2 Tesalonikekai 1 - Ɗû na sɗik na wiini Alaw

Ɵiɓini wuti

¹ Pawlus gaini Silvanus gaini Timotewus sin tipi na wiiɗi Tesalonikekai n'e ɗa war Alaw Apumu gaini Epiɗ-ɗai Yesu Kristu.

² Alaw Apumu, gaini Epiɗ-ɗai Yesu Kristu, e siki yum gaini ɵeɗ lai.

Sariya n'ga te za war gizini Epiɗ-ɗai

³ Tawalakai, a dewele buriyi, buri mi si tese sin Alaw kûreɗ-kûreɗ buriki, hanɗa woɗi futini lai, buri ɓa yimi na wiiki a na wula, diri n'arbaɗi marki a na riya amai a suwa, a suwa lai.

⁴ Nɵa tiyi mi kûli siyi gaiki, war tipi na wiini Alaw burini siiki gaini yimi na wiiki, warni gir na ki siɗiŋ, gaini hûwyi zamai zamai na ki ɗa libiŋ ɗa lai.

⁵ Hanɗa a wala n'a siŋka ɓa sariya na jre na wiini Alaw na hanɗa kapai a siŋkiki edi ɓa, ki ɗi aliɗi pai n'Alaw, na ki ɗa siɗi gir buriɗi na ɗa jre jre.

⁶ Na ɓa a jre, ɓa a tala arni Alaw pɗem, buri a ziɗi gir wiiɗi nagai n'e ziki gir ɗa,

⁷ na ɓa, wiiki tiki na ki ɗa war gir ɗa, a siki si n'amla gaiyi tiyi, won hlai n'EPIƊ-ƊAI Yesu aga a siŋkasi sini amai war fuŋ n'Alaw par, gaiɗi ɗai zi ɵeŋ na war fuŋ n'Alaw na zi spak ɗa pini.

⁸ Arbani afu n'a na ya, aŋ ziɗi sariya, wiiɗi nagai n'e siɗi Alaw kai, gaiɗi n'e zi pini labar na pɗem na wiini Epiɗ-ɗaimu Yesu kai,

⁹ Ɗai hanɗa, vrak na wiiɗi n'aga e niviŋ ɗa a ɓilki n'edi na vada kai, edi gaigai sin Epiɗ-ɗai par, sin spakni n'abai ɗa par lai.

¹⁰ Won hlai n'aga a halasi aŋ niviti abai arbaɗi na sɗik na wiini, war mefeŋ ni ɗa, nagai n'e yimi paŋ aga e siɗiŋ, e bindi hiyak lai ɗa, -buri ɓa tiki ki yimi zaida a wiyi- nkam war mefeŋ hanɗa.

¹¹ Buri nɵa, tiyi mi ɗa siiwi buriki kureɗ-kureɗ, kapai Alaw na wiimu a yimiki aŋ ɗai na ki kiɗi miɗini yiki n'a yikikisi ɗa, kapai a va hiini na pɗem paŋ, gaini sɗa zi yum paŋ amai gaini spak.

¹² Kapai yikini Epiɗ-ɗaimu Yesu a nava kol warki, tiki war ni lai, pin yum na wiini Alaw na wiimu, gaini Epiɗ-ɗaimu Yesu Kristu.