2 Timotewus 2 - Ɗû na sɗik na wiini Alaw

Askar na pɗem na wiini Yesu Kristu

¹ Nɵa ɗa, tuku ahiya, ku ɗiya pɗem war yum n'a na war Yesu Kristu.

² Wazagai na ku ɵinaŋ ma par wuzaɗi zaidakai viya, ku siŋɗi wiiɗi ɗai na jrekai, na nagai lai e kiɗi e hitriŋɗi wiiɗi ɗai zamai.

³ Ku tapa gaya war gir maini askar na pɗem na wiini Kristu Yesu nɵa.

⁴ Askar n'aŋ war sdani askar ɗa a sɗa aŋ wa sini war seŋ zamai zamai kai, kapai a sini firiyi wiini ni n'a tikaŋ war sɗa ɗa.

⁵ Ɗif n'a daba was ɗa, a sɗa aŋ niviti bogorai ɗa sai na ɓa a daba was li maini n'a na ɗa nɵa.

⁶ Ɗif zi hirim n'a na sɗa gir ɗa, a ni aga a nava alini luwuŋ avut ɗa.

⁷ Na mu muɗuŋku na ɗa, hiinaŋ pɗem, Epiɗ-ɗai aga a suku yel war wazagai paŋ.

Hina muduku a kɵa gaini Yesu Kristu n'a ɵiya amai

⁸ Hina muduku a kɵa gaini Yesu Kristu, n'a ɵiyasi amai arbaɗi zi mri par, pin labar na pɗem na mu na ɓakaŋ ɗa, a wa war pinzibani David.

⁹ Labar na pɗem na mu na sɗa gir burini, ha a e wiŋa jaɓ ma ta, maini ɗif na meefeŋ nɵa, amma seŋ n'Alaw ɗa aŋ warni jaɓ kai.

¹⁰ Nɵa ɗa, mu luba paŋ na ɗa buriɗi zi viri-n'edi, kapai nagai lai e gi sin kûri na war Kristu Yesu gaiɗi abai na te vada kai ɗa lai.

¹¹ Seŋ hanɗa a jre: na ɓa mu ɗuma gaini Ni ɗa, aga mu sumnumu karmu gaini ni lai,

¹² na ɓa mu siikumu li war yimi ɗa, aga mu ŋumu gaini ni lai, na ɓa mu muɗumu li ɓa mu suɗuŋmu kai ɗa, ni aga a muɗa ɓa a suɗumu kaalai.

¹³ Na ɓa mu ɗiyumu war jre kai ɗa ni ɗa a na ɗa jre ɵa, buri ɓa n'a muɗaŋ ɗa a zaŋ ɗa maini n'a na ɗa ɵa.

Ɗif zi sɗa n'a kiɗa a tika siyer kai

¹⁴ Aga ku ɵiɗi midiɗi ɗai maini nɵa, ku gidiɗi miɗi wuzani Alaw buri aga e sispi arbaɗi marɗi pin wala zi yiki ɗa kai, buri a za wala na pɗem siɗi kai, a tûûriɗi edi ɗa e ɗi nagai n'e ɵiniŋ ɗa.

¹⁵ Ku fuɗa was aŋ ɗiya wuzani Alaw maini ɗif na gai titimi tam nɵa, ɗif zi sɗa n'a kiɗa a tika siyer kai, n'a hitra seŋ na jre edi woɗi futini ɗikat.

¹⁶ Seŋ zi miɗi na baiya kadai na haharai ɗa, ku hinaŋ a niyasi muku par kai, nagai n'e zi hanɗa kureɗ, e hili wuzaɗi sek sek sini meefeŋ.

¹⁷ Seŋɗi a suma hlai maini guɗoŋ n'a luma neŋni ɗif nɵa, Himenewus gaini Filetus e ɗa arbaɗi ɗai hanɗa.

¹⁸ Nagai ɗa e vigi edi ɵimaɗi jre ɗaw, e miɗiɗi wiiɗi ɗai ɓa ɵiyi n'amai ɗa a za ya, e ki ɗai zamai e hini yimiɗi edi.

Ezini dalam n'Alaw a toroŋ azumai

¹⁹ Paŋktai ezini dalam n'Alaw a toroŋ azumai gai futini ɗa, wala a muguzaŋ kai, seŋ n'aŋ gaini ɗû amai sini a na maini nɵa Epiɗ-ɗai a siɗiɗi nagai na wiini ya, pra ɓa asiya asiya paŋ n'a yika yikini Epiɗ-ɗai ɗa aga a yima sini edi sin meefeŋ par.

²⁰ Aha warɗi pakatai n'amai ɗa, a na ɗa a tasa zi or gaini zi arzaŋ kiini kai, amma zi luwuŋ gaini z’ afti a na lai, na zamai ɗa e zi gaini ɗa a sɗa na pɗamai, na zamai e zi gaini ɗa a sɗa na pɗamai kaalai.

²¹ Na ɓa ɗif a za sini edi hilu a tapa gaiɗi ɗai hanɗa kaalai ɗa aga a za aŋ tasa burini sɗa na pɗem, na sɗik, n'epin-gezani a kiɗa a za sda gaini, a kiɗa burini sɗa na pɗamai paŋ.

Ɗif zi sɗa na wiini Epiɗ-ɗai

²² Pra edi wuzani diri na meefeŋ na wiiɗi gawla, amma ku paya war jre-ɗikat, war yimi, war diri, war ɵeɗ gaiɗi nagai n'e yiki yikini Epiɗ-ɗai gaini agul na hilu.

²³ Amma sispai na baiya kadai zi dûûli ɗa, ku ɗiya sini kai, buri ɓa a kasi hiy.

²⁴ Kadai tiɓ ɗa, ɗif zi sɗa na wiini Epiɗ-ɗai ɗa aza hiy kai, a sumna gaini hangal gaiɗi ɗai paŋ, a kiɗa aŋ hitriɗi ɗai, a yima seŋ na meefeŋ sini lai,

²⁵ Nagai n'e pi seŋ arni ɗa, a gidiɗi gaini hangal, Alaw a kiɗaa wiyiɗisi hiiniɗi sini hi-miy aŋ gi sin siɗi na jre lai.

²⁶ Aŋ wiyisi war hiiniɗi na pɗem, aŋ prisi edi min azaw na wiini mat, n'a yimiɗi aŋ miliɗi azumai pin diri na wiini lai.