2 Samuwel 9 - Ɗû na sɗik na wiini Alaw

ƊAI N'E SIMI PAI PIƊI MARƊI TA TA MIDIƊI PARAMAINI DAVID David a siŋkiti pɗemni sini Mefiboset n'ahini Yonatan

¹ Mefeŋ ktai David a zilba a muɗa: pinzibani Sawul ɗa, ktai n'a hina karni na mu kiɗa mu za pɗem sini burini Yonatan ɗa aŋ kai ɗi?

² Ɗif zi sda ktai a na fu ahani Sawul, yikini ɓa: Siba, e kiŋsi sini pai David, pai a zilbaŋ: Ku tuku Siba tiɓ ɗi? A wiyini seŋ: Jaamus, nkam, mu ta tiɓ.

³ Pai a zilbaŋ: War pinzibani Sawul ɗa, ɗif ktai ma a hina kir kai ɗi, mu firiya mu za pɗem sini maini n'Alaw a dara nɵa. Siba a wiyini seŋ wiini pai, jamus: Ahini Yonatan ktai a na, ezini sulu paŋ gaini mri ca.

⁴ Pai a zilbaŋ: Tiyana aŋ wata ɗa? Siba a wiyini seŋ: Jaamus, a na ahani Makir n'ahini Ammiyel na Lo-debar par.

⁵ Pai David a ɵina ɗai pini aŋ piyiŋnisi ahani Makir n'ahini Ammiyel n'a Lo-debar par.

⁶ Mefiboset n'ahini Yonatan, n'ahini Sawul a cosi wuzani David. A hurga azumai wuzani, a pa arni azumai, David a zilbaŋ ɓa: Hanɗa ku tuku Mefiboset tiɓ ɗi? A wiyini seŋ: jamus, mu ta tiɓ.

⁷ David a miɗini: Ku huna kai, aga mu zuku pɗem burini Yonatan na apuku, aga mu wuyuku afti na wiini Sawul na tiyku paŋ, tuku aga ku suma ɗa a simi na ta mu sumaŋ ɗa ɵa haa kureɗ.

⁸ A hurga azumai a miɗini wiini David: Ta m'aŋ na maini hirge na gaini mri su ɵa lai ɗa, ku hiina buriya nɵa maɵa maɵa ɗa?

⁹ Pai a yika Siba ɗif zi sda na wiini Sawul, a miɗini: Wazagai na wiini Sawul n'epin-gezaku gaini na wiini pinzibani paŋ, mu firiya mu siŋni wiini Mefiboset na tiyni ca.

¹⁰ Tuku gaiɗi aliku, gaiɗi ɗaiku zi sda lai aga ki hirmi burini, na ki niviŋsi li ɗa, a hina aŋ simi na wiiɗi pakataini. Amma Mefiboset ɗa aga a suma ɗa a simi na ta mu sumaŋ ɗa ɵa haa kureɗ. Siba a na fu gaiɗi ali doogo pi ɵim, ɗai zi sda caaɓa lai.

¹¹ Siba a miɗini wiini pai: jamus na ku muɗaŋa miɗini paŋ ɗa aga mu za hanɗa. Amma Mefiboset aga a suma ɗa a simi na ta mu sumaŋ ɗa. Buri ɓa ni a tiyni Sawul.

¹² Mefiboset, ahini ktai a na gawla yikini ɓa: Mika. Ɗai na ahani Siba paŋ e ɗa war ɵeŋ na wiini Mefiboset.

¹³ Mefiboset, a sumna a Yeruzalem buri ɓa a suma ɗa a simi na wiini pai ɗa. Ezini sulu paŋ a na fu gaini mri ca.