2 Samuwel 5 - Ɗû na sɗik na wiini Alaw

David a bunda aŋ pai na Izrayel

¹ Nɵa pinziba na Izrayel ɗa, e hilisi sini David a Hebron e miɗini: Tiyi mi ɗi keɵkeku, mi ɗi neŋ suku lai.

² Buza a zasi viya, hlai na Sawul a na ka aŋ pai na wiyi tekeɗeɗi, ku ɵa wuzaɗi aliɗi Izrayel edi mini hatam ku tuku, ku wiyiɗisi aha ku tuku lai. EPIƊ-ƊAI a muɗuku ya lai ɓa aga ku ɵa wuzaɗi Izrayel na ɗaiŋa ku tuku, aga ku za aŋ pai midiɗi Izrayel ku tuku lai.

³ N'abakai n'arbaɗi aliɗi Izrayel paŋ e hilisi sini pai a Hebron, pai David a za bonu gaiɗi wuzani EPIƊ-ƊAI a Hebron, e mini emel midini David aŋ pai midiɗi Izrayel.

⁴ David a suma pai sek ɗa buzani doogo doogo hu, a buza warɗi pai buza doogo doogo puɗu.

⁵ A za buza a Hebron buza muguzak gaini tile ɵaara aŋ pai midiɗi Yuda, a za buza warɗi Yeruzalem doogo doogo hu pi hu aŋ pai midiɗi Izrayel gaiɗi Yuda paŋ lai.

David a tikiti Yeruzalem

⁶ Pai David gaiɗi ɗaini e hitimiti Yeruzalem. E hitimi gaiɗi Yebuzitekai n'e ɗa woni ɗa, buri nagai e miɗini wiini David ɓa, aga ku niyasi aha war fuŋyi n'abai ɗa kai, ɗai na malvanai gaiɗi na daŋlaŋai maa e kuɗuku ta.

⁷ David a tika fuŋ n'abai zi ɵaga na Siyon ɗa. Sini mefeŋ ni par, e bindi yikini ɓa: Fuŋ n'abai na wiini David.

⁸ War mefeŋ ni ɗa David a muɗa, asiya ɗi paŋ n'a firiya a fuɗa ɗif na Yebus par, sai a vugasi mini hlai zi ki yem n'a na azumai pini afti ɗaw ɗa par. Ɗai nagai na daŋlaŋai gaiɗi na malvanai lai ɗa David a firyiɗi kai. A hina aŋ seŋ zi miɗi su ɓa: Ɗif na daŋlaŋ gaini zi melveŋ aga e niyi amlai warni tempel na wiini EPIƊ-ƊAI kai.

⁹ David a sumna aha war fuŋ n'abai zi ɵaga, a sini yiki ɓa: Fuŋ n'abai na wiini David. Asakal par David a rga hlai zamai zamai edi par sini, sini huduk n'e ŋiɗiŋ amai, na yikini ɓa Millo par arni aha sek.

¹⁰ Spakni David a riya amai wuzani sek sek, buri EPIƊ-ƊAI, Alaw na wiini spak paŋ a na fu gaini.

¹¹ Hiram pai na Tirus a ɵinasi ɗai sini David gaini luwuŋ Sedre, ɗai zi tûkû dalam gaiɗi ɗai zi kirhi kiryit kapai e rgini dalam wiini David.

¹² Nɵa David a sɗa ɓa, EPIƊ-ƊAI a tikaŋ aŋ pai midiɗi Izrayel, a siɗi kol wiiɗi paini buriɗi Izrayel na ɗaini.

Alini David n'e wi a Yeruzalem

¹³ David a mula falakai zamai aha lai, zamai edi par ca ca lai, viya aha war Yeruzalem, hlai n'a halasi a Hebron par; a wa ali na maɵagai gaiɗi na falakai viya.

¹⁴ Yikiɗi a na maini nɵa: Sammuwa, Sobab, Natan gaini Salmun,

¹⁵ Yibar, Elisuwa, Nefeg Yafiya.

¹⁶ Elisama, Eliyada gaini Elifelet lai.

Rɗi n'amai midiɗi Filistrekai

¹⁷ Filistrekai e ɵini ɓa e tiki David aŋ pai ta, gaini hlaiɗi paŋ e hili e piyiŋ aŋ yimiŋ. David a ɵina hanɗa a ŋoya war hlai zi ŋoyai na gaini ɵaga sini.

¹⁸ Filistrekai e cûsi e pisi war huduk na wiiɗi Refayitekai par tiɓ.

¹⁹ David a zilba EPIƊ-ƊAI a muɗa: Mu kiɗa mu hala aŋ hitimiɗi Filistrekai ɗi? Aga ku siɗi war ta ɗi? EPIƊ-ƊAI a wiyini seŋ wiini David: Nkam, hala aga mu siɗi Filistrekai war tuku.

²⁰ David a hala a Baal-Perasim, woni a rɗa amai midiɗi Filistrekai, a muɗa: EPIƊ-ƊAI a ɓasaŋa baŋa arbaɗi gawŋa maini baŋa na yem a ɓasaŋ arni daŋ nɵa, nɵa e sini yiki wiini hlai hanɗa ɓa Baal-Perasim a dara muɗa: Epin-gezani baŋa.

²¹ E hini ka alawai zi rgi na wiiɗi woni, David gaiɗi ɗaini e miliŋsi.

²² Filistrekai e wiyisi azi n'ag'aŋ sulu pra, e pisi war huduk na wiiɗi Refayitekai par tiɓ pra.

²³ David a zilba dirini EPIƊ-ƊAI pra, EPIƊ-ƊAI a miɗini: Ku hitimiɗiɗi arɗi par kai, bundasi duɓaɗi par, ku luɓasi midiɗi midini luwuŋ n'e yikiŋ ɓa Mikokuliye tar.

²⁴ Won hlai na ku ɵina li ezini ɗif a tuwa amai merfeŋni luwuŋ Mikokuliye ɗa, ku purma witaw tar. Buri ɓa a hlai na ta EPIƊ-ƊAI aga mu niyaɗi edi wuzaku aŋ fiɗiɗi askarai na wiiɗi Filistrekai edi ɗa.

²⁵ David a za maini n'EPIƊ-ƊAI a miɗiŋni nɵa, a rɗa amai midiɗi Filistrekai a Geba par haa aha miɗi Gezer ta.