2 Samuwel 6 - Ɗû na sɗik na wiini Alaw

David a rga warni aŋ zogo zunduk na wiini EPIƊ-ƊAI a Yeruzalem

¹ David a tipiɗi askarai na Izrayel na tiɗi a pa edi kai ɗa pra, e zi paŋ dubu doogo doogo hu.

² David gaiɗi ɗai na gaini paŋ, e hili a Baale-Yuda par kapai e tikisi zunduk na wiini Alaw. Zunduk na yiki aŋ midini, yiki na wiini EPIƊ-ƊAI, Alaw zi spak paŋ, n'a sumna amai midiɗi Kerubimkai.

³ E tiki zunduk na wiini Alaw amai warni Saret na hehe ta, e tikiŋsi ahani Abinadab amai midini hlai na boŋor par. Uzza gaini Ahiyo n'alini Abinadab e hilisi gaini saret na hehe ɗa.

⁴ E hilisi gaini ahani Abinadab par amai midini hlai na boŋor gaini zunduk na wiini Alaw warni ta, Ahiyo a hala gaini.

⁵ David gaiɗi aliɗi Izrayel paŋ e siŋki firyiɗi edi wuzani EPIƊ-ƊAI gaini wazagai n'e zini yama gaini zi luwuŋ Sipre maini: gaŋgraŋ, adill, gaŋga, goŋjomai gaini kawai n'a wa lai.

⁶ E cûsi sini luluf na wiini Nakon ɗa, ezini ɵaakai a sirɓa, zunduk na wiini Alaw a firya a kɵa, nɵa Uzza a wa tini a cakaŋ amai.

⁷ Nɵa EPIƊ-ƊAI a faka gaini hiy sini Uzza. Alaw a fuɗaŋ war hlai ni tizaw, buri sda zi dûûli n'a zaŋ ɗa. A mra war hlai ni, ɵimani zunduk na wiini Alaw ɗa.

⁸ David hangalni a tuura gara, buri EPIƊ-ƊAI a ɓasa baŋa gaini fiɗini Uzza ɗa. Haa girna e sini yiki wiini hlai hanɗa ɓa: Peres Uzza.

⁹ David hunai te yimaŋ wuzani EPIƊ-ƊAI war mefeŋ ni ɗa a muɗa: kapai zunduk na wiini EPIƊ-ƊAI a sumna ahaya maɵa maɵa ɗa?

¹⁰ David a bla cok, a firya a jogosi zunduk na wiini EPIƊ-ƊAI ahani war fuŋ n'abai na wiini David ɗa kir kai, a kaŋ ahani Obed-Edom na Gat ɗa ta.

¹¹ Zunduk na wiini EPIƊ-ƊAI a hina ahani Obed-Edom ɵa ta haa tile hu. EPIƊ-ƊAI a ɓaka Obed-Edom gaini dalamni paŋ.

Zunduk zi bonu a cosi aha war Yeruzalem

¹² Ɗai e hilisi e miɗini wiini pai David: EPIƊ-ƊAI a ɓaka dalamni Obed-Edom gaini wazagaini paŋ buri zunduk na wiini Alaw ɗa. Nɵa David a hala a jogosi zunduk na wiini Alaw ahani Obed-Edom par aha war fuŋ n'abai na wiini David sek war firiyi.

¹³ Won hlai na ɗai n'e libi zunduk na wiini EPIƊ-ƊAI e ŋi eziɗi ɵaara tar ɗa David a za ɓaka gaini gari ktai, ahi ɵe na nur nur ktai lai.

¹⁴ David a didima wuzani EPIƊ-ƊAI gaini gdaŋni paŋ. A wa sini a sapa zi leŋ na wiiɗi paakai zi ɓaka n'e yikiŋ ɓa Efod ɗa bas.

¹⁵ David gaiɗi ɗai na Izrayel ɗa paŋ e libi zunduk na wiini EPIƊ-ƊAI a Yeruzalem arbani suura zi firyi gaini miyok.

¹⁶ Won hlai na zunduk na wiini EPIƊ-ƊAI a niyasi aha war fuŋ n'abai na wiini David ɗa, Mikal n'ahini Sawul te wasi wulaɗi arni fenetre te tala pai David a na pra amai, a fulɗuma lai wuzani EPIƊ-ƊAI, te miisaŋ warɗi agulɗi.

¹⁷ E ki zunduk na wiini EPIƊ-ƊAI ɗa amlai, e tikiŋ war hlai n'a zizina burini, amlai arba war gumu na David a zizinaŋ burini ta. David a za ɓaka zi yi gaini ɓaka zi ɵeɗ wuzani EPIƊ-ƊAI.

¹⁸ Won hlai na David a vada li gaini ɓaka zi yi gaini ɓaka zi ɵeɗ lai ɗa, a ɓikiɗi ɗai war yikini EPIƊ-ƊAI, Alaw zi spak paŋ.

¹⁹ Asakal par, a ɓûrwiɗi wala zi simi wiiɗi ɗai paŋ, wiini faraɗi ɗai na Izrayel paŋ, wus kai, muni kai, ɗif paŋ a nava gamla ktai, lagiya na gaini tumur ktai, lagiya na gaini alini luwuŋ zi vin na huleŋ ktai lai. Asakal par ɗai e ɵiri, ɗif paŋ a waya ahani ahani.

²⁰ David a hala aha aŋ ɵiɓa wuti wiini dalamni. Mikal n'ahini Sawul te halasi mini te miɗini: Pai na Izrayel, girna ku nava kol li koo, sapa kaw paɵaku kai arbaɗi bagakai na maɵagai gaiɗi na falakai blaŋ maini ɗif na nafani kai ɵa lai ɗa

²¹ David a wiyiɗi seŋ wiiɗi Mikal: Mu didima na ɗa wuzani EPIƊ-ƊAI n'a varaŋa, n'a daraŋa a suwa apuku gaiɗi pinzibani paŋ kapai a tikaŋa aŋ pai midiɗi Izrayel na ɗaini ɗa. Mu siŋka firyiŋa na ɗa wuzani.

²² Aga mu hosa sa azumai a suwa pra, haa ta dama mu sɗa sa ɓa mu ba hormoŋa edi ta. Amma arɗi bagakai na falakai na ku muɗa gaiɗi na ɗa, aga mu nava kol.

²³ Mikal n'ahini Sawul te wa ahi kai haa te mra ɵa.