2 Samuwel 3 - Ɗû na sɗik na wiini Alaw1 Hatam n'arbaɗi ɗai na pini Sawul gaiɗi ɗai na pini David ɗa, a za mefeŋ viya. David a bunda gdaŋ wuzani sek sek, ɗai na wiini Sawul ɗa gdaŋɗi a yima edi sek sek lai. Alini David n'e wi a Hebron 1 Ly. 3.1-4 2 Alini David n'e wi a Hebron ɗa e ɗi hanɗa: Ahini n'abai ɗa a Amnon, a ahiɗi Ahinowam na Yizreyel par; 3 na wulani ɗa a Kileyab a ahiɗi Abigayil na munini Nabal na Karmel par. N'ag'aŋ hu ɗa a Absalom n'ahiɗi Maaka n'ahini Talmai pai na Gesur. 4 N'ag'aŋ puɗu ɗa a Adoniyas a ahiɗi Haggit, n'ag'aŋ ɵim ɗa a Sefatiya a ahiɗi Abital; 5 n'ag'aŋ ɵaara ɗa a Yitreyam, a ahiɗi Egla na munini. Hanɗa e ɗi nagai na David a wiɗi a Hebron ɗa. Seŋ n'a za arbani Abner gaini Isboset 6 Won hlai na ɗai na wiini Sawul gaiɗi ɗai na wiini David e ɗa hitimi marɗi ɗa, Abner arbaɗi ɗai na wiini Sawul ɗa, spakni a riya amai sek sek. 7 Marmaini Sawul ktai te na fu yikiɗi ɓa Rispa, t'ahiɗi Ayya. Mefeŋ ktai Isboset a zilbini mini Abner ɓa: Ku fana gaiɗi munini apa buri maɗa? 8 Won hlai na Abner a ɵina seŋ hanɗa, a za hiy abai gara a muɗa: Ku talaŋa haa ɗa mu ɗif na amanaŋa aŋ kai, na ma aŋ gaiɗi ɗai na wiini David ɗa zaw. Haa girna ta mu ɗiya war jre gaiɗi pakatai na wiini apuku, gaiɗi tawalakaini gaiɗi marmakaini lai. Mu hunuku aŋ kɵi war tini David kai, amma girna ku zilbaŋa ma buri ɓa mu fana gaiɗi muni ɗa, 9 girna ɗa, EPIƊ-ƊAI a tikaŋa gir n'abai mada ta, na ɓa mu va wala n'EPIƊ-ƊAI a za ɵinini-ha wiini David miɗini ɗa amai kai ɗa: 10 Buri a ha wala mini ɓa aga a tikiti pai edi tini pinzibani Sawul ɗa par, a sitini Paramai zi pai wiini David midiɗi Yuda gaiɗi Izrayel paŋ, a Dan par haa Beer-seba ta. 11 Isboset a kiɗa a wiyini seŋ midini kai buri hunai pini wuzani ta. Abner a tapa warni gaini David 12 Abner a ɵina ɗai sini David war yikini dama, aŋ miɗini: Afti ɗa a wiini asiya ɗa? A miɗini pra: Za bonu gaya aga mu zina puku aŋ tipiɗi aliɗi Izrayel paŋ amai suku. 13 David a wiyini seŋ: Pɗem aga mu za bonu gaiku, mu paya tuku par ɗa a wala ktai bas, won hlai n'aga ku halasi aŋ nava gaya ɗa, ku hinitisi Mikal n'ahini Sawul ɗa duɓaku kai. 14 David a ɵina ɗai sini Isboset n'ahini Sawul, a miɗini: piyitiŋasi Mikal na muniya ta na mu tiyiti gaini amur na mini gûrgûle na piɗi Filistrekai na miya ɗaw na mu ɗuklaŋsi ɗa. 15 Isboset a ɵina piɗi aŋ yimitisi ahani Paltiyel na mofaɗi n'ahini Layis ɗa par. 16 Mofaɗi a halasi piɗi haa Bahurim ta, piɗi su aŋ tuwi, amma Abner a miɗini: Faka waya aha. A waya aha lai. 17 Abner a haɗa kalaŋ gaiɗi n'abakai n'arbaɗi ɗai na war Izrayel, a miɗiɗi: haa ɗipar kaw a na fu warki ɓa, a suma pai ɗa a David ɵa. 18 Nɵa, an na ɗa a mefeŋ na ki zi wala woni ɗa. Buri ɓa: EPIƊ-ƊAI a muɗa miɗini David maini nɵa, aga mu kûrɗiɗi ɗaiŋa na Izrayel war tiɗi Filistrekai par, tiɗi gawɗi na zamai ɗa par lai gaini David na ɵeŋŋa ɗa. 19 Abner a miɗiɗi seŋ hanɗa wiiɗi ɗai na war pinzibani Benyamin. Asakal hanɗa a hala a Hebron sini David aŋ miɗini miɗini wala na ɗai na Izrayel gaiɗi na war pinzibani Benyamin paŋ e rgi warɗi aŋ ziŋ ɗa. 20 Abner gaiɗi ɗai pini caaɓa lai, e hilisi sini David a Hebron, David a ziti fet n'amai burini Abner gaiɗi ɗai na pini ɗa. 21 Abner a miɗini wiini David: Pai n'epin-geza, mu hala na ɗa aga mu tipiɗisi ɗai na Izrayel paŋ puku, e zi bonu gaiku, nɵa aga ku ŋa woɗi paŋ na ku dara. David a hina Abner a hala, a waya wiini aha jam. Yowab a fuɗa Abner 22 Asakal par agwi ɗai na wiini David gaini Yowab e wiyisi edi mini hatam par, e kisi der na pini hatam par tiɗi viya. Sarti ni ɗa, Abner a na fu a Hebron gaini David kir kai. Buri ɓa David a hinaŋ a hala a zini wala na meefeŋ kai. 23 Won hlai na Yowab gaiɗi askarai na pini e cûsi aha ɗa, ɗai e hili e miɗini wiini Yowab ɓa: Abner n'ahini Ner a halasi sini pai ɗa ɗaw, amma pai a zini wala na meefeŋ kai. 24 Yowab a halasi sini pai a miɗini: Jaamus, ku za ɵa ɗa a maɗa? Abner a halasi haa ahaku ta, ku ɵaŋ su ɓa a hala wiini ɗa maɵa maɵa ɗa? 25 Tuku ku sɗa Abner n'ahini Ner ɗa ya, a halasi na ɗa aŋ duuluku, a tala na ɗa a ezini hlai gaini sda na ku na zaŋ ɗa lai. 26 Won hlai n'a niyasi ahani David par tar ɗa, a ɵina ɗai pini Abner aŋ yikiŋnisi. E yikiŋsi haa edi wulaɗi avai na Sira par, David a habar kai. 27 Won hlai na Abner a cosi a Hebron ɗa, Yowab a yimaŋ edi war baŋa kiini edi mini magala na mini fuŋ n'abai ɗa, maini n'a firiya a haɗa kalaŋ gaini kiiɗi sulu ɵa, woni a ɓulaŋ warni a fuɗaŋ edi ezini Asayel na tawalni ɗa. 28 Won hlai na David a ɵina hanɗa, a muɗa: Ta gaiɗi ɗai na midini aftiŋa paŋ ɗa, EPIƊ-ƊAI a sɗa ɓa, tiyi war seŋ na wiini Abner n'ahini Ner hanɗa kai. 29 Gir na pini meefeŋ hanɗa a kɵa miɗini Yowab gaini pinzibani, arbaɗi zamai fel a ka gaiɗi, na zamai dugum a yimiɗi, na zamai e wi hurofai maiɗi falakai ɵa, na zamai e bi mini hatam, na zamai mini wiyamai lai. 30 Yowab gaini Abisag na tawalni e fiɗi Abner edi buri a fuɗa Asayel na tawalɗi war hatam n'a za a Gabawon. 31 David a miɗini wiini Yowab gaiɗi nagai n'e pini paŋ maini nɵa: Ɓisi sapa na siki edi, wi sapa zi tuwi siki, tûwi Abner. Pai David a ɵaɗi pini kopoŋni par su. 32 E pi Abner a Hebron, Pai a tuwa miɗini yeɵni gaini wulani amai, ɗai paŋ e tûwi gaini lai. 33 Asakal par pai a ziti yamai zi tuwi ktai burini Abner, a ziniti maini nɵa: Abner a mra maini ɗif na tatala ɵa maɵa maɵa ɗa? 34 Tuku Abner, tuku a na fu gaini rgi kai, zaɓ azuku gaini mili kaalai. Amma ku mra maini ɗif n'a kɵa war tiɗi gorɓolokai ɵa maɵa maɵa ɗa? Ɗai n'e ɗa ta ha e tûwi katawai a suwa pra. 35 Asakal par ɗai e hili sini David hlai na futi te nawa kai hai ɗa, e miɗini buri a suma wala agwi, amma David a haa wala mini a muɗa: Alaw a tikaŋa gir n'abai mada ta, na ɓa mu suma wala ktai li wuzani nûwiɗi futi ɗa. 36 Won hlai na ɗai paŋ e ɵini seŋ hanɗa, a tala arɗi pɗem gara. Sda na David a zaŋ paŋ ɗa, ɗai e firiyiŋ gara. 37 Ɗai na Yuda gaiɗi ɗai na Izrayel ɗa paŋ e siɗi warni mefeŋ ni ɓa mri na wiini Abner n'ahini Ner ɗa tini pai warni kai. 38 Pai a miɗiɗi wiiɗi ɗai n'abakai, ki siɗi ɓa girna ɗa ɗif a mra su, ɗif n'abai a mra warɗi Izrayel su, ki siɗiŋ ɵa ya ɗi? 39 Ta girna ɗa, gaini emel n'e miŋŋa mada aŋ pai ɗa paŋ, mu fiɗiti agula su, amma ɗai hanɗa n'aliɗi Seruya ɗa agulɗi a bunda gdaŋ a suwa na wiya ɗa. Amma EPIƊ-ƊAI a sa sini asiya ɗi paŋ vrak na pini sdani na meefeŋ n'a zaŋ. |
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
Bible Society of Cameroon