Api par.

⁵ Tiyana mu siiwuku, tuku Kuriya zi diri gara, -na mu ɗoɗi suku na ɗa a gadai na hehe kai, amma a ni na mu nuvuŋmusi war pi zi tiki par ɗa, -ɓa mu durumu marmu arbaɗi marmu.

⁶ Diri a siŋka edi war zi na pin gadai, hanɗa a gadai n'aga ki piyi warni ɗa, maini na ki ɵiniŋ war pi zi tiki par ɗa nɵa.

Hitri na wiini Kristu

⁷ Buri ɓa ɗai zi rhi ɗai viya e birisi e ɗa edi warɗi yai, miɗi na ɓa Yesu Kristu a halasi war neŋ-si ɗa, e diri e yimiŋ kai, ɗif zi rhai zaw antikristu ɗa a siŋka edi war hanɗa.

⁸ Ki giɗimi siki pɗem kapai ki bi alini wala na mu zumu sɗa burini edi kai, amma kapai ki nivi vrak na pɗem na gaini futini.

⁹ Asiya ɗi paŋ n'a sirɓa li edi gaigai n'a dara a sumna war hitri na wiini Kristu kai ɗa, Alaw aŋ gaini kai, amma ni n'a sumna war hitri hanɗa, Api gaini ahi e ɗa gaini.

¹⁰ Na ɓa ɗif a halaɗi siki aŋ ɗûglûki gaini hitri hanɗa kai ɗa, ki yimiŋ siki kai, ki ɵiɓini wuti maa kai.

¹¹ Buri ni n'a ɵiɓini wuti ɗa a tapa gaini war sdani na meefeŋ.

Wuti n'asakal

¹² ɵa kai ɗa, wazagai viya aŋ mada, na mu ɗoŋ siki, mu firiya mu ɗoŋ war kat kat gaini ankre kai, amma mu firiya mu halaɗi mu ɗûglûki, mu muɗumu miɗi marmu lai, kapai firiyi na wiimu a va amai.

¹³ Aliɗi tawalku zi viri edi ɗa, e ɵuɓuku wuti.