2 Timotewus 3 - Ɗû na sɗik na wiini Alaw

Hangalɗi ɗai war mefeŋ n'asakal

¹ Ku yimaŋ muduku pɗem ɓa war mefeŋ n'asakal ɗa, hlai zi gir aga a halasi.

² Buri ɓa ɗai aga e bindi mozgokai, e diri ɗa a farai, e zili siɗi amai, e kûli siɗi, e tirki Alaw, e gidi piɗi tamaiɗi kai, tese warɗi kai, e si hormo wiini wala na sɗik kai,

³ hiinini haw warɗi kai, e hiɗi azumai kai, e miɗi meefeŋ siɗi marɗi, e ɗili siɗi kai, maafanai gara, e diri wala na pɗem kai,

⁴ e wi piɗi marɗi amai, e zi hiy witaw, gaini ŋulvi tik tini kûlûni-si, e diri dirini neŋ-si ɗa a suwa Alaw.

⁵ E zi siɗi maini n'e hûni pin Alaw nɵa, amma aga e siɗi spakni kai; ku yima suku edi siɗi nagai na maini hanɗa nɵa par.

⁶ Zamai arbaɗi ɗa e niyi aha war dalam aŋe miliɗi falakai na yelɗi a kiɗa kai, tuwurɗi viya, na dirini neŋ-si zamai zamai a na kiɵiwiiɗi, warni azaw na wiiɗi,

⁷ n'a kureɗ e ɗa war hitri, amma e kiɗi aŋ gi sin siɗi na jre kai.

⁸ Maini Yannes gaini Yambres e fiki amai sin Musus, nɵa lai, nagai hanɗa e fiki amai sin jre, e ɗi ɗai na hiiniɗi a na ɗikat kai, a gasi burini yimi ɗa e kiɗi aŋ kɵi kai,

⁹ Amma nagai aga e hili wuzaɗi a suwa kir kai, buri dûûli na wiiɗi aga a siŋka edi wuzani arɗi ɗai paŋ, maini na wiiɗi ɗai na sulu hanɗa nɵa.

Gadai na wiini Pawlus sin Timotewus

¹⁰ Amma tuku ɗa, tala sa par war hitraiŋa, war payaiŋa, war wazagai n'a mu rgaŋ wara aŋ zaŋ ɗa, war yimi na wiya, war hangalŋa, war diri na wiya, war siiki na wiya,

¹¹ war gir n'e ziŋa, war gir na mu sɗaŋ war Antiyokiya, war Ikonium, war Listra lai, gir na mu sɗaŋ kai ɗa a na wata ɗa? War hanɗa par paŋ Epiɗ-ɗai a plaŋasi edi.

¹² A na ɗa maini hanɗa nɵa, nagai paŋ n'e diri e piyi war hunai na pin Alaw war Kristu Yesu ɗa, aga e siɗi gir.

¹³ Amma nagai na maafanai gaiɗi zi rhai ɗa, aga e hili wuzaɗi a suwa a suwa war meefeŋ ɗa, aga e wûliɗi na zamai ɗa edi, e wili siɗi dama edi lai.

¹⁴ Amma tuku ɗa ku ɗiya warni wazagai na ku hitraŋ ɗa zaw, war wazagai na ku yimaŋ ɓa a jre, buri ku sɗa ni n'a hitruŋku ɗa,

¹⁵ haa war agwiku par ku sɗa ɗû na sɗik ɗa a kiɗa a suku yel n'a kiɗa a kuku sin kûri, pin yimi na war Kristu Yesu.

¹⁶ Ɗû paŋ a halasi sin Alaw par, a na buri a hitra ɗif, buri a hogo hitrai na maafanai edi, buri a ɗopo ɗif, buri a gada war jre-ɗikat,

¹⁷ kapai ɗif na wiini Alaw, a za aŋ ɗif na gaini wili amai ta, na gaini zizini gaini futini burini sɗa na pŋmai paŋ.