2 Samuwel 7 - Ɗû na sɗik na wiini Alaw

Seŋ na wuze na wiini Natan

¹ Won hlai na pai a sumna li aha war dalamni zi pai, Won hlai n'EPIƊ-ƊAI a sini simni na ɵeɗ li gaiɗi gawni na ɵimani lai ɗa,

² mefeŋ ktai, pai a miɗini wiini ɗif na mini Alaw Natan maini nɵa: Tala, ta mu sumna amlai warɗi dilimi zi luwuŋ Sedre, amma zunduk na wiini Alaw ɗa a na amlai war gumu zi sapa koo.

³ Natan a wiyini seŋ wiini pai: Na ku dara ku zaŋ paŋ ɗa, hala zaŋ, buri EPIƊ-ƊAI a na gaiku.

⁴ Amma war duvuk hanɗa EPIƊ-ƊAI a miɗini wiini Natan maini nɵa:

⁵ Hala miɗini wiini David na ɵeŋa ɓa EPIƊ-ƊAI a na muɗa maini nɵa: Ku rgaŋa Dalam na mu sumna warni ku tuku ɗi?

⁶ Haa sini mefeŋ na mu miliɗisi aliɗi Izrayel edi war Egipte par haa girna, hlai zi simni na wiya ɗa a gumu ɵa ɵa.

⁷ Buza na mu zaŋ gaiɗi aliɗi Izrayel na ta, na mu na piɗi su na ɗa, mu miɗini ka wiini ktai arbaɗi pinziba na war Izrayel na mu varaŋ aŋ ɵa wuzaɗi ɗaiŋa na Izrayel ɗa ɓa: ku rgaŋa dalam zi luwuŋ Sedre kai buri ma ɗa ɗi?

⁸ Tiyana ɗa, aga ku miɗini wiini David na ɵeŋa ɓa EPIƊ-ƊAI, Alaw zi spak paŋ a na muɗa maini nɵa: Mu yumukusi edi war hlai zi simi farai par, pin fara par ɓa kapai ku bunda aŋ pai midiɗi Izrayel na ɗaiŋa mu ta.

⁹ Mu na fu gaiku woɗi paŋ na ku hala woni paŋ, mu fiɗiɗi gawku edi wuzaku. Mu bunda yikuku a wa gara maiɗi ɗai n'abakai na midini afti ɗa nɵa.

¹⁰ Aga mu piyiɗi hlai wiiɗi ɗaiŋa na Izrayel ta, mu miliɗi warni ca, e hini warni ɵa. Aga e jiriyi wuzani ɗif kir kai, ɗai na maafanai aga e siɗiɗi gir arɗi maini n'avut par nɵa kir kai,

¹¹ maini na war mefeŋ na mu miliɗi gaŋgalaŋai aŋ ŋi midiɗi Izrayel na ɗaiŋa nɵa kir kai. Mu suku simni na ɵeɗ wuzaɗi gawku paŋ. EPIƊ-ƊAI mu zuku zaida na ɗa ɓa Ta EPIƊ-ƊAI aga mu muluku fuŋ.

¹² Won hlai na mefeŋku a va li, ku hala li gaiɗi tamaiku ɗa, aga mu sa rɗi n'amai wiini pinzibaku, ktai arbaɗi ali na warku par, aga mu ɗiyiti paini gdeŋi.

¹³ Aga a rgaŋa Dalam wiya ɗa a ni, aga mu ɗiyiti paramaini zi pai gdeŋi haa kureɗ.

¹⁴ Aga mu bunda aŋ api, ni aga a bunda aŋ ahi lai. Na ɓa a za meefeŋ li aga mu ɵiɓaŋ gaini amaraŋa maini api n'a ɵiɓa ahini nɵa.

¹⁵ Amma pɗem n'arba gaini ɗa aga mu ɗiyaŋ ta maini na mu zaŋ sini Sawul na wuzaku par ɵa kir kai.

¹⁶ Asakalku tuku par, pinzibaku gaiɗi paiku, wala ktai n'aga a muguzaŋ aŋ kai ɵa gamai, paramaiku aga te ɗiya gdeŋi ɵa gamai lai.

¹⁷ Natan a miɗini seŋ wiini David pin seŋ n'EPIƊ-ƊAI a miɗiŋni gaini wala n'a siŋkiŋni arni ɗa lai.

David a siiwa EPIƊ-ƊAI

¹⁸ Pai David a halasi a sumna wuzani EPIƊ-ƊAI a muɗa: Epiɗ-ɗai ALAW, ta mu siya ktai ɗa? Pinzibaŋa a na wata lai ɗa, na kapai ku zaŋa aŋ ɗif na maini hanɗa ɵa ɗa?

¹⁹ A ni ta kai Alaw EPIƊ-ƊAI, pra ku za ɵinini-ha sini pinzibaŋa na asakal sek gaigai, ɗif ɗa e ziŋ ɵa lai ɗi, Alaw EPIƊ-ƊAI!

²⁰ Ta David mu muɗuku zamai ɗa a ma! Tuku ku sɗaŋa ya koo, Epiɗ-ɗai ALAW.

²¹ Ku va wazagai n'abakai hanɗa amai pin miɗi na ku muɗaŋ gaini hiini na ku rgaŋ warku, ku siŋkaŋa wazagai hanɗa ara ta na ɵeŋku.

²² Pra, Epiɗ-ɗai ALAW, ku suwa abai gara: maiku muku kai, Alaw zamai aŋ kir kai sai ku tuku ktai, pini wala na mi ɵiniŋ gaini ɵimayi ɗa.

²³ Pinziba ktai midini afti, n'a kata gaiɗi Izrayel na ɗaiku nɵa a na ɗi? Pinziba n'Alaw a hala a wuraŋsi kapai a zaŋ aŋ pinziba na wiini, n'a hina yikini a wa gara lai a na ɗi? Tuku ku za wazagai n'abakai n'a bunda ɗif hiyak burini aftiku, wuzani arɗi ɗaiku, wazagai zi mili hunai pini ɗif. Pinziba na kata gaiɗi ɗaiku, na ku wûriɗisi war Egipte par, tini pinziba hanɗa gaini alawai na wiini par lai, a na ɗi?

²⁴ Tuku ku ziɗi Izrayel na ɗaiku aŋ ɗaiku ɵa gamai, tuku EPIƊ-ƊAI ɗe ku bunda aŋ Alaw na wiiɗi lai.

²⁵ Tiyana ɗa, Epiɗ-ɗai Alaw, ɵinini-ha na ku zaŋa wiya ta na ɵeŋku gaini pinzibaŋa ɗa, ku hina muduku a wula gaini kai zaŋ, za maini na ku muɗaŋ ɗa nɵa.

²⁶ A juva ɓa yikuku a nava kol haa kureɗ, ɗai e miɗi lai ɓa: EPIƊ-ƊAI, Alaw zi spak paŋ a Alaw na wiiɗi Izrayel. A juva ɓa pinzibaŋa ta David na ɵeŋku ɗa, a hina warɗi pai wuzani arku ɵa.

²⁷ Ta ɵeŋku mu nava gdaŋ aŋ siiwuku maini hanɗa nɵa buri ɓa tuku dama EPIƊ-ƊAI, Alaw zi spak paŋ, Alaw na wiiɗi Izrayel, ku zaŋa zaida wiya ta ɓa: Aga ku mulaŋa fuŋ.

²⁸ Tiyana ɗa, Epiɗ-ɗai ALAW, Alaw ku tuku, seŋku eles warni kai, ku muɗaŋa midini wazagai na pɗamai hanɗa li.

²⁹ Tiyana ɗa, ɓikiɗi pinzibaŋa ta na ɵeŋku ta, kapai e ŋi kureɗ wuzani arku, buri ɓa ku muɗa ku tuku Epiɗ-ɗai ALAW, won hlai na ku ɓaka pinzibaŋa ta na ɵeŋku li ɗa, ɓiki hanɗa aga a sumna midini ɵa haa kureɗ.