2 Tesalonikekai 3 - Ɗû na sɗik na wiini Alaw

Ki siiwi buriyi

¹ N'a hina ɓa tawalakai, ki siiwi buriyi, kapai seŋ na wiini Epiɗ-ɗai a hala wuzani, a nava kol lai maini n'ahaki nɵa.

² Kapai tiyi mi nivi pli n'edi tiɗi ɗai na maafanai, gaiɗi na jrekai kai ɗa par lai, buri ɓa yimi ɗa aŋ warɗi ɗai paŋ kai.

³ Amma Epiɗ-ɗai ɗa a jre, aga a siki gdaŋ, a kûtiki tini na meefeŋ par,

⁴ tiyi mi yimi fakat war Epiɗ-ɗai ɓa: ki ɗa zi wazagai na mu miɗiki gaini ɗa, aga ki ziŋ wuzaki sek a suwa pra.

⁵ A juva ɓa Epiɗ-ɗai a bundasi agulki sin diri na wiini Alaw sek gaini siiki na wiini Kristu.

Zi sɗa maini apostel ɗa nɵa

⁶ Tawalakai, mi gidiki na ɗa war yikini Epiɗ-ɗai Yesu Kristu, buri ki yimi siki edi sini tawal paŋ n'a na paya war tûrli, n'a paya pin hitrai na tiyi mi hitriŋki kaalai.

⁷ Tiki dama ki siɗi maɵa ɗa aga ki tiki eziyi; buri tiyi mi simni arbaki war tûrli kai.

⁸ Tiyi mi simi simini ɗif kadai meere kai, amma mi zi sda, mi kiyi duvuk gaini girvudi paŋ, kapai mi hilni aŋ guma midini ɗif ktai kai.

⁹ Hanɗa buri ɓa mi kiɗi mi simi siki par kai ɗa kai, amma mi firiyi ɓa mi hini aŋ wala na ki tiiki sini par.

¹⁰ Buri nɵa, won hlai na mi ɗisi ka ahaki ɗa, mi gidiki maini nɵa: na ɓa ɗif a dara a za sda kai ɗa a pɗem ɓa a suma kaalai.

¹¹ Amma tiyi mi ɗa ɵini ɓa zamai arbaki e piyi na ɗa war tûrli, e niyi war seŋ na wiiɗi warni kai.

¹² Tiyi mi diri mi gidiɗi ɗai na maini hanɗa nɵa ɗa, mi siɗi arai zi pi war Yesu Kristu, buri ag e zi sɗa gaini hangalɗi, kapai e simi war gdaŋɗi dama lai.

¹³ Amma tiki ɗa tawalakai, ki kiyi war sɗa na pɗamai kai.

¹⁴ Na ɓa ɗif a dara a za pin seŋ na mi miɗiŋ war letre hanɗa kai ɗa, ki ɓliŋ edi su, ki tipi gaini kai, kapai a tika siyer.

¹⁵ Amma aga ki yimiŋ maini gawki nɵa kai, amma aga ki gidiŋ maini tawal nɵa.

Ɓiki gaini wuti

¹⁶ Epiɗ-ɗai zi ɵeɗ gaini midini dama a siki ɵeɗ, war hlai paŋ maini n'a hiinaŋ nɵa. Epiɗ-ɗai a sumna gaiki paŋ.

¹⁷ Hanɗa a ɵiɓini wuti na wiya Pawlus gaini ta mal, hanɗa a siye na wiya wa letre kaya paŋ, hanɗa a ɗû na wiya.

¹⁸ Yum na wiini Epiɗ-ɗaimu Yesu Kristu a sumna gaiki paŋ.